បន្ទាយមានជ័យៈ មានព័ត៌មានលេចឮមកថា ថ្មីៗនេះ ឧត្ដមសេនីយ៍ត្រី នេត សំអាត អនុប្រធានការិយាល័យទំនាក់ទំនងព្រំដែនកម្ពុជា-ថៃ មកពីក្រសួងការពារជាតិ បានចូលទៅផឹកស៊ីក្នុងហាង១ នៅក្រុងប៉ោយប៉ែត រហូតស្រវឹងជោកជាំ ហើយប្រើអំពើហិង្សា ដោយយកចានគប់ទៅលើក្មេងស្រីម្នាក់ ចំកណ្ដាលថ្ងាស់ បណ្ដាលឲ្យបែកក្បាល ហូរឈាមពេញផ្ទៃមុខ។
តាមការខ្សឹបខ្សៀវពីមន្ត្រីជំនាញ បានបង្ហើបឲ្យដឹងថថា នាល្ងាចថ្ងៃសៅរ៍ ១១កើត ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៧ ខែមករា ឆ្នាំ២០១៨នេះ ក្រោយបង្កហិង្សាទៅលើក្មេងស្រីរងគ្រោះនោះរួចហើយ ឧត្ដមសេនីយ៍ត្រី ដែលជាជនដៃដល់រូបនេះ បានសម្របសម្រួលបញ្ចប់រឿង ដោយត្រឹមតែទឹកប្រាក់មិនដល់១.០០០ដុល្លារផង ទាំងកិត្តិយសក្មេងស្រីរូបនោះ ត្រូវបានលោកបំពាននៅក្នុងចំណោមមនុស្សម្នាជាច្រើនថែមទៀតនោះ។
ពាក់ព័ន្ធនឹងករណីនេះ អ្នកឃើញហេតុការណ៍ ក៏ដូចជាប្រជាពលរដ្ឋសង្ឃឹមថា ថ្នាក់ដឹកនាំ នឹងចាត់វិធានការជាបន្ទាន់ ដើម្បីជៀសវាងការបង្កហិង្សាបែបនេះ ដោយសំអាងតែទៅលើអំណាច និងទឹកប្រាក់សងជំងឺចិត្តទៅលើជនរងគ្រោះបន្តិចបន្ទួចនោះ៕
