ភ្នំពេញៈ ក្រោយសារព័ត៌មានក្នុងស្រុកមួយចំនួនបានចេញផ្សាយ កាលពីរសៀលថ្ងៃទី១៣ ខែមិថុនា ឆ្នាំ២០១៨ម្សិលមិញ ករណីនៃការបែកធ្លាយរឿងលោក តាន់ សុភ័ក្ត្រ មន្ត្រីការិយាល័យអន្តរវិស័យខណ្ឌឫស្សីកែវ ដែលបានលួចរត់ការក្រៅប្រព័ន្ធច្បាប់ ក្នុងការស្នើសុំលិខិតអនុញ្ញាសាងសង់សំណង់លំនៅដ្ឋាន ភូមិគ្រិះដ៏ធំស្កឹមស្កៃមួយកន្លែង ស្ថិតនៅទល់មុខសំណង់លំនៅដ្ឋានសម្បត្តិមាស «SM» ជាប់ផ្លូវបេតុង ក្នុងភូមិបឹងសាឡាង សង្កាត់ឬស្សីកែវ ដែលបានលួចសាងសង់រយៈពេល៣ទៅ៤ខែមកហើយ ទាំងគ្មានលិខិតអនុញ្ញាតត្រឹមត្រូវ ពីសាលារាជធានីភ្នំពេញ និងទើបទទួលបានលិខិតអនុញ្ញាត ពីរដ្ឋបាលខណ្ឌថ្មីៗនេះ នៅព្រឹកថ្ងៃទី១៤ ខែមិថុនា ឆ្នាំ២០១៨នេះ មន្ត្រីការិយាល័យអន្តរវិស័យខណ្ឌ លោក តាន់ សុភ័ក្ត្រ រូបនេះ បានចេញមកបដិសេធ និងច្រានចោលទាំងស្រុង និងសូមធ្វើការបកស្រាយថាមិនមែនជាការពិតនោះទេ ហើយលោកក៍មិនបានរត់ការក្រៅប្រព័ន្ធច្បាប់ឲ្យម្ចាស់សំណង់នោះដែរ ពិសេសលោកគ្រាន់តែណែនាំឲ្យម្ចាស់សំណង់ធ្វើបែបបទតាមនិតិវិធី ក្នុងនាមជាមន្ត្រីសាធារណៈបម្រើជូនប្រជាពលរដ្ឋប៉ុណ្ណោះ។
សូមបញ្ជាក់ថា ការចេញបកស្រាយ និងច្រានចោលរបស់លោក តាន់ សុភ័ក្ត្រ មន្ត្រីការិយាល័យអន្តរវិស័យខណ្ឌ ខាងលើនេះ បានធ្វើឡើង បន្ទាប់ពីបញ្ជាដោយលោក ជា ពិសី អភិបាលខណ្ឌឬស្សីកែវ, លោក ស៊ូ សោគន្ធ ជាអភិបាលរងខណ្ឌទទួលបន្ទុកផ្នែកសំណង់ បានព្រមានចាត់វិធានការ ចំពោះសំណង់ភូមិគ្រឹះដ៏ធំស្កឹមស្កៃ មួយកន្លែងរបស់បុរសម្នាក់ឈ្មោះ លាស់ ប៊ីសេរ៉ា ជនជាតិខ្មែរឥស្លាម និងកូនប្រុសឈ្មោះ លាស់ យូរ៉ូម៉ា ជាអ្នកមើលការខុសត្រូវ ស្ថិតនៅទល់មុខសំណង់លំនៅដ្ឋានសម្បត្តិមាស «SM» ជាប់ផ្លូវបេតុង ក្នុងភូមិបឹងសាឡាង សង្កាត់ឬស្សីកែវ ដែលបានលួចសាងសង់រយៈពេល៣ទៅ៤ខែមកហើយ ទាំងគ្មានលិខិតអនុញ្ញាតត្រឹមត្រូវ ពីសាលារាជធានីភ្នំពេញ និងទើបទទួលបានលិខិតអនុញ្ញាត ពីរដ្ឋបាលខណ្ឌថ្មីៗ នេះប៉ុណ្ណោះ។
ការព្រមានចាត់វិធានការក្ដៅរបស់អាជ្ញាធរខណ្ឌឫស្សីកែវ ខាងលើនេះ បានធ្វើឡើង បន្ទាប់ពីសំណង់ភូមិគ្រឹះដ៏ធំស្កឹមស្កៃរបស់បុរសម្នាក់ឈ្មោះ លាស់ ប៊ីសេរ៉ា និងកូនប្រុសឈ្មោះ លាស់ យូរ៉ូម៉ា បាននិងកំពុងចាប់ផ្ដើមលួចស្ថាបនាបន្តទៅទៀត ដោយសារតែមានលោក តាន់ សុភ័ក្ត្រ មន្ត្រីការិយាល័យអន្តរវិស័យខណ្ឌ លួចរត់ការស្នើសុំលិខិតអនុញ្ញាតសាងសង់បន្តពីរដ្ឋបាលខណ្ឌ នៅថ្ងៃទី៥ ខែមិថុនា ឆ្នាំ២០១៨ថ្មីៗនេះ ក្រោយពីកម្លាំងមន្ត្រីការិយាល័យជំនាញខណ្ឌ ចុះត្រួតពិនិត្យហាមឃាត់ មិនព្រមស្ដាប់ជាច្រើនលើក រហូតឈានដល់ចុះផ្អាកដកហូតសម្ភារ មួយចំនួន មករក្សាទុកត្រឹមមួយដង្ហើមចង្រិតប៉ុណ្ណោះ លុះមកដល់ថ្ងៃទី១៣ ខែមិថុនា ឆ្នាំ២០១៨នេះ ដើម្បីឲ្យស្នើសុំលិខិតអនុញ្ញាតឲ្យបានត្រឹមត្រូវពីរដ្ឋបាលរាជធានីភ្នំពេញ ទើបអនុញ្ញាតឲ្យបន្តស្ថាបនាតទៅទៀតបាន។
ការបែកធ្លាយរឿងលោក តាន់ សុភ័ក្ត្រ មន្ត្រីការិយាល័យអន្តរវិស័យខណ្ឌឫស្សីកែវ បានលួចរត់ការក្រៅប្រព័ន្ធច្បាប់ ដើម្បីស្នើសុំលិខិតអនុញ្ញាសាងសង់សំណង់លំនៅដ្ឋាន ភូមិគ្រិះដ៏ធំស្កឹមស្កៃនេះដែរ បានផ្ទុះឡើងក្រោយពីលោក ស៊ូ សោគន្ធ បានដាក់បទបញ្ជាឲ្យលោក ស៊ូ សារ៉ាត់ នាយករងរដ្ឋបាលខណ្ឌ និងលោក លឹម សាម៉ឺឌី ប្រធានការិយាល័យអន្តរវិស័យខណ្ឌ ដឹកនាំមន្ត្រីក្រុមការងារជំនាញ ពាក់ព័ន្ធមួយចំនួន ចុះទៅធ្វើការហាមឃាត់ផ្អាកបណ្ដោះអាសន្ន និងដកហូតសម្ភារ មួយចំនួនមករក្សាទុក ដើម្បីឲ្យធ្វើបែបបទស្នើសុំលិខិតអនុញ្ញាតឲ្យបានត្រឹមត្រូវជាមុនសិន ទើបអាចស្ថាបនាបន្តទៅទៀតបាន ស្រាប់តែបែកធ្លាយឃើញលិខិតអនុញ្ញាតឲ្យសាងសង់បន្តចុះត្រឹមថ្ងៃទី៥ ខែមិថុនា ឆ្នាំ២០១៨ប៉ុណ្ណោះ។
ទោះបីយ៉ាងណា លោក ស៊ូ សារ៉ាត់ និងលោក លឹម សាម៉ឺឌី ដែលជាអ្នកនាំដោយផ្ទាល់ក្នុងការទប់ស្កាត់ចំពោះសំណង់ធំៗ ដែលលួខសាងសង់ ទាំងគ្មានលិខិតអនុញ្ញាត បានបញ្ជាក់ផងដែរថា សំណង់ដ៏ធំស្កឹមស្កៃ របស់លោក លាស់ ប៊ីសេរ៉ា ចាំបាច់ត្រូវតែមានលិខិតអនុញ្ញាតពីរដ្ឋបាលរាជធានីភ្នំពេញ ទើបអនុញ្ញាតឲ្យសាងសង់បន្តទៅទៀតបាន ជាពិសេសកូនប្រុសរបស់លោក លាស់ ប៊ីសេរ៉ា លោក លាស់ យូរ៉ូម៉ា ជាអ្នកមើលការខុសត្រូវ ឬជាងសំណង់នៅតែបន្តការសាងសង់ ទាំងមិនមានលិខិតអនុញ្ញាតនោះ រដ្ឋបាលខណ្ឌ នឹងចាត់វិធានការរដ្ឋបាល ដកហូតយកសម្ភារ ឧបករណ៍សំណង់មករក្សាទុក ដោយមិនទទួលខុសត្រូវលើការខូចខាត ឬបាត់បង់អ្វីឡើយ និងរាល់ហានិភ័យដែលកើតឡើង ដោយគ្រោះថ្នាក់ពលកម្ម ការបាក់ស្រុត ដួលរលំសំណង់ អាចបង្កជាគ្រោះថ្នាក់ផ្សេងៗ ខូចខាតទ្រព្យសម្បត្តិអ្នកដទៃ នោះលោក-លោកស្រី ជាម្ចាស់សំណង់ ឬជាងសំណង់ ដាច់ខាតទទួលខុសត្រូវទាំងស្រុងចំពោះមុខច្បាប់ ជាធរមាន។
លោកបន្តថា ការណែនាំនេះ ដើម្បីអនុវត្តឲ្យមានប្រសិទ្ធភាព ទៅតាមអនុក្រឹត្យលេខ៨៦ អនក្រ.បក ចុះថ្ងៃទី១៩ ខែធ្នូ ឆ្នាំ១៩៩៧ របស់រាជរដ្ឋាភិបាលកម្ពុជា ស្ដីពីលិខិតអនុញ្ញាតសាងសង់ និងសេចក្ដីណែនាំរបស់រដ្ឋបាលរាជធានីភ្នំពេញ រួមនិងបទដ្ឋានរបស់ស្ថាប័នជំនាញ រៀបចំដែនដីនគរូបនីយកម្ម និងសំណង់របស់លោក-លោកស្រីជាម្ចាស់សំណង់ ឬជាងសំណង់ ត្រូវផ្អាកការសាងសង់ជាបណ្ដោះអាសន្ន ហើយបំពេញបែបបទស្នើសុំលិខិតអនុញ្ញាតសាងសង់ពីក្រសួងរៀបចំដែនដី នគរូបនីយកម្ម និងសំណង់ ឬរដ្ឋបាលរាជធានីភ្នំពេញ រដ្ឋបាលខណ្ឌ ហើយរង់ចាំរហូតទទួលបានលិខិតអនុញ្ញាត និងលិខិតបើកការដ្ឋាន ទើបអាចបន្តការសាងសង់តទៅទៀតបាន។
គួររំឭកផងដែរថា លោក ជា ពិសី កន្លងមកបានអំពាវនាវឲ្យប្រជាពលរដ្ឋ ក្នុងនាមជាម្ចាស់សំណង់ធំៗ គ្រប់ប្រភេទ ដូចជា៖ បុរី, ខន់ដូរ, សណ្ឋាគារ, ផ្ទះសំណាក់ ឬបុកគ្រឹះសាងសង់ផ្ទះតូច-ធំ នៅទូទាំងខណ្ឌទាំងអស់ ចាំបាច់ត្រូវតែរៀបចំធ្វើបែបបទស្នើសុំលិខិតអនុញ្ញាតឲ្យបានត្រឹមត្រូវតាមលក្ខណៈបច្ចេកទេសជាមុនសិន ព្រោះនៅពេលដែលមន្ត្រីក្រុមការងារជំនាញចុះត្រួតពិនិត្យជាក់ស្ដែង តាមសំណង់នីមួយៗរបស់លោក-លោកស្រី ឃើញថា មួយចំនួនមិនមានច្បាប់ និងមួយចំនួនមានច្បាប់អនុញ្ញាតសាងសង់ត្រឹមតែសាលាសង្កាត់ និងមួយចំនួនទៀតមានត្រឹមខណ្ឌ មិនមានដល់រដ្ឋបាលរាជធានីភ្នំពេញនោះទេ។
លោក ជា ពិសី បានបញ្ជាក់ថា ពិសេសសូមឲ្យមន្ត្រីថ្នាក់ក្រោមទាំងអស់ រាប់ចាប់ពីថ្នាក់ភូមិ-សង្កាត់-ខណ្ឌ គួរតែរៀបចំអនុវត្តគោលការណ៍ ឆ្លុះកញ្ចក់ ងូតទឹក ដុះក្អែល និងព្យាបាលខ្លួនយើងឲ្យស្អាត ក្នុងការយកចិត្តទុកដាក់ឲ្យបានខ្ពស់ ដើម្បីផ្ដល់សេវាសាធារណៈឲ្យបានល្អប្រសើរ ជូនប្រជាពលរដ្ឋ តាមរយះការិយាល័យច្រកចេញ-ចូលតែមួយ របស់រដ្ឋបាលខណ្ឌ ដើម្បីជៀសវាងបាននូវការរិះគន់ផ្សេងៗ ពីក្រៅប្រព័ន្ធច្បាប់៕
