លោក អ៊េង ឆៃអ៊ាង អតីតអនុប្រធានអតីតគណបក្សសង្គ្រោះជាតិ និងជាសហស្ថាបនិកចលនាសង្គ្រោះជាតិ កាលពីម្សិលមិញបានលើកឡើងថា៖ រដ្ឋមន្ត្រីទាំងអស់នៃរដ្ឋាភិបាលលោក ហ៊ុន សែន មានតែលោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ម្នាក់គត់ មានចរិតសាហាវព្រៃផ្សៃដូចខ្មែរក្រហម គឺឲ្យតែដឹងថា បុគ្គលិក ឬ គ្រូបង្រៀនរូបណា ដែលបានចូលរួមជាមួយគណបក្សសង្គ្រោះជាតិ ត្រូវតែលុបឈ្មោះចេញពីក្របខណ្ឌរដ្ឋ។ការចោទប្រកាន់បែបនេះ ក្រោយពីលោករដ្ឋមន្ត្រីក្រសួងអប់រំរូបនេះលុបឈ្មោះបុគ្គលិកអប់រំចំនួន១១នាក់ ដែលជាអ្នកគាំទ្របក្សប្រឆាំង។ សមាគមគ្រូបង្រៀនកម្ពុជាឯករាជ្យឲ្យដឹងថា រហូតមកដល់ថ្ងៃនេះ បុគ្គលិកអប់រំចំនួន១១នាក់ដែលជាអតីត មន្រ្តី និងអ្នកគាំទ្របក្សប្រឆាំងត្រូវបានក្រសួងលុបឈ្មោះចេញពីក្របខ័ណ្ឌមន្ត្រីរាជការ ដោយក្នុងនោះមាន ទាំង លោក រ៉ុង ឈុន ផងដែរ។ ក្នុងសេចក្តីសម្រេចចុះថ្ងៃទី៣០ មករាដូចគ្នា រដ្ឋមន្ត្រីក្រសួងអប់រំ លោក ហង់ ជួនណារ៉ុនបានសម្រេចលុបឈ្មោះគ្រូបង្រៀន៤នាក់នៅសៀមរាប ២នាក់នៅខេត្តព្រះសីហនុ និងគ្រូតាមបណ្តាខេត្តផ្សេងៗ ដោយលើក ហេតុផលថាគ្រូបង្រៀនទាំងនោះ អវត្តមានពីការងារដោយគ្មានច្បាប់អនុញ្ញាត។ កាលពីថ្ងៃទី១៥កុម្ភៈ គ្រូបង្រៀន២នាក់នៅសៀមរាបដែលត្រូវក្រសួងលុបឈ្មោះចេញពីក្របខណ្ឌមន្រ្តីរាជការ គឺលោក មុត ផល្លា និង លោក ពៀត ម៉ាប់ បានលើកឡើងប្រហាក់ប្រហែលគ្នាថា ពួកគាត់បានសុំច្បាប់ត្រឹម ត្រូវស្របតាមលក្ខខន្តិកៈ និងអនុក្រឹត្ស ដោយមានការអនុញ្ញាតពីមន្ទីរអប់រំខេត្តផងដែរ។
