ភ្នំពេញៈ តារាសម្ដែង លោក ហង្ស សម្បើមស័ក្ដ បានបង្ហោះសារទារលុយផលិតកម្មមហាហង្សជុំវិញថតរឿង «សង្គ្រាមមរតក» ដោយបញ្ចាំងឡើងចប់ទៅហើយ ប៉ុន្តែនៅតែមិនបានបើកលុយ ដែលសេសសល់នោះ លោក ហេង នរៈកក្កដា និងលោក អ៊ិន សុភិន ត្រូវគេឃើញថា ចេញមុខប្រតិកម្មតែម្ដង។ ទស្សនៈរបស់អ្នកទាំងពីរ បានធ្វើឲ្យម្នាក់ៗ មានការចាប់អារម្មណ៍យ៉ាងខ្លាំង ខណៈដែលស្រទាប់មហាជនកំពុងថ្លឹងថ្លែងថា ភាគីលោក ហង្ស សម្បើមស័ក្ដ ដែលប្រកាសទារលុយ គឺជាការត្រឹមត្រូវ ឬការបកស្រាយរបស់ផលិតករ និងតារាសម្ដែងទាំង២ គឺជារឿងសមស្របជាង។
លោក ហេង នរៈកក្កដា បានបង្ហោះនៅលើហ្វេសប៊ុកថា «ខ្ញុំសូមបញ្ចេញយោបល់បន្តិច សម្រាប់ខ្ញុំថតឲ្យផលិតកម្ម (មហាហង្ស) ខ្ញុំដូចជាអត់ ដែលមានបញ្ហាកើតឡើងចឹងសោះ ចុះមិចគេគ្រប់ៗគ្នា មានបញ្ហារហូតចឹង? ដូចរាល់ថ្ងៃនេះចឹង ខ្ញុំកំពុងបំពេញការងារឲ្យផលិតកម្ម (មហាហង្ស) គឺខ្ញុំកំពុងតែថតរឿង(ព្រលឹង) ខ្ញុំនិយាយដោយស្មោះត្រង់ ខ្ញុំថតឲ្យគាត់ខ្ញុំស៊ីថ្ងៃ ហើយកុងត្រាបាននិយាយថា ថតចប់បានមួយអាទិត្យបើកលុយមែន! ខ្ញុំថតចប់បានមួយអាទិត្យខ្ញុំ បានបើកលុយទាំងអស់មែន ហើយស្រួលធ្វើការជាមួយខាងពួកគាត់ទៀត.! តែមិចបានពួកគាត់តែងតែមានបញ្ហារហូតចឹង? តែសម្រាប់ខ្ញុំ គឺវាមិនដែលមានរឿងអីកើតឡើងសោះ អ្វីដែលសំខាន់បំផុត គឺយើងត្រូវមកថតឲ្យទាន់ពេលវេលា គោរពតាមលក្ខខណ្ឌក្នុងកុងត្រា នឹងតាមនៅអ្វីដែលយើងនិយាយគ្នា..! ខ្ញុំសង្ឃឹមថា ភាគីទាំងសងខាងនឹងដោះស្រាយបញ្ហានេះបានឆាប់ៗនេះ»។
ចាងហ្វាងផលិតកម្មមហាហង្ស លោក អ៊ិន សុភិន បានឆ្លើយបញ្ជាក់ថា ហេតុផលដែលខាងមហាហង្សមិនព្រមបើកលុយ៥០ភាគរយឲ្យលោក ហង្ស សម្បើមស័ក្ដ គឺបណ្ដាលមកពីលោកមិនបានមកថតភាពយន្តរឿង «សង្គ្រាមមរតក» ឲ្យចប់សព្វគ្រប់តាមអ្វី ដែលបានព្រមព្រៀងនោះទេ ដោយភាពយន្តទាំងមូលមានចំនួន៥០ភាគ តែភាពយឺតយ៉ាវ ដែលបណ្ដាលមកពីលោក ហង្ស សម្បើមស័ក្ដ មិនមានពេលថតឲ្យគ្រប់គ្រាន់ ទើបធ្វើឲ្យក្រុមហ៊ុនសម្រេចចិត្តកាត់ប្លង់មួយចំនួនចោល ហើយថតបានតែ៣៨ភាគអោយខាងទូរទស្សន៍។ លោកបានបញ្ចេញឯកសារបណ្ដឹងមួយ ដែលមេធាវីតំណាងឲ្យក្រុមហ៊ុន បានជូនដំណឹងឲ្យលោក ហង្ស សម្បើមស័ក្ដ មកបំពេញការងារអោយចប់សព្វគ្រប់ ដើម្បីកុំអោយមានការសងថ្លៃខូចខាតរបស់ផលិតកម្ម ឬត្រូវបង្កកប្រាក់កម្រៃមិនទាន់បើក។ យ៉ាងណាមិញ លោកថា ខ្លួនសុខចិត្តតម្កល់ពាក្យបណ្ដឹងនោះ ដោយនៅតែប្រកាន់ជំហរបើកលុយឲ្យគ្រប់ដដែល ដោយគ្រាន់តែសម្រេចចិត្តបង្កក់ឲ្យយូរបន្ដិតប៉ុណ្ណោះ ដើម្បីឲ្យបានដឹងថា បើពេលថតរឿងធ្វើបាបផលិតករ គឺផលិតករត្រូវអោយធ្វើបាបវិញពេលសុំបើកលុយ។
លោក ហង្ស សម្បើមស័ក្ដ បង្ហោះសំណេរថ្មីជាការឆ្លើយតបនោះទេ ក្រៅតែពីការបានបង្ហោះដដែលថា «ជំរាបសួរបងប្រុសអូនឧស្សាហ៍ខ្ញុំខលទៅបង គឺជាប់រវល់រហូត ហើយខ្ញុំបានឆាតទៅបងក៏គ្មានការឆ្លើយតបដែរ មូលហេតុ ដែលជំរុញឲ្យខ្ញុំផុសព្រោះមិនមានវិធីទាក់ទងបងបានសន្យាបើកលុយបញ្ចប់80% ក្នុងរឿង “សង្រ្គាមមរតក” ដែលបានដាក់បញ្ចាំងចប់បរិបូណ៍ហើយនៅស្ថានីយទូរទស្សន៍មួយ ហើយលើកថ្ងៃជាមួយខ្ញុំ៤ដង ហើយពេលនេះខ្ញុំត្រូវការប្រើប្រាស់ចាំបាច់ បើបងបានឃើញ ហើយសូមទាក់ទងមកប្អូនវិញផង ព្រោះគួរតែគោរពសម្តីខ្លួនឯង យើងបានចរចាគ្នាថា នឹងបើកបញ្ចប់ហើយ បើនៅតែគ្មានការឆ្លើយតបពីបងប្រុសអូនឧស្សាហ៍វាត្រូវជំរុញអោយខ្ញុំសុំចម្លើយពីលោកអគ្គនាយកផលិតកម្ម ដើម្បីបង្ហាញពីទំនួលខុសត្រូវរបស់ខ្លួនសូមអគុណ!»៕
