ស្វាយរៀងៈ ជនសង្ស័យជាជនជាតិចិនម្នាក់ ត្រូវបានកម្លាំងនគរបាលខេត្តស្វាយរៀង កសាងសំណុំរឿងបញ្ជូនសាលាដំបូងខេត្ត ពីបទយកទឹកក្ដៅស្រោចលើម្រាមជនជាតិចិនដូចគ្នា បណ្ដាលឲ្យរងរបួសធ្ងន់។
អធិការងក្រុងបាវិត លោកអនុសេនីយ៍ឯក គោយ យៀង បានឲ្យដឹងថា កាលពីថ្ងៃទី១៦ ខែកញ្ញា ឆ្នាំ២០១៨ វេលាម៉ោង២៖៣០នាទីរសៀល អធិការដ្ឋាននគរបាលក្រុងបាវិត បានទទួលពាក្យបណ្តឹងរបស់ជនរងគ្រោះឈ្មោះ ហ្វួ ធីងនុង ភេទប្រុស អាយុ២៦ឆ្នាំ ជនជាតិចិន មុខរបរបុគ្គលិកកាស៊ីណូក្រោន ស្ថិតក្នុងភូមិបាវិតកណ្តាល សង្កាត់/ក្រុងបាវិត ខេត្តស្វាយរៀង មានទីលំនៅខេត្តស៊ីឈន ប្រទេសចិន កាន់លិខិតឆ្លងដែនលេខE95464297 ថា កាលពីជាង៧យប់ថ្ងៃទី១៥ ខែកញ្ញា ឆ្នាំ២០១៨ នៅចំណុចក្នុងបន្ទប់បរិវេនកាស៊ីណូម៉ុកបាយ ស្ថិតក្នុងភូមិបាវិតកណ្តាល សង្កាត់/ក្រុងបាវិត ខេត្តស្វាយរៀង មានមនុស្ស៧នាក់ បានយកទឹកក្តៅមកស្រោចនៅលើដៃទាំងពីររបស់គេ បណ្ដាលឲ្យរបួសជាទម្ងន់ កំពុងសម្រាកព្យាបាលនៅមន្ទីរពេទ្យពន្លឺបូពារ៍ ក្រុងបាវិត។
ក្រោយពីទទួលពាក្យបណ្តឹងរួច សមត្ថកិច្ចបានចុះស្រាវជ្រាវរហូតដល់ម៉ោង៥ថ្ងៃខែឆ្នាំដដែលសមត្ថកិច្ចរកឃើញជនសង្ស័យម្នាក់ ឈ្មោះ ចាង ហោធាន ភេទប្រុស អាយុ២៩ឆ្នាំ ជនជាតិចិន មានទីលំនៅខណ្ឌយុងចូវ ខេត្តហូណាម ប្រទេសចិន មុខរបរ បុគ្គលិកក្រុមហ៊ុនភីងអានលិខិតឆ្លងដែន(យកទៅពន្យាទិដ្ឋការ) យកមកសាកសួរនៅអធិការដ្ឋាន។ ចំណែកជនសង្ស័យ៦នាក់ទៀត សមត្ថកិច្ចកំពុងស្រាវជ្រាវតាមចាប់មកផ្តន្ទាទោសតាមច្បាប់៕
