លោក ខឹម វាសនា ប្រមុខបក្ស LDP បានសរសេរក្នុងហ្វេសប៊ុកថា ៖ការផ្តល់មូលដ្ឋានក្នុងការពិចារណាដើម្បីផ្លាស់ប្តូរផ្នត់គំនិតរបស់មនុស្សជាកិច្ចការដែលខ្ញុំជ្រើសរើសយកសម្រាប់ជីវិតរបស់ខ្ញុំ។ មនសិការខ្ញុំប្រាប់ខ្ញុំថា ខ្ញុំមានភារៈធ្វើរឿងនេះទៅកាន់មនុស្សជាតិដោយគ្មានប្រកាន់ពូជសាសន៍ឡើយ។ ម្យ៉ាងទៀត ការងារនេះវាស្ថិតនៅក្នុងការគ្រប់គ្រងបានរបស់ខ្ញុំផងដែរ ទោះខ្ញុំធ្វើតែម្នាក់ឯងជាមួយសហការីខ្ញុំបួនដប់នាក់គឺខ្ញុំអាចធ្វើវាកើតហើយ។ ចិត្តរបស់ខ្ញុំ មិនជាចង់ទេ ការទទួលខុសត្រូវធ្ងន់ហួសពីការធ្វើឱ្យសម្រេចបានលើសពីម្នាក់ឯងខ្ញុំ ដូចជាការធ្វើនយោបាយដឹកនាំប្រទេសមួយជាដើមនោះ។
ប្រមុខបក្សល្បីខាងប្រើពាក្យអសុរស បន្ថែមថា៖ ធ្វើនយោបាយ វាត្រូវការក្រុមអ្នកចូលរួមច្រើននាក់ណាស់ ពិតជាត្រូវបន្ថែមការទទួលខុសត្រូវធំធេងលើសពីការផ្សព្វផ្សាយទស្សនៈសម្រាប់ការផ្លាស់ប្តូរផ្នត់គំនិតមនុស្សដែលខ្ញុំអាចធ្វើវាបានតែជាមួយសហការីខ្ញុំបួនដប់នាក់បាន។ តែខ្ញុំជៀសពីការទទួលខុសត្រូវជាអ្នកនយោបាយម្នាក់មិនបានសោះ ព្រោះខ្ញុំបានឃើញយ៉ាងច្បាស់ថា នៅស្រុកខ្មែរគ្មានអ្នកនយោបាយពិតប្រាកដដែលអាចជួយប្រទេស និងពលរដ្ឋនៃប្រទេសនេះបានទេ ម្លោះហើយខ្ញុំក៏គ្មានជម្រើសទេ ត្រូវតែចូលខ្លួនមកកាន់ទីលាននយោបាយខ្មែរនេះទៅ។ ខ្ញុំមិនចង់ទេតែខ្ញុំគ្មានផ្លូវគេចវេសបានទេ ព្រោះមនសិការជាមនុស្សប្រាប់ខ្ញុំអំពីរឿងនេះ។ ខ្ញុំបានធ្វើមកទាំងចិត្តមិនចង់អស់ជាងដប់មួយឆ្នាំហើយ ជាការផ្តល់ឱកាសអោយមនុស្សខ្មែរដ៏អភ័ព្វនេះ ជាងដប់មួយឆ្នាំ ក្នុងជីវិតជាអ្នកនយោបាយតែបេះដូង ជាជនបដិវត្តន៍ផ្នត់គំនិតសម្រាប់មនុស្សជាតិសកល មនសិកាខ្ញុំប្រាប់ខ្ញុំថា ខ្ញុំបានផ្តល់ឱកាសឱ្យពួកគេល្មមសមរម្យហើយ ខ្ញុំរួចការជេរស្តីរបស់មនសិការខ្ញុំហើយ។
អតីតតារាភាពយន្ត ថាទុក LDP មួយនេះជាកាដូសម្រាប់ពួកគាត់ចុះ ហើយលោកអាចនឹងត្រឡប់មកទទួលខុសត្រូវវិញ ឬមិនមកអាស្រ័យតាមស្ថានភាពជាក់ស្តែង ពេលនោះគាត់នឹងធ្វើការសម្រេចចិត្តតាមមនសិកាគាត់នៅពេលនោះ។ លោកមិនលុះនៅក្រោមសំពាធនៃតណ្ហារបស់ខ្លួនទេ តែចំណុះឱ្យតែមនសិការបស់ខ្លួនតែប៉ុណ្ណោះ។
