កោះកុងៈ មន្ត្រីកាំកុងត្រូល ប្រចាំច្រកអន្តរជាតិចាំយាមប្រចាំខេត្តកោះកុង បានរងនូវការចោទថា បានឃុបឃិតជាមួយឈ្មួញនាំចូលទំនិញខូចគុណភាពរាប់សិបតោនពីប្រទេសថៃ យកមកចរាចរនៅក្នុងខេត្ត និងនៅរាជធានីភ្នំពេញ រួមទាំងបណ្តាខេត្តជាប់គ្នាមួយចំនួនទៀត។
ប្រជាពលរដ្ឋក្នុងខេត្តកោះកុង សុទ្ធតែបានចោទថា មន្ត្រីកាំកុងត្រូល ប្រចាំច្រកទ្វារអន្តរជាតិចាំយាម ខេត្តកោះកុង បានឃុបឃិតយ៉ាងទុច្ចរិតឲ្យឈ្មួញនាំចូលសាច់ខូចគុណភាពដល់ទៅរាប់សិបតោនក្នុងមួយថ្ងៃៗ យកមកលក់នៅកម្ពុជា ដោយមិនបានគិតគូរដល់សុខភាពអ្នកទទួលទាននោះឡើយ។
ស្ថាប័ននគរបាលជាតិ ក៏បានចោទប្រកាន់មន្ត្រីកាំកុងត្រូលបែបនេះ នៅក្នុងសេចក្ដីរាយការណ៍ចុះផ្សាយលើវេបសាយអគ្គស្នងការនគរបាលជាតិកាលពីពេលថ្មីៗនេះ ដោយអះអាងថា បានដកស្រង់សម្ដីប្រភពមិនបញ្ចេញឈ្មោះជាច្រើន។
សេចក្ដីរាយការណ៍នោះ បានផ្សាយថា យ៉ាងហោចណាស់គ្រឿងក្នុង ស្លាប ជង្គង់មាន់ និងប្រហិតខូចគុណភាពចន្លោះពី១តោន ទៅ ២តោន ត្រូវបានសមត្ថកិច្ចគយកាំកុងត្រូល អនុញ្ញាតឲ្យនាំចូលតាមច្រកទ្វារអន្តរជាតិចាំយាមខេត្តកោះកុងយ៉ាងគគ្រឹកគគ្រេងដដែល ដោយថា ទោះបីមុខទំនិញមួយនេះ ត្រូវបានរដ្ឋាភិបាលបញ្ជាឲ្យមន្ត្រីថ្នាក់ក្រោមរឹតបន្តឹងនៅតាមច្រកព្រំដែននានាទូទាំងប្រទេសក៏ដោយ។
តាមចម្លើយក្រុមឈ្មួញបញ្ជាក់ថា ពួកគេបានបង់លុយឲ្យមន្ត្រីកាំកុងត្រូលប្រចាំខេត្ត និងច្រកចាំយាមរួចហើយ ហើយថែមទាំងដាក់ខែទៀតផង។
លោក ហ៊ុយ ភារម្យ និងលោក ជា នី ប្រធានសាខាកាំកុងត្រូលប្រចាំច្រកចាំយាម មិនអាចសុំការបំភ្លឺ ទាក់ទងករណីនេះ នៅឡើយទេ ដោយសារតែទូរស័ព្ទចូលតែគ្មានអ្នកលើក។
ប៉ុន្តែប្រជាពលរដ្ឋ បានលើកឡើងថា ករណីនេះកើតមានយូរហើយ ហើយមន្ត្រីកាំកុងត្រូលម្នាក់ៗ ប្រមូលលុយដាក់ ហោប៉ៅឆ្អែតគ្រប់ៗគ្នា ជាមួយក្រុមឈ្មួញទាំងនោះ។
ប្រជាពលរដ្ឋអំពាវនាវឲ្យស្ថាប័នពាក់ព័ន្ធផ្សេងៗទៀត សំខាន់មន្ត្រីកាំកុងត្រូលថ្នាក់លើ មេត្តា ពង្រឹងការងារកូនចៅនៅខេត្តកោះកុងផង ព្រោះថា ក្រៅពីប្រព្រឹត្តិអំពើពុករលួយហើយនោះ ពួកគេនៅមានកំហុសមួយទៀត គឺឃុបឃិតបំផ្លាញសុខភាព ឬសម្លាប់ប្រជាពលរដ្ឋខ្មែរ ដែលទទួលទានសាច់ខូចគុណភាពទាំងនោះ៕
