ព្រះសីហនុៈ មេបញ្ជាការរងស្រុកព្រៃនប់ម្នាក់ ត្រូវបានគេជួយសង្គ្រោះអាយុជីវិត ដោយការដឹកបញ្ជូនមកកាន់មន្ទីរពេទ្យនៅរាជធានីភ្នំពេញ បន្ទាប់ពីជួបគ្រោះថ្នាក់ចរាចរណ៍ កាលពីព្រឹកមិញ នៅក្នុងខេត្តព្រះសីហនុ។
ភ្នាក់ងារអង្គភាពសារព័ត៌មាន CAM POST ប្រចាំខេត្តព្រះសីហនុ លោក ធឿន ស៊ុបព្រី បានរាយការណ៍មកថា មន្រ្តីកងរាជអាវុធហត្ថម្នាក់ បានរងរបួសធ្ងន់ ត្រូវបានគេជួយសង្គ្រោះ ចំណែកម្នាក់ទៀត បាត់បង់ជីវិតនៅកន្លែងកើតហេតុ ក្រោយពីរថយន្តស្រាបៀរ TUBORG បុកជាមួយរថយន្តបាឡែន កាលពីម៉ោង១១ព្រឹកថ្ងៃទី២១ ខែឧសភា ឆ្នាំ២០១៨ នៅតាមបណ្ដោយផ្លូវជាតិលេខ៤ ស្ថិតក្នុងភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ។
លោក ស៊ុបព្រី បានដកស្រង់សមត្ថកិច្ចថា គ្រោះថ្នាក់ចរាចរណ៍នេះ បង្កឡើងរវាងរថយន្តធុនធំម៉ាកដេវ៉ូ ពាក់ស្លាកលេខភ្នំពេញ 3D-2056 ដឹកស្រាបៀរ TUBORG បើកបរតាមបណ្ដោយផ្លូវជាតិលេខ៤ ក្នុងទិសដៅពីកំពង់សោមមកភ្នំពេញ មកដល់ចំណុចកើតហេតុ ក៏បានបុកជាមួយរថយន្តបាឡែន ពាក់ស្លាកលេខភ្នំពេញ 2T-2534 ដែលបញ្ច្រាសទិសគ្នាពេញទំហឹង បណ្ដាលឲ្យមនុស្សគៀបស្លាប់នៅក្នុងរថយន្ត ចំណែកមន្រ្តីកងរាជអាវុធហត្ថរងរបួសធ្ងន់។
តាមសេចក្តីរាយការណ៍ចុងក្រោយ នៅម៉ោង១រសៀលនេះ មន្រ្តីកងរាជអាវុធដែលរងរបួសធ្ងន់ ហើយត្រូវបានគេបញ្ជូនមកសង្គ្រោះនៅភ្នំពេញនោះ ពេលនេះបានបាត់ជីវិតតាមផ្លូវហើយ ដោយសារតែស្ថានភាពរបួសធ្ងន់ធ្ងរពេក។ ទោះជាបែបណា គេមិនទាន់ស្គាល់អត្តសញ្ញាណជនរងគ្រោះទាំងពីរនាក់ និងអ្នកបើកបរម្ខាងទៀតឡើយ។
ក្រោយកើតហេតុ គេបានឃើញវត្តមានសមត្ថកិច្ចជាច្រើនចុះទៅកាន់ទីនោះ ដើម្បីជួយអន្តរាគមន៍ និងបញ្ចៀសការកកស្ទះចរាចរណ៍ ចំណែករថយន្តទាំង២គ្រឿង ក៏ត្រូវបានបញ្ជូនយកទៅរក្សាទុកនៅអធិការដ្ឋាននគរបាលស្រុកព្រៃនប់ផងដែរ៕
