រតនគិរីៈ ស្ត្រីម្នាក់ធ្លាក់ឈាមរហូតដល់ស្លាប់ ក្រោយពេលដឹកបញ្ជូនទៅដល់មន្ទីពេទ្យកន្លះម៉ោង បន្ទាប់ពីចូលសម្រាលកូននៅមណ្ឌលសុខភាព កាលពីវេលាយប់រំលងអធ្រាត្រ ឈានចូលថ្ងៃសុក្រ ៩កើត ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៣ ខែកុម្ភៈ ឆ្នាំ២០១៨។
ប្រភពបានឲ្យដឹងថា ក្រោយពេលសម្រាលបានកូនភ្លោះ២នាក់ ស្រ្តីដែលគេអះអាងថា ជាជនជាតិឡាវ បានស្លាប់នៅថ្ងៃទី២៣ ខែកុម្ភៈ ឆ្នាំ២០១៨ បន្ទាប់ពីដឹកបញ្ជូនមកពីមណ្ឌលសុខភាព វរៈជ័យ នៅក្នុងភូមិវើនសៃ ឃុំវើនសៃ ស្រុកវើនសៃ ខេត្តរតនគិរី។
អធិការនគរបាលស្រុកវើនសៃ លោក ទឺ នូថង នៅព្រលប់ថ្ងៃកើតហេតុខាងលើ បានប្រាប់ភ្នាក់ងារ Cam Post ថា ជនរងគ្រោះដែលសម្រាលកូនហើយស្លាប់ឈ្មោះ ចាន់ នី អាយុ៣៦ឆ្នាំ មានទីលំនៅភូមិថាឡាត់ ឃុំសេសាន ស្រុកសេសាន ខេត្តស្ទឹងត្រែង។
ប្រធានមន្ទីរពេទ្យបង្អែកខេត្តរតនគិរី លោក ហុីង ថានសគន្ធា បានប្រាប់ Cam Post នៅព្រលប់ថ្ងៃទី២៣ ខែកុម្ភៈនេះ ដែរថា នារីរងគ្រោះបានស្លាប់ក្រោយពេលបញ្ជូនមកដល់មន្ទីពេទ្យបង្អែកកន្លះម៉ោង គឺកាលពីវេលាម៉ោង១ និង៣០នាទីរំលងអធ្រាត្រ ឈានចូលថ្ងៃទី២៣ ខែកុម្ភៈនេះ។ ទោះជាបែបនេះក្តី លោកវេជ្ជបណ្ឌិតមិនបានបរិយាយពីសំណងជូនដល់ជនរងគ្រោះនោះទេ គ្រាន់តែដឹងថា ជនរងគ្រោះត្រូវបានគេដឹកចេញពីមន្ទីរពេទ្យ ហើយយកទៅធ្វើបុណ្យ និងបូជារួចហើយដែរ។
តាមសេចក្តីរាយការណ៍ មុនពេលកើតហេតុ នារីរងគ្រោះបានមកលេងផ្ទះឪពុកម្តាយនៅស្រុកវើនសៃ។ គាប់ជួនពេលនោះ នាងក៏បានឈឺពោះសម្រាលកូន ហើយស្វាមីរបស់នាងបានបញ្ជូននាងទៅមណ្ឌលសុខភាព វរៈជ័យ ក្បែរនោះ។ បន្ទាប់មកនាងក៏សម្រាលបានកូនភ្លោះ២នាក់ ប៉ុន្តែអ្វីដែលអកុសលនោះ គឺនាងបានហូរឈាមធ្លាក់ខ្លាំង រហូតធ្វើឲ្យសាច់ញាតិដឹកបញ្ជូននាងបន្តទៅសង្រ្គោះនៅមន្ទីរពេទ្យបង្អែកខេត្ត តែសោកស្តាយបំផុត នាងបានបាត់បង់ជីវិតទៅហើយ ក្រោយពេលសង្រ្គោះបានកន្លះម៉ោង។
រហូតមកទល់នឹងយប់ថ្ងៃទី២៣ ខែកុម្ភៈនេះ អ្នកនាំពាក្យក្រសួងសុខាភិបាល លោក លី សូវ៉ាន់ មិនបានលម្អិតរឿងស្រ្តីជនជាតិឡាវសម្រាលកូនស្លាប់ក្នុងមន្ទីរពេទ្យនោះទេ ដោយលោកបញ្ជាក់ប្រាប់ Cam Post ថា លោកមិនទាន់ជ្រាបរឿងនេះ៕
