Sunday, April 15, 2018

គួរឲ្យអនិច្ចាជាពន់ពេក ៤នាក់ស្លាប់ព្រមគ្នា ទាំងគ្មានខ្យល់ដកដង្ហើម...!

អាម៉ាប៉ាប៉ាញ៉ូស

កំពង់ចាមៈ គួរឲ្យអនិច្ចា និងអាណិតដល់ស្ត្រីម្នាក់ រួមទាំងក្មេងប្រុសស្រី៣នាក់ទៀត បានស្លាប់បាត់បង់ជីវិត ក្រោយនាំគ្នាទៅលេងទឹក បង្កការភ្ញាក់ផ្អើលកាលពីវេលាម៉ោង៦ ថ្ងៃសៅរ៍ ១៤រោច ខែចេត្រ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៤ ខែមេសា ឆ្នាំ២០១៨ នៅចំណុចក្បាលកោះ ទល់មុខភូមិពាមជីកង​ ឃុំពាមជីកង ស្រុកកងមាស ខេត្តកំពង់ចាម។

បើតាមសមត្ថកិច្ចនគរបាលបានបញ្ជាក់ឲ្យដឹងថា ជនរងគ្រោះដែលស្លាប់បាត់បងជីវិត ទី១-ឈ្មោះ ស្លេះ ហាសាណាស់ ភេទស្រី អាយុ៣៥ឆ្នាំ ជនជាតិខ្មែរអ៊ិស្លាម ទី២-ឈ្មោះ អាណាហ្វុី អាហ៊្វណាហ៊ីម ភេទប្រុស អាយុ១២ឆ្នាំ ជនជាតិខ្មែរអ៊ិស្លាម ទី៣-ឈ្មោះអាណាហ្វុី សារីរ៉ា ភេទស្រី អាយុ៥ឆ្នាំ ជនជាតិខ្មែរអ៊ិស្លាម និងទី៤-ឈ្មោះ ជុក ឧស្មាន​ ភេទស្រី អាយុ៨ឆ្នាំ ជនជាតិខ្មែរអ៊ិស្លាម។ អ្នកទាំង៤នាក់នេះ មានទីលំនៅក្នុងភូមិសាច់សូរ ឃុំពាមជីកង​ ស្រុកកងមាស ខេត្តកំពង់ចាម។

ប្រភពព័ត៌មានបានឲ្យដឹងបន្ថែមថា បន្ទាប់ពីទទួលបានដំណឹងពីករណីខាងលើភ្លាម សមត្ថកិច្ចបានចុះជួយសង្គ្រោះ និងរាវរកស្រង់បានសាកសព៣នាក់។ ដោយឡែកសាកសពម្នាក់ទៀតឈ្មោះ អាណាហ្វីុ អាហ្វីុណាហ៊ីម អាយុ១២ឆ្នាំ គឺទើបតែរាវរកឃើញ កាលពីវេលាម៉ោង៩ព្រឹក ថ្ងៃទី១៥ ខែមេសានេះ។

ទាក់ទិននឹងករណីដ៏គួរឲ្យសង្វេកនេះ សមត្ថកិច្ចបានចុះទៅធ្វើការពិនិត្យ និងស្រាវជ្រាវ ហើយបានបញ្ជាក់ថា ជនរងគ្រោះទាំង៤នាក់ខាងលើ គឺស្លាប់បាត់បង់ជីវិតដោយសារលង់ទឹកពិតប្រាកដមែន មិនមានស្លាកស្នាមអ្វីពាក់ព័ន្ធករណីផ្សេងនោះឡើយ។ ក្រោយពិនិត្យរួច សាកសពជនរងគ្រោះត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕

@Amapapa.News