ភ្នំពេញៈ ចោរប្រដាប់អាវុធ ២នាក់ ជិះម៉ូតូមួយគ្រឿង បានធ្វើសកម្មភាពដកកាំភ្លើងបាញ់មួយគ្រាប់ ប្លន់យកម៉ូតូមួយគ្រឿងពីយុវជនម្នាក់ រួចជិះគេចខ្លួនបាត់ដោយសុវត្ថិភាព ខណៈកម្លាំងសមត្ថកិច្ចមូលដ្ឋាន ទាំងអាវុធហត្ថ និងនគរបាល ភ្លេចខ្លួន មិនបានចេញល្បាតដិតដល់។
ករណីបាញ់ប្លន់នេះ បានកើតឡើងកាលពីវេលាម៉ោង២រំលងអធ្រាត្រឈានចូលថ្ងៃទី៣០ ខែសីហា ឆ្នាំ២០១៨ ស្ថិតនៅចំណុចខាងកើតប៉ុស្តិ៍២៤ ប្រមាណជា២០ម៉ែត្រ តាមបណ្តោយផ្លូវវេងស្រេង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះឈ្មោះ ស៊ុន សុផាន់ណា ភេទប្រុស អាយុ២០ឆ្នាំ មានស្រុកកំណើតនៅស្រុកកៀនស្វាយ ខេត្តកណ្ដាល បានរៀបរាប់ប្រាប់ភ្នាក់ងារ CAM POST ថា មុនពេលកើតហេតុ រូបគេបានជិះម៉ូតូហុងដា សេ១២៥ សេរី២០១៧ ពណ៌ខ្មៅ ពាក់ស្លាក0437 ធ្វើដំណើរពីលិចមកកើត លុះមកដល់ចំណុចកើតខាងលើ ស្រាប់តែមានជនសង្ស័យ២នាក់ ជិះម៉ូតូមួយគ្រឿង មិនចាំម៉ាកតាមមកពីក្រោយ រួចដកកាំភ្លើងភ្ជង់ ព្រមទាំងបាញ់គំរាមមួយគ្រាប់ ប្លន់យកម៉ូតូ ហើយជិះគេចខ្លួនបាត់ដោយសុវត្ថិភាពតែម្ដង។
ក្រោយកើតហេតុជនរងគ្រោះបានទៅប៉ុស្តិ៍ចោមចៅ១ ទាំងទឹកមុខស្រងូតស្រងាត់ និងគ្មានសង្ឃឹមបន្តិចឡើយ ក្នុងការដាក់ពាក្យបណ្ដឹងឲ្យសមត្ថកិច្ចជួយស្រាវជ្រាវ និងឈានទៅដល់កំណត់មុខសញ្ញាចាប់យកមកផ្ដន្ទាទោសទៅតាមផ្លូវច្បាប់៕
