នៅព្រឹកថ្ងៃទី០៣ ខែមករា ឆ្នាំ២០១៨ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញជួបសួរសុខទុក្ខកូនក្មួយកម្មករកម្មការនី ចំនួន ១៣ ៥៤៦នាក់ មកពីរោងចក្រចំនួន១៣ ស្ថិតនៅរោងចក្រតំបន់ផ្សារសាំហាន់ ក្នុងខណ្ឌប្ញស្សីកែវ រាជធានីភ្នំពេញ។
ថ្លែងក្នុងពិធីសំណេះសំណាលនេះ លោកនាយករដ្ឋមន្រ្តី មានប្រសាសន៍ថា៖ លោកនឹងបង្កើត ”មូលនិធិស៊ីក្លូ” ដើម្បីជួយទ្រទ្រង់ និងអភិរក្សស៊ីក្លូ។
សម្តេចបានបន្ថែមថា៖ បងប្អូនអ្នកធាក់ស៊ីក្លូ ក៏ជាបងប្អូនកម្មករក្រៅប្រព័ន្ឋដែរ បងប្អូនក៏ត្រូវការកិច្ចគាំពារសុខុមាលភាពដូចគ្នា។
សម្តេចបានថ្លែងប្រាប់បងប្អូនកម្មករស៊ីក្លូទូទាំងប្រទេសបានជ្រាបថា បងប្អូនគឺនឹងទទួលបានការពិនិត្យ និងព្យាបាលជំងឺដោយមិនគិតថ្លៃទេ នៅក្នុងមន្ទីរពេទ្យរដ្ឋ។ ទន្ទឹមនឹងនេះ រដ្ឋាភិបាលនឹងបង្កើត “មូលនិធិទ្រទ្រង់ស៊ីក្លូ” ដើម្បីជួយទ្រទ្រង់ និងអភិរក្សស៊ីក្លូ។
សម្តេចក៏បានអំពាវនាវ សូមបងប្អូនចូលរួមវិភាគទាន និងចូលរួមថែរក្សានិងជិះស៊ីក្លូដើម្បីកុំឱ្យស៊ីក្លូខ្មែរយើងបាត់បង់។ ស៊ីក្លូក៏អាចទាក់ទាញភ្ញៀវទេសចរផងដែរ។ ម្យ៉ាងទៀត សម្តេចក៏ស្នើសុំសប្បុរសជន និងបងប្អូនដែលមានបំណងចង់ចូលរួមគាំទ្រ និងទ្រទ្រង់ស៊ីក្លូគឺសូមចូលរួមផ្តល់វិភាគទានជាមួយសម្តេច។ លោកនាយករដ្ឋមន្ត្រីគ្រោងនឹងបរិច្ចាគថវិកា ១២០លានរៀល ក្នុង១ឆ្នាំ។
