លោក គឹម សុខ អ្នកវិភាគនយោបាយនៅកម្ពុជា និងកូនស្រីដែលមានអាយុទើបតែបាន៦ឆ្នាំ បានទៅដល់ប្រទេសទី៣ ដោយសុវត្ថិភាពហើយ ក្រោយពីចាកចេញពីប្រទេសកម្ពុជា បន្ទាប់ពីសម្តេច ហ៊ុន សែន នាយករដ្ឋមន្រ្តី បានគំរាមចាប់ខ្លួនដាក់គុកសារជាថ្មី បើគ្មានប្រាក់សងជំងឺចិត្តគាត់នូវទឹកប្រាក់ប្រមាណ ៨០០លានរៀល។ នេះបើយោងតាមហ្វេសប៊ុករបស់ លោក អ៊ុំ សំអាន អតីតតំណាងរាស្រ្តបក្សប្រឆាំងដែលទើបទទួលបានសេរីភាពថ្មីៗនេះ។
លោក គឹម សុខ និងកូនស្រី បានភៀសខ្លួនពីប្រទេសកម្ពុជាដល់ទីកន្លែងមានសុវត្ថិភាព កាលពីថ្ងៃទី៣០ ខែសីហា ឆ្នាំ២០១៨។
តាមរយៈហ្វេសប៊ុករបស់លោក អ៊ុំ សំអាន បានសរសេរថា៖ នៅថ្ងៃទី១១ ខែតុលា ឆ្នាំ២០១៨ នេះ លោក គឹម សុខ អ្នកវិភាគនយោបាយ និងកូនស្រី បានចេញដំណើរទៅកាន់ប្រទេសទីបីហើយ ប្រកបដោយសុវត្ថិភាព បន្ទាប់ពីលោកទទួលបានសិទ្ធិជ្រកកោននយោបាយនៅប្រទេសស៊ុយអ៊ែត ក្នុងសហភាពអឺរ៉ុប។ សូមអបអរសាទរ! តុលាការក្រុងភ្នំពេញបានចេញដីការចាប់ខ្លួនលោក គឹម សុខ នាពេលថ្មីៗនេះ បន្ទាប់ពីលោកបានចេញពីពន្ធនាគារ។
គួររំលឹកថាកាលពីថ្ងៃទី១៤ ខែកញ្ញា ឆ្នាំ២០១៨ តុលាការសាលាដំបូងរាជធានីភ្នំពេញ បានចេញដីកាបង្គាប់ឱ្យចាប់ខ្លួនលោក គឹម សុខ ពាក់ព័ន្ធបទល្មើសចោទប្រកាន់ពីបទ៖ ញុះញង់ឲ្យប្រព្រឹត្តបទល្មើស ជាអាទិ៍ បរិហាកេរ្តិ៍ជាសាធារណៈ ប្រព្រឹត្តនៅរាជធានីភ្នំពេញ កាលពីថ្ងៃទី១៣ ខែកុម្ភៈ ឆ្នាំ២០១៧ ដែលសំណុំរឿងនេះប្តឹងដោយរាជរដ្ឋាភិបាលកម្ពុជា។
សូមបញ្ជាក់ថា លោក គឹម សុខ ធ្លាប់បានអះអាងថា លោកស្ម័គ្រដើរចូលគុកដោយខ្លួនឯង ប្រសិនបើលោកនាយករដ្ឋមន្រ្តី ហ៊ុន សែន យល់ព្រមលើលក្ខខណ្ឌរបស់លោក២ គឺទីមួយ ត្រូវព្រមសន្យាការពារសុវត្ថិភាពកូនស្រីតូចរបស់លោក និងទី២ លោកនាយករដ្ឋមន្រ្តីត្រូវហ៊ានឡើងសវនាការ តតាំងគ្នាដោយផ្ទាល់ជាមួយលោក ក្នុងនាមជាដើមបណ្តឹង។