ថ្លៃងនៅក្នុងកម្មវិធីបិទសន្និបាតបូកសរុបលទ្ឋផលការងារឆ្នាំ២០១៧ របស់អគ្គនាយកដ្ឋានពន្ឋនាគារ កាលពីម្សិលមិញ សម្តេច ស ខេង រដ្ឋមន្ត្រីក្រសួងមហាផ្ទៃ ថាមានការបារម្ភចំពោះសុខភាពអ្នកទោស ដោយសារតែកន្លែងដាក់តូចចង្អៀត ខណៈចំនួនអ្នកទោសបានកើនឡើងកាន់តែខ្លាំង ជាពិសេសកំណើនអ្នកទោសជាប់ពាក់ព័ន្ធនឹងបញ្ហាគ្រឿងញៀនតែម្តង។សម្តេច ណែនាំឲ្យមន្ត្រីជំនាញសិក្សា ដើម្បីរកវិធីសាស្ត្រងាយឲ្យវិស័យឯកជនចូលរួមសាងសង់អគារសម្រាប់ឃុំឃាំង។
លោក សន កែវ អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ មានប្រសាសន៍ថាបច្ចុប្បន្ននេះ មានក្រុមហ៊ុនវិស័យឯកជនតែមួយទេ ដែលបានចូលរួមសាងសង់ពន្ធនាគារព្រៃស ហើយអគារថ្មីដែលទើបសង់នេះអាចដាក់អ្នកទោសបានប្រហែលជា៤០០នាក់។ លោកបន្ថែមថា៖ បើតាមគម្រោងហើយនៅចុងឆ្នាំនេះ ប៉ុន្តែជាក់ស្ដែងយ៉ាងម៉េចទៀត ខ្ញុំអត់ដឹងទេ តាមរយៈគម្រោងគឺគម្រោងនឹងសាងសងឲ្យហើយរួចរាល់នៅចុងឆ្នាំនេះ។ ពន្ធនាគារដែលទើបសង់ថ្មីនេះ ស្ថិតនៅក្រោមការគ្រប់គ្រងរបស់អគ្គនាយកដ្ឋានពន្ធនាគារនៃក្រសួងមហាផ្ទៃដដែល ប៉ុន្តែអ្នកទោសដែលចង់ចូលស្នាក់នៅក្នុងពន្ធនាគារនោះត្រូវបង់ប្រាក់ ដោយសារពន្ធនាគារនោះក្រុមហ៊ុនឯកជនជាអ្នកវិនិយោគ។
បើតាមរបាយការណ៍បូកសរុបលទ្ធផលការងារប្រចាំឆ្នាំ២០១៧ និងទិសដៅការងារឆ្នាំ២០១៨ របស់អគ្គនាយកដ្ឋានពន្ធនាគារបានឲ្យដឹងផងដែរថា ចំនួនអ្នកជាប់ឃុំកាលពីឆ្នាំ២០១៧ មានចំនួនជាង២៨០០០នាក់ ក្នុងនោះមានស្ត្រី៤៥០នាក់ ខណៈឆ្នំា២០១៦ មានប្រមាណ១៦០០០នាក់ ពោលមានការកើនឡើងជាង១ ២០០០នាក់ (កើន៧៥%) ហើយអ្នកជាប់ឃុំទំាងនោះ អ្នកប្រព្រឹត្តបទល្មើសគ្រឿងញៀនជាប់លំដាប់ថ្នាក់លេខ១ និងបទល្មើសឆក់ប្លន់់ជាប់លំដាប់ថ្នាក់លេខ២។ ការកើនចំនួនអ្នកទោសនេះ នឹងធ្វើឲ្យមានហានិភ័យដល់សន្តិសុខ សណ្ដាប់ធ្នាប់ ប៉ះពាល់ដល់អនាម័យសុខភាព និងការបង្ការជំងឺឆ្លងផងដែរ។
