ភ្នំពេញៈ ជនជាតិចិនបើករថយន្តទំនើបបោះយ៉ាងលឿនដល់ផ្លូវបំបែកជាបួនបានត់បត់ឆ្លងផ្លូវត្រូវម៉ូតូបុកចំហៀងខាងស្ដាំពេញទំហឹង បណ្ដាលឲ្យមនុស្សប្រុសស្រីពីរនាក់ រងរបួសធ្ងន់ ចំណែកនារីជនជាតិចិនម្នាក់ ត្រូវកញ្ចក់ខ្ទាតមុខរងរបួសស្រាល។
គ្រោះថ្នាក់ចរាចរណ៍នេះ បានកើតឡើងនៅវេលាម៉ោង១២និង៤០នាទីរំលងអធ្រាត្រឈានចូលថ្ងៃទី២៤ ខែធ្នូ ឆ្នាំ២០១៧នេះ នៅចំណុចស្តុបរោងកុនលុច្ស ផ្លូវពនរោត្ដម កែងផ្លូវ១៥៤ ស្ថិតក្នុងសង្កាត់ផ្សារថ្មី៣ ខណ្ឌដូនពេញ។
អ្នកឃើញហេតុការណ៍ បានឲ្យដឹងថា មុនពេលកើតហេតុ គេឃើញបុរសជនជាតិចិនម្នាក់បើករថយន្តសេរីទំនើប ម៉ាក BMW ពណ័ស ពាក់ស្លាកលេខភ្នំពេញ 2AM-6839 រួមដំណើរជាមួយជនជាតិចិនប្រុសស្រី៣នាក់ បើកពីត្បូងទៅជើងក្នុងល្បឿនលឿនដូចហោះ លុះមកដល់ចំណុចកើតហេតុខាងបានបត់ឆ្លងផ្លូវ ត្រូវម៉ូតូឌ្រីមសង់ សេ០១៥ ពណ៌ខ្មៅ ពាក់ស្លាកលេខភ្នំពេញ 1FA-0671 បើកពីជើងទៅត្បូងក្នុងល្បឿនដូចគ្នា ជ្រុលទៅបុកចំហៀងខាងស្ដាំពេញទំហឹង បណ្ដាលបោកនិងរថយន្តរងរបួសធ្ងន់ទាំងពីរនាក់សន្លប់ស្ដូកស្ដឹងចំណែកស្ត្រីម្នាក់ដែលរួមក្នុងរថយន្តរងរបួសបែកមុខមាត់។ អ្នករងរបួសធ្ងន់ទាំងពីរ ត្រូវរថយន្តគិលានសង្គ្រោះគ្លីនិកឯកជនមកដឹកយកទៅកាន់មន្ទីរពេទ្យភ្លាមៗផងដែរ។
ក្រោយកើតហេតុគេឃើញសមត្ថកិច្ចមូលដ្ឋានចុះមកកន្លែងកើតបានទាក់ទងជំនាញមកវាស់វែងយករថយន្តបង្ក និងម៉ូតូរងគ្រោះមកការិយាល័យចរាចរណ៍ផ្លូវគោកស្នងការរាជធានីភ្នំពេញរងចាំដោះស្រាយនៅពេលក្រោយ៕
