ភ្នំពេញៈ បុរសម្នាក់ស្រវឹងស្រា បើករថយន្ត CRV បោះពួយយ៉ាងលឿន រេចង្កូតទៅបុករបាំងថ្មពុះចែកទ្រូវផ្លូវពេញទំហឹង បណ្ដាលឲ្យបាក់អស់៣កង់ ហើយធ្វើឲ្យអ្នកបើកររងរបួសធ្ងន់ហូរឈាមស្រោចពេញខ្លួន។
គ្រោះថ្នាក់ចរាចរណ៍ បង្កការភ្ញាក់ផ្អើលកាលពីវេលាម៉ោង១១៖៤០នាទីយប់ថ្ងៃចន្ទ ទី១១ ខែមិថុនា ឆ្នាំ២០១៨ ត្រង់ចំណុចខាងជើងរង្វង់មូលព្រះនរាយណ៍ ស្ថិតតាមបណ្តោយផ្លូវជាតិលេខ២ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
អ្នកឃើញហេតុការណ៍ បានឲ្យដឹងថា មុនពេលកើតហេតុ គេឃើញបុរសវ័យប្រហែល៥០ឆ្នាំម្នាក់ បើកបររថយន្តមួយគ្រឿងម៉ាក CRV ពណ៌ស្ករ ពាក់ស្លាកលេខភ្នំពេញ 2AA-9869 ដោយធ្វើដំណើរតាមបណ្តោយផ្លូវជាតិលេខ២ ក្នុងទិសដៅពីជើងទៅត្បូង ក្នុងល្បឿនលឿន លុះមកដល់ចំណុចកើតហេតុ បានរេចង្កូតទៅបុកទ្រូងផ្លូវពេញទំហឹង បណ្តាលឲ្យរថយន្តរងការខូចខាតផ្នែកខាងមុខយ៉ាងដំណំ ហើយអ្នកបើកបរថយន្ត រងរបួសធ្ងន់ផុសថ្ងាស និងប្រកែកទាំងស្រវឹងស្រាថា មិនព្រមទៅមន្ទីរពេទ្យទេ ដោយសារប្រជាពលរដ្ឋឃើញហូរឈាមច្រើនពេក ទើបនាំគ្នាចាប់លើកឡើងរថយន្តគិលានសង្គ្រោះគ្លីនិកឯកជនសុខលាភមេត្រី ដឹកយកទៅមន្ទីរពេទ្យផងដែរ។
សមត្ថកិច្ចប៉ុស្តិ៍ចាក់អង្រែក្រោម បានប្រាប់ឲ្យភ្នាក់ងារ CAM POST ដឹងថា បុរសជាអ្នកបើកបររថយន្តឈ្មោះ វ៉ា ស៊ីណារ៉ុង ស្នាក់នៅផ្ទះលេខ៥៦Eo ផ្លូវលេខ១ ភូមិ២ សង្កាត់ចតុមុខ ខណ្ឌដូនពេញ ភ្នំពេញ និងមានស្រុកកំណើតនៅស្រុកព្រៃឈរ ខេត្តកំពង់ចាម។
ក្រោយពេលកើតហេតុសមត្ថកិច្ចមូលដ្ឋានបានទាក់ទងទៅសមត្ថកិច្ចជំនាញផ្នែកចរាចរណ៍ខណ្ឌមានជ័យ ឲ្យចុះមកធ្វើការវាស់វែងស្ទូចយករង់ចាំធ្វើការដោះស្រាយគ្នានៅពេលក្រោយ៕