លោក សុខ ពុទ្ធិវុធ កូនប្រុសច្បងរបស់ឯកឧត្តម សុខ អាន អតីតរដ្ឋមន្រ្តីទីស្តីការគណៈរដ្ឋមន្រ្តី និងជាកូនប្រសារបស់សម្តេច ហ៊ុន សែន នាយករដ្ឋមន្ត្រី ត្រូវបានតែងតាំងជាប្រធានសហព័ន្ធព័ត៌មានវិទ្យា និងទូរគមនាគមន៍ ICT សម្រាប់អាណត្តិទី៥ ឆ្នាំ២០១៨ នេះ។ ការតែងតាំងនេះ គឺជាការបន្ថែមទៅលើមុខតំណែងមួយចំនួនធំរបស់លោក ដែលមានស្រាប់ ក្នុងតំណែងទាំងនោះ រួមមានជាអនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាប្រធានសហព័ន្ធស្រូវអង្ករកម្ពុជា។ មន្ត្រីរាជរដ្ឋាភិបាលកម្ពុជា បានអះអាងថាការតែងតាំងលោក សុខ ពុទ្ធិវុធ គឺដើម្បីពង្រឹង និងពង្រីកការងារអាជីវកម្មក្នុងទីផ្សារ ប្រកួតប្រជែង និងបន្តអភិវឌ្ឍន៍វិស័យទូរគមនាគមន៍នៅកម្ពុជា។
លោក ពុទ្ធិវុធ បានលើកឡើងថា៖ ចង្កោមរបស់ ICT គឺជាអ្វីមួយដែលនឹងនាំមនុស្សចូលរួមកាន់តែច្រើនចែករំលែកទស្សនៈរបស់ពួកគេ និងចែករំលែកអ្វីដែលពួកគេចង់បានដើម្បីមើលការរីកចម្រើនរបស់កម្ពុជា និងរៀបចំសម្រាប់ពេលអនាគត។
លោក សុខ ពុទ្ធិវុធ កើតក្នុងឆ្នាំ១៩៨០ ជាកូនប្រុសម្នាក់ក្នុងចំណោមកូន ៥នាក់ របស់សម្តេច សុខ អាន។ លោកបានរៀបការជាមួយកូនស្រីពៅរបស់សម្តេច ហ៊ុន សែន គឺអ្នកស្រី ហ៊ុន ម៉ាលី។
សូមជម្រាបថាទូរគមនាគមន៍កម្ពុជា (Telecom Cambodia) គឺជាក្រុមហ៊ុនរបស់រដ្ឋ ដែលត្រូវបានបង្កើតឡើងកាលពីឆ្នាំ២០០៥ ដើម្បីធ្វើប្រតិបត្តិការបណ្តាញ និងផ្តល់សេវាកម្មទូរគមនាគមន៍ដ៏ទូលំទូលាយ ទាំងនៅក្នុង និងនៅក្រៅប្រទេស និងចូលរួមចំណែកអភិវឌ្ឍន៍ហេដ្ឋារចនាសម្ព័ន្ធទូរគមនាគមន៍ និងបច្ចេកវិទ្យាព័ត៌មានវិទ្យានៅកម្ពុជា។ ក្រុមហ៊ុនរដ្ឋមួយនេះ នៅតែមិនទាន់អាចដាក់បញ្ចូលទៅក្នុងបញ្ជីដាក់លក់ទីផ្សារមូលបត្រកម្ពុជា (CSX) ដូចក្រុមហ៊ុនរដ្ឋដទៃទៀតបាននៅឡើយទេ រហូតមកទល់សព្វថ្ងៃនេះ។
