Friday, May 25, 2018

សមត្ថកិច្ចចាប់ខ្លួនជនសង្ស័យ៣នាក់ ក្រោយជិះម៉ូតូចុះឡើង និងឆែករកឃើញឧបករណ៍ប្រព្រឹត្តិបទល្មើល

អាម៉ាប៉ាប៉ាញ៉ូស

ភ្នំពេញៈ ជនសង្ស័យ​៣នាក់ ត្រូវបានកម្លាំងសមត្ថកិច្ចប៉ុស្តិ៍ទំនប់​ទឹកឃាត់ខ្លួន បន្ទាប់ពីពួកគេជិះម៉ូតូ​ធំ​ឌុបគ្នាចុះ​ឡើងៗ​ ហើយសមត្ថកិច្ចសង្ស័យ ក៏​ជិះ​ម៉ូតូ​ដេញ​តាម​​សុំ​ធ្វើ​ការត្រួត​ពិនិត្យ​ ហើយពួកគេបម្រុងជិះ​គេចខ្លួន​ និងដកហូតឧបករណ៍​សម្រាប់​កាច់.ក​ម៉ូតូ ​និង​ឆ្កឹះ​សោរ​១​ឈុត​។

ការឃាត់ខ្លួ​ន​នេះ​ សមត្ថកិច្ចធ្វើ​ឡើង​កាលពីវេលាម៉ោង​១យប់​ រំលង​អធ្រាត្រ ​ឈាន​ចូលថ្ងៃពុធ ៩កើត ខែជេស្ឋ ឆ្នាំច សំរឹទ្ធិស័ក ព.ស.២៥៦៧ ត្រូវនឹងថ្ងៃទី​២៣​ ខែ​ឧសភា​ ឆ្នាំ​២០១៨​ ត្រង់ចំណុចទល់មុខ​ផ្ទះ​លេខ​៦D ផ្លូវលេខ៤០២​ សង្កាត់​ទំនប់ទឹក​ ខណ្ឌចំការមន​ រាជធានីភ្នំពេញ​។

ជនសង្ស័យ​ដែល​​សមត្ថកិច្ច​ឃាត់ខ្លួនទី១.ឈ្មោះ​ ជា​ ហេង ភេទប្រុស អាយុ៣៣ឆ្នាំ មុខរបរអូសបន្លែនៅផ្សារដើមគរ ស្នាក់នៅផ្សាដើមគរ ទី២.ឈ្មោះ សួស​ រ៉េត ភេទប្រុស អាយុ២៩ឆ្នាំ មុខរបរអូសបន្លែ នៅផ្សារដើមគរ ស្នាក់នៅខាងក្រោយមន្ទីរពេទ្យរុស្សុី និងទី៣.ឈ្មោះ សំរឹត ទូ ភេទប្រុស​ អាយុ៣២ឆ្នាំ មុខ​របរមិនពិតប្រាកដ ស្នាក់នៅសង្កាត់ផ្សារដើមថ្កូវ​ ខណ្ឌចំការមន។

ជាមួយគ្នានោះ សមត្ថកិច្ចបានដកហូតឧបករណ៍​សម្រាប់​កាច់ក​ម៉ូតូ​ និង​ឆ្កឹះ​សោរ​ ១ឈុត​ និង​ម៉ូតូ​១គ្រឿង ម៉ាក​ YAMAHA FZ ពណ៌ស​ ពាក់ស្លាកលេខ ​ភ្នំពេញ​ 1BA-1128។

តាមសម្តី​លោក​ ផន​ សំអូន​ មេប៉ុស្តិនគរបាល​ទំនប់​ទឹក​បានឲ្យដឹងថា​ មុន​ឈាន​​ដល់ឃាត់ខ្លួន​ជនសង្ស័យខាងលើ គឺ​កម្លាំង​សមត្ថកិច្ច​របស់​លោក​ បាន​ជិះ​ល្បាត​ក្នុង​មូលដ្ឋាន​ ដើម្បី​ទប់ស្កាត់​បទល្មើស​ផ្សេងៗ​ និង​ការពារ​សុវត្ថិ​ភាព​ជូន​ប្រជាពលរដ្ឋ។​ ខណៈមកដល់​ផ្លូវលេខ៤៣០​ ក្រោយ​មន្ទី​រពេទ្យ​មិត្តភាព ខ្មែរ​-សូវៀត​ ស្រាប់​តែប្រទះឃើញជនសង្ស័យទាំង​៣នាក់​ខាង​លើ​ ជិះម៉ូតូ​ធំ​ឌុបគ្នា​ចុះ​ឡើងក្នុងសភាពខុសប្រក្រតី។ ដោយមាន​ការសង្ស័យ​ កម្លាំងក៏បាន​ជិះ​ម៉ូតូ​ដេញ​តាមដើម្បី​សុំ​ធ្វើ​ការ​ត្រួត​ពិនិត្យ​ តែពួកគេទាំង៣នាក់បម្រុង​ជិះគេចខ្លួន​ ក៏ត្រូវ​សមត្ថកិច្ច​ឃាត់ខ្លួន​បាន​ ឆែកឆេររក​ឃើញឧបករណ៍ពាក់ព័ន្ធបទល្មើស ទើប​នាំខ្លួនយក​ទៅសួរនាំ​តែ​ម្តង។

បច្ចុប្បន្ន ជនសង្ស័យ​ទាំង​៣នាក់​ ត្រូវបានសមត្ថកិច្ច​កសាងសំណុំរឿង​ បញ្ជូនទៅអធិការដ្ឋាននគរបាលខណ្ឌ​ចំការមន ​ដើម្បី​ចាត់ការ​តាម​នីតិវិធី​៕

@Amapapa.News

Feature Ads