ត្បូងឃ្មុំៈ បុរស២នាក់ ដែលជាអ្នកជិតខាង បានផឹកស៊ីជាមួយគ្នា ទាស់ពាក្យសម្ដីបន្តិចបន្តួតទាញដាវ កាប់ប្រហារទៅលើភាគីម្ខាងទៀត សន្លប់បាត់ស្មារតីក្នុងថ្លុកឈាម បណ្ដាលឲ្យរងរបួសធ្ងន់ ស្ទើរអស់ជីវិត កាលពីថ្ងៃទី៧ ខែសីហា ឆ្នាំ២០១៨ វេលាម៉ោង១៖៣០នាទី នៅត្រង់ចំណុចភូមិរំចេក ឃុំរំចេក ស្រុកមេមត់ ខេត្តត្បូងឃ្មុំ ។
សមត្ថកិច្ចបានឲ្យដឹងថា ជនបង្កមានឈ្មោះ ស៊ឹម វ៉ាត ភេទប្រុស អាយុ៣៤ឆ្នាំ ជនជាតិខ្មែរ នៅភូមិ-ឃុំកើតហេតុខាងលើ បានយកដាវមុខមុតស្រួច កាប់ទៅលើជនរងគ្រោះឈ្មោះ ឃុន ខាន ភេទប្រុស អាយុ២៦ឆ្នាំ ជនជាតិខ្មែរ រស់នៅភូមិឃុំជាមួយគ្នា សន្លប់បាត់ស្មារតីក្នុងថ្លុកឈាមបណ្ដាលឲ្យរងរបួសធ្ងន់ ចំណែកជនសង្ស័យបានរួចរត់គចេកខ្លួនបាត់ ដោយបន្សល់ទុកដាវ ១ដើមនៅកន្លែងកើតហេតុ នេះបើតាមការផ្តល់ព័ត៌មានពីលោកមេភូមិរំចេក ។
ក្រោយពីទទួលបានព័ត៌មានភ្លាម កម្លាំងប៉ុស្តិ៍នគរបាលរដ្ឋបាលរំចេក បានចុះទៅដល់កន្លែងកើតហេតុ ដោយធ្វើការពិនិត្យ និងបន្តធ្វើការស្រាវជ្រាស្វែងរកចាប់ខ្លួនជនល្មើស រហូតដល់ម៉ោង៦៖៣០នាទី ថ្ងៃខែឆ្នាំដដែល កម្លាំងយើងបានឃាត់ខ្លួនជនសង្ស័យ នៅចំណុចវាលស្រែស្ថិតនៅភូមិមេសរ ឃុំទឹកជ្រៅ ស្រុកតំបែរ ខេត្តត្បូងឃ្មុំ ដោយមានការសហការជាមួយសហការជាមួយកម្លាំងប៉ុស្តិ៍នគរបាលរដ្ឋបាលទឹកជ្រៅ និងកម្លាំងប្រជាការពារឃុំទឹកជ្រៅ នៅចំណុចវាលស្រែលើផ្លូវលំ ស្ថិតក្នុងភូមិមេសរ ឃុំទឹកជ្រៅ ស្រុកតំបែរ ខេត្តត្បូងឃ្មុំ ហើយបញ្ជូនមកអធិការដ្ឋាននគរបាលស្រុកមេមត់ ធ្វើការសាកសួរដើម្បីកសាងសុំណុំរឿង ។
បច្ចុប្បន្ន ជនល្មើសឈ្មោះ ស៊ឹម វ៉ាត ត្រូវបានកម្លាំងនគរបាលយុត្តិធម៌ នៃអធិការដ្ឋាននគរបឡស្រុកមេមត់ កសាងសំណុំរឿង និងវត្ថុតាងដាវមុខមុតស្រួច បញ្ជូនទៅសាលាដំបូងខេត្តត្បូងឃ្មុំ ដើម្បីផ្តន្ទាទោសតាមនីតិវិធីច្បាប់៕
សូមបញ្ជាក់ជូនថា ៖ ចំពោះជនរងគ្រោះបន្ទាប់ពីរងរបួសធ្ងន់ត្រូវបានក្រុមគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកស្រុកឆ្លូង ខេត្តក្រចេះ ៕