ភ្នំពេញៈ ជនសង្ស័យម្នាក់ត្រូវបានសមត្ថកិច្ចខណ្ឌឫស្សីកែវធ្វើការឃាត់ខ្លួន ក្រោយធ្វើសកម្មភាពលួចកាច់សោរកម៉ូតូ នៅចំណុចមុខផ្ទះលេខ១៧ជ ផ្លូវបេតុង ក្រុម០៣ ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ កាលពីវេលាម៉ោង ២០និង០០នាទី ថ្ងៃទី១៧ ខែមិថុនា ឆ្នាំ២០១៨។
ប្រភពពីសមត្ថកិច្ច អោយដឹងថា ជនសង្ស័យមានឈ្មោះ ចាន់ រ័ត្ន ហៅអារ័ត្ន ភេទប្រុស អាយុ២០ឆ្នាំ ស្នាក់នៅផ្ទះជួលសង្កាត់ភ្នំពេញថ្មី ខណ្ឌសែនសុខ មុខរបរមិនពិតប្រាកដ។ ចំណែកជនរងគ្រោះឈ្មោះ សូ លីនណា ភេទស្រី អាយុ២២ឆ្នាំ មានទីលំនៅផ្ទះលេខ ៤០អឺ ផ្លូវលេខ ២១កា ភូមិចំការឪឡឹក សង្កាត់កាកាប ខណ្ឌពោធិ៍សែនជ័យ មុខរបរលក់ដូរ។ ម៉ូតូជនរងគ្រោះម៉ាក ស្កុបពី ពណ៌ស សេរីឆ្នាំ២០១១ ពាក់ស្លាកលេខ 1AS-5553 លេខតួ 8001425។
សមត្ថកិច្ចបន្តថា វត្ថុតាងដកហូតបានរួមមាន ម៉ូតូ១គ្រឿងម៉ាក ស្កុបពី ពណ៌ស សេរីឆ្នាំ២០១១ ពាក់ស្លាក់លេខ ភ្នំពេញ 1AS-5553 ដែកសំប៉ែតកែច្នៃ១ និងសោរចញ្ចៀនលេខ៨ចំនួន០១ សំរាប់ធ្វើសកម្មភាពកាច់សោរកម៉ូតូ។
បច្ចុប្បន្ន ជនសង្ស័យ រួមនឹងវត្ថុតាង សមត្ថកិច្ចកំពុងធ្វើការសាកសួរស្រាវជ្រាវរកបក្សពួក និងកសាងសំណុំរឿងបញ្ចូនទៅសាលាដំបូងរាជធានីភ្នំពេញ ដើម្បីអនុវត្តតាមនីតិវិធី៕