ភ្នំពេញៈ តារាចម្រៀង មាស សុខសោភា ត្រូវបានគេចាត់ទុកថា ជាតារាចម្រៀងស្រីល្បីឈ្មោះដែលលេចធ្លោខ្លាំងជាមួយនឹងការតុបតែងខ្លួន ពិសេសការប្រើប្រាស់សម្លៀកបំពាក់ថ្មីប្លែក ហើយពេលខ្លះនាងបានបញ្ចេញភាពសិចស៊ីដ៏គួរឲ្យទាក់ទាញ។ អ្នកគ្រប់គ្រងនាងធ្លាប់បានលើកឡើងថា មាស សុខសោភា បានចំណាយលើកការតុបតែងខ្លួន ពិសេសសម្លៀកបំពាក់អស់ខ្ទង់រាប់ម៉ឺនដុល្លារអាមេរិកក្នុងមួយឆ្នាំៗ ទើបធ្វើឲ្យសម្លៀកបំពាក់នាងកាន់តែប្លែកគួរចាប់អារម្មណ៍។
ចាប់តាំងពីដើមឆ្នាំមក មាស សុខសោភា នៅតែបន្តរក្សាបានតំណែងជាតារាចម្រៀងស្រីលំដាប់ជួរមុខដដែល។ កាន់តែមានឈ្មោះបោះសំឡេងខ្លាំងតារាស្រីរូបនេះ កាន់តែបង្ហាញភាពសិចស៊ីប្លែកលើសអស់តារាចម្រៀងស្រីល្បីឈ្មោះនានា។ បើទោះបីជាការស្លៀកពាក់សិចស៊ី របស់សិល្បករខ្មែរនៅតែជាប្រធាបទរបស់មហាជន ក៏សន្ទុះការរិះគន់មានសភាពថមថយច្រើនជាងមុន។
មាស សុខសោភា ធ្លាប់លើកឡើងថា នាងមិនមែនមិនធ្លាប់សម្ញែងដើមទ្រូង ឬភាពសិចស៊ីនោះទេ តែអ្វីដែលនាងរៀបចំរំលេចឡើង គឺមានកម្រិតមិនអាចលើសពីភ្នែកអ្នកដទៃ ព្រោះនាងគិត និងប្រយ័ត្នណាស់មុននឹងថតរូបបង្ហោះ។
ការប្រលែង ឈុតសិចស៊ីជាច្រើនក៏គេតែងឃើញនាងស្លៀកពាក់ចូលរួមកម្មវិធីច្រៀងរាំលើឆាកតន្ត្រីតាមក្លឹបកម្សាន្តនានាផងដែរ។ នាងក៏ត្រូវបានគេកោតសរសើរ គ្រាដែលនាងចូលរួមសម្តែង និងច្រៀងក្នុងបទចម្រៀងមនោសញ្ចេតនា និងប្រជាប្រិយដែលស្ថិតក្នុងសម្លៀកបំពាក់ប្រពៃណីខ្មែរនោះ៕
