ភ្នំពេញៈ សេចក្ដីរាយការណ៍ពីភ្នាក់ងារ CAM POST បានឲ្យដឹងថា កាលពីវេលាម៉ោង៤ និង១០នាទីល្ងាច ថ្ងៃអាទិត្យ ១០រោច ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១១ ខែមីនា ឆ្នាំ២០១៨នេះ បុរសបរទេសម្នាក់ បានលោតពីលើអគារជាន់ទី១៥ នៃ ធ្លាក់ពីលើអគារជាន់ទី១៥ នៃសណ្ឋាគារវី នៅតាមផ្លូវលេខ១១១ ស្ថិតក្នុងសង្កាត់បឹងព្រលិត ខណ្ឌ៧មករា រាជធានីភ្នំពេញ។
ប្រភពពីម្ចាស់រ៉ឺម៉កម៉ូតូម្នាក់ដែលនៅក្បែរកន្លែងកើតហេតុបានប្រាប់ឲ្យភ្នាក់ងារ CAM POST ដឹងថា ខណៈគាត់កំពុងនិយាយលេងជាមួយមិត្តភ័ក្តិនៅក្បែរនោះបានប្រហែល៥នាទី ក៏ឭសម្លេងផាំងលាន់ដូចរន្ទះ ស្រាប់តែគាត់ងាកទៅមើល ក៏ភ្ញាក់ផ្អើលយ៉ាងខ្លាំង ព្រោះឃើញមនុស្សធ្លាក់ពីលើអគារខុនដូរ ចំពីលើដំបូលរ៉ឺម៉ករបស់គាត់បណ្ដាលឲ្យគាបមនុស្សជាប់ដាច់សាច់ដៃជើងគួរឲ្យរន្ធត់ រួចក៏ផ្អើលឆោរឡោរឡើងតែម្ដង។
ប្រភពពីសន្តិសុខដែលយាមខុនដូរខាងលើបានប្រាប់ឲ្យ CAM POST ដឹងថា បុរសបរទេសខាងលើ មិនសូវដែលឃើញមុខចេញចូលខុនដូរនេះទេ តែមិនដឹងយ៉ាងម៉េច ស្រាប់តែនៅវេលាម៉ោងកើតហេតុខាងលើ បែរជាឃើញធ្លាក់ចុះមកពីជាន់ទី១៥ ចំរ៉ឺម៉កម៉ូតូដែលចតរង់ចាំដឹកភ្ញៀវនៅមុខខុនដូរបែបហ្នឹងសោះ។
ក្រោយកើតហេតុ សមត្ថកិច្ចមូលដ្ឋានបានចុះមកកន្លែងកើតហេតុរួចសាកសួរ និងទាក់ទងទៅសមត្ថកិច្ចជំនាញឲ្យចុះមកធ្វើកោសល្យវិច័យ ស្រាវជ្រាវរកមូលហេតុផងដែរ៕
