Friday, July 20, 2018

ឡិចស៊ីស៤៧០ ហោះទុំលើទ្រូងផ្លូវទៅមុខលែងរួច សង្ស័យ​អ្នកបើកបរស្រវឹង

ពិសី

ភ្នំពេញៈ បុរសម្នាក់ទំនងស្រវឹងស្រា បាន​បើករថយន្តឡិចស៊ីស៤៧០ ក្នុងល្បឿនលឿនជ្រុលទៅបុកក្បាលថ្មពុះចែកទ្រូងផ្លូវ បណ្ដាលឲ្យ​ខូចខាតអស់ចំនួន៣កង់ ចំណែករថយន្តគល់ជាប់បើកទៅមុខលែងរួច។

ហេតុការណ៍នេះ បានកើតឡើងនៅវេលាម៉ោង៩នឹង៥០នាទីយប់ថ្ងៃទី១៩ ខែកក្កដា ឆ្នាំ២០១៨ តាមបណ្ដោយផ្លូវព្រះមុន្នីរ៉េត (ទល់មុខផ្សារស៊ីធីម៉ល ) ក្នុងសង្កាត់វាលវង់ ខណ្ឌ៧មករា រាជធានីភ្នំពេញ។

អ្នកឃើញហេតុការណ៍ បានឲ្យ​ដឹងថា មុនពេលកើតហេតុ គេបានឃើញរថយន្តមួយគ្រឿងម៉ាក ឡិចស៊ីស៤៧០ ពណ៌ខ្មៅ ពាក់ស្លាក់លេខ ភ្នំពេញ 2S-5499 បើកបរដោយបុរសម្នាក់ទំនងជាស្រវឹង បើកក្នុងល្បឿនលឿន ទិសដៅពីកើតទៅលិចដល់ចំណុចកើតហេតុ ក៏រេចង្កូតទៅបុកក្បាលថ្មពុះចែកទ្រូងផ្លូវអស់ចំនួន១កង់ ហើយបានព្យាយាមបើកទៅមុខទៀត ខណៈ ដែលរថយន្តបែកកង់ខាងឆ្វេង ក៏រេទៅបុកទ្រូងផ្លូវម្តងទៀតអស់ចំនួន២កង់ថែមទៀត ធ្វើឲ្យ​រថយន្តដាច់កាឡេកង់ខាងមុខខាងឆ្វេងអស់១ និងគល់ជាប់ពាក់កណ្ដាលទ្រូងផ្លូវបើកទៅមុខលែងរួចតែម្ដង។

ក្រោយកើតហេតុម្ចាស់រថយន្ដបានគេចចេញពីកន្លែងកើតហេតុបាត់ស្រមោលបន្សល់ទុករថយន្ដនៅកន្លែងកើតហេតុ ក្រោយមកទើបសមត្ថកិច្ចជំនាញចរាចរណ៍ជើងគោក បានចុះមកដល់កន្លែងកើតហេតុ ដើម្បីវាស់វែងស្ទួចរថយន្តយកទៅរក្សាទុកនៅការិយាចរាចរណ៍រាជធានីភ្នំពេញ រង់ចាំដោះស្រាយតាមនីតិវិធីផ្លូវច្បាប់នៅពេលក្រោយ៕

@Amapapa.News

Feature Ads