Tuesday, October 30, 2018

រដ្ឋបាលខេត្តព្រះសីហនុ៖ សាឡង់នៅឆ្នេរឯករាជ្យ មិនមែនសម្រាប់បូមខ្សាច់ទេ តែសម្រាប់ផ្ទេរខ្សាច់យកទៅចាក់នៅបឹងព្រែកទប់

រិទ្ធី

រដ្ឋបាល​ខេត្តព្រះសីហនុ នៅថ្ងៃទី២៩ ខែតុលា ឆ្នាំ២០១៨ បានចេញសេចក្តីប្រកាសព័ត៌មានថា៖ សាឡង់ដែលបានចូលចតនៅចម្ងាយប្រមាណ១០០ម៉ែត្រ ពីឆ្នេរឯករាជ្យមិនមែនមកបូមខ្សាច់នៅឆ្នេរឯករាជ្យ(ឆ្នេរ៧ជាន់) ទេ។

សេចក្តីប្រកាសព័ត៌មាននេះបញ្ជាក់ថាសាឡង់នេះគឺត្រៀមសម្រាប់ធ្វើការផ្ទេរខ្សាច់ពីខេត្តសាឡង់ដើម្បីយកទៅចាក់បំពេញនៅផ្នែកមួយចំនួននៃបឹងព្រែកទប់តាមអនុក្រឹត្យលខេ២៣ អនក្រ.បក ចុះថ្ងៃទី២៣ ខែកុម្ភៈ ឆ្នា២០១៨។

ការបកស្រាយពីនេះ ក្រោយពីរដ្ឋបាលខេត្តព្រះសីហនុទទួលបានព័ត៌មានថាមានសាឡង់០១គ្រឿង ដែលមានភ្ជាប់មកជាមួយនូវក្រចាក់សម្រាប់ចាប់យកខ្សាច់និងសាឡង់ដឹកជញ្ជូនចំនួន០២គ្រឿងបានចូលចតនៅចម្ងាយប្រមាណ១០០ម៉ែត្រ ពីឆ្នេរឯករាជ្យ ឯកឧត្តម យន្ត មីន អភិបាលខេត្តបានចាត់ក្រុមការងារចម្រុះចុះទៅពិនិត្យដល់ទីតាំងផ្ទាល់។

បើតាម​លោក ឱ សារឿន អ្នកនាំពាក្យរដ្ឋបាលខេត្តព្រះសីហនុ បានបញ្ជាក់ថាការដឹក​ខ្សាច់​តាម​សា​ឡង់ តាមផ្លូវ​ទឹក​ពី​ស្ទឹង​ស្រែអំបិល មក​ឆ្នេរ​ឯករាជ្យ​នេះ ដើម្បី​កាត់បន្ថយ​ការខូចខាត​ផ្លូវ និង​ហេដ្ឋារចនាសម្ព័ន្ធ​។​

គួររំលឹកថា បើតាម​អនុក្រឹត្យលេខ ២៣ អនក្រ.បក  ​ចុះ​ថ្ងៃទី២៣ ខែ​កុម្ភៈ ឆ្នាំ​២០១៨ របស់រាជរដ្ឋាភិបាលកម្ពុជាតាមរយៈក្រសួងបរិស្ថាន បានសម្រេចកាត់ដីទំហំ​១១,៥០​ ហិកតា (១១ហិកតា និង៥០អា) ចេញ​ពី​តំបន់​អភិរក្ស​ទឹកសាប​ព្រែក​ទប់​ ដែលមាន​ទីតាំង​នៅក្នុង​ក្រុងព្រះសីហនុ ខេត្ត​ព្រះសីហនុ​។

@Amapapa.News

Feature Ads