Sunday, September 9, 2018

យុវជនម្នាក់ បើករថយន្ត Prius បុកជាមួយម៉ូតូ​នៅក្រុងតាខ្មៅ​ បើករត់​រហូតសមត្ថកិច្ចឃាត់បាន នៅខណ្ឌមានជ័យ

អាម៉ាប៉ាប៉ាញ៉ូស

ភ្នំពេញៈ យុវជនម្នាក់ បើករថយន្ត Prius ស្លាកលេខ ភ្នំពេញ​ 2AR-2643 បុកម៉ូតូ Dream បណ្ដាលឲ្យរងរបួស នៅម្ដុំផ្សារកាច់ជ្រុង ក្រុងតាខ្មៅ​ ខេត្តកណ្ដាល​ រួចហើយបើករត់​រហូតដល់មុខស្ថានីយ សាំងតេលា ចាក់អង្រែក្រោម ត្រូវបានប្រជាពលរដ្ឋ​និងសមត្ថកិច្ចជួយដេញស្ទាក់ឃាត់បាន ។

ហេតុការណ៍​គ្រោះថ្នាក់ចរាចរណ៍​នេះ បានកើតឡើងនៅវេលាម៉ោង៧:៣០នាទីព្រឹកយប់ ថ្ងៃទី៩ ខែកញ្ញា​ ឆ្នាំ២០១៨​ នៅម្ដុំផ្សារកាច់ជ្រុង​ ផ្លូវលេខ២១ សង្កាត់តាខ្មៅ​ ក្រុងតាខ្មៅ​ ខេត្តកណ្ដាល​ រួចហើយបើករត់​រហូតសមត្ថកិច្ចឃាត់បាននៅមុខស្ថានីយសាំងតេលា សង្កាត់ចាក់អង្រែក្រោម​ ខណ្ឌមានជ័យ​ រាជធានីភ្នំពេញ​។

សាក្សីដែលឃើញហេតុការណ៍ និងជាអ្នកដេញតាមឃាត់រថយន្ត​បានរៀបរាប់​ប្រាប់ឲ្យដឹងថា​ នៅមុនពេលកើតហេតុ​ រថយន្តមួយគ្រឿងម៉ាក​ Prius ស្លាកលេខ ភ្នំពេញ​ 2AR-2643 បើកដោយបុរសម្នាក់​ ធ្វើដំណើរក្នុងទិសដៅ​ ពីត្បូងទៅជើង​ តាមផ្លូវ២១ លុះមកដល់ម្ដុំផ្សារកាច់ជ្រុង ក្រុងតាខ្មៅ​ ដែលជាកន្លែងកើតហេតុ​ ស្រាប់តែមានបុរសម្នាក់ជិះម៉ូតូ Dream មួយគ្រឿង (មិនចាំស្លាកលេខ) បានទៅបុកចំរថយន្តខាងមុខ ផ្នែកខាងឆ្វេង បណ្ដាលឲ្យដួលរងរបួសធ្ងន់ ហើយរថយន្តមិនព្រមឈប់ដោះស្រាយគ្នាសិនទេ​ បានព្យាយាម​បើករត់​ រហូតដលមុខស្ថានីយសាំងតេលា ផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ​ ត្រូវបានប្រជាពលរដ្ឋ​ និងសមត្ថកិច្ចជួយដេញស្ទាក់ឃាត់បានតែម្ដង​ ។

ភ្លាមនោះ សមត្ថកិច្ចក៏បានយករថយន្តបង្ក និងឃាត់អ្នកបើកបររថយន្ត ទៅអធិការដ្ឋាននគរបាលក្រុងតាខ្មៅ ដើម្បីដោះស្រាយគ្នា​ ស្រាប់តែអ្នកបើករថយន្តបង្ក​មិនព្រមទៅជាមួយសមត្ថកិច្ចទេ​ ដោយសុំហៅក្រុមគ្រួសារឲ្យមកសិន ទើបព្រមទៅ​ បន្តិចក្រោយមក ក្រុមគ្រួសារអ្នកបើករថយន្តបង្ក បានមកដល់កន្លែងកើតហេតុ ។ ចំណែកអ្នករងរបួស ត្រូវបានបញ្ជូនទៅមន្ទីរពេទ្យជ័យជំនះ ដើម្បីសង្គ្រោះផងដែរ ។

បច្ចុប្បន្ន​ក្រោយពេលកើតហេតុ​ រថយន្តបង្កហេតុ​ និងយុវជន ដែលជាអ្នកបើកបរ​ ត្រូវបានសមត្ថកិច្ចយករថយន្តសារ៉ែន​មកឃាត់ខ្លួន យកទៅអធិការដ្ឋាននគរបាលក្រុងតាខ្មៅ​ ដើម្បីដោះស្រាយតាមផ្លូវច្បាប់ ៕

@Amapapa.News

Feature Ads