ត្បូងឃ្មុំៈ ដើមជ្រៃដ៏ធំ១ដើម ដែលក្រុមឈ្មួញបានទិញពីអ្នកស្រុកនៅភូមិជើង ឃុំជាំ ស្រុកមេមត់ ក្នុងតម្លៃ១.០០០ដុល្លារ និងបម្រុងលួចដឹកយកទៅលក់នៅប្រទេសវៀតណាម តាមច្រកព្រំដែនក្នុង ស្រុកមេមត់ ខេត្តត្បូងឃ្មុំ តែសំណាងអាក្រក់ព្រះមិនជួយ គឺដឹកយកទៅមិនរួច ដោយត្រូវបាក់រថយន្ត ហើយទម្លាក់ចោលនៅជិតមាត់ច្រកព្រំដែន កាលពីចុងខែតុលា ឆ្នាំ២០១៧ កន្លងទៅ ដោយប្រជាពលរដ្ឋ ចាត់ទុកថាមានបារមីពូកែស័ក្តិសិទ្ធិ កុំអីបោលទៅស្រុកយួនបាត់ទៅហើយ។
ដើមជ្រៃដ៍ធំ១ដើមនេះត្រូវបានលោក លី ឡេង អភិបាល នៃគណៈអភិបាលខេត្តត្បូងឃ្មុំ ចាត់តាំងឲ្យសមត្ថកិច្ចជំនាញរដ្ឋបាលព្រៃឈើ ស្ទូចដឹកយកទៅធ្វើការដាំដុះឡើងវិញ នៅក្នុងស្នាក់ការគណបក្សប្រជាជនកម្ពុជា ស្រុកត្បូងឃ្មុំ ស្ថិតនៅឃុំជីរោទ៍ទី២ កាលពីថ្ងៃទី២៨ ខែវិច្ឆិកា ឆ្នាំ២០១៧ កន្លងទៅ។
រហូតមកដល់ពេលនេះ ដើមជ្រៃដ៍ធំមួយដើមនេះ ចាប់ផ្ដើមលូតលាស់ស្លឹក ពណ៌ខៀវស្រងាត់ហើយ ហើយនៅរសៀលថ្ងៃទី០១ មីនា ឆ្នាំ២០១៨នេះ ក៏មានការប្រារព្ធពិធីលេងភ្លេងពិណពាទ្យដើម្បីថ្វាយដល់ម្ចាស់ទឹក ម្ចាស់ដីបារមីជ្រៃធំ ដើម្បីសុំសេចក្តីសុខ សម្រាប់ពលរដ្ឋក្នុងខេត្តទាំងមូល។
ដំបូងទោះបីជាអ្នកបើករថយន្តស្ទូច ប្រើគ្រប់វិធីសាស្ត្រយ៉ាងណាក៍ដោយ ក៏មិនអាចស្ទូចដើមជ្រៃធំមួយនេះបានដែរ ក៏បានអុជធូបបែបន់ថា ប្រសិនបើម្ចាស់ទឹកម្ចាស់ដីឲ្យស្ទូចដើមជ្រៃនេះយកទៅដាំ ដុះបានល្អ នឹងលេងភ្លេងពិណពាទ្យថ្វាយនៅពេលក្រោយ នេះបើតាមការបញ្ជាក់ពីលោក គឹម ឈុនលី នាយខណ្ឌរដ្ឋបាលព្រៃឈើត្បូងឃ្មុំ ។
រូបភាពកាលពីចុងខែតុលា ឆ្នាំ២០១៧ កន្លងទៅ
