ក្រសួងបរិស្ថានបានប្រកាសថា៖ កាលពីថ្ងៃចន្ទ ៧រោច ខែភទ្របទ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០១ ខែតុលា ឆ្នាំ២០១៨ សត្វខ្ទីងមេ១ក្បាលបានបង្កើតកូនឈ្មោល១ក្បាល នៅក្នុងទ្រុង នៃឧទ្យានសួនសត្វ និង មជ្ឈមណ្ឌលសង្គ្រោះសត្វព្រៃភ្នំតាម៉ៅ។ កូនខ្ទីងឈ្មោលដែលទើបនឹងកើតនេះ កំពុងស្ថិតក្រោមការតាមដានយ៉ាងយកចិត្តទុកដាក់ពីបសុពេទ្យ និងអ្នកថែរក្សាសត្វព្រៃ។
ក្រសួងបរិស្ថានអះអាងថា៖ ការកើតកូនខ្ទីងឈ្មោលនេះជាសញ្ញាជោគជ័យមួយទៀត របស់ឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ ក្នុងកម្មវិធីបង្កាត់ពូជសត្វព្រៃ។
សូមបញ្ជាក់ថា៖ សត្វខ្ទីងជាប្រភេទសត្វព្រៃធំមួយប្រភេទដែលមានតម្លៃកាត់ថ្លៃមិនបាន ហើយអ្វីដែលជាការព្រួយបារម្ភនោះ គឺការរស់នៅក្នុងព្រៃធម្មជាតិកំពុងប្រឈមនឹងបញ្ហាជាច្រើន ពិសេសគឺ ការរេចរឹលនៃតំបន់ព្រៃភ្នំដែលជាទីជម្រករបស់ពួកវា។ មួយវិញទៀត ដោយសារសត្វនេះមានតម្លៃ ពួកព្រានព្រៃតែងតាមប្រមាញ់ដោយប្រើប្រាស់កាំភ្លើង។
យោងតាមសារព័ត៌មាន AKP បានឱ្យដឹងថា៖ សត្វខ្ទីង ជាសត្វមួយប្រភេទដែលទទួលរងនូវការគំរាមកំហែងយ៉ាងខ្លាំង ហើយចំនួនរបស់ពួកវាមានការថយចុះគួរឱ្យព្រួយបារម្ភ។ សត្វខ្ទីងនៅក្នុងប្រទេសកម្ពុជាយើង វារស់នៅក្នុងតំបន់មួយចំនួនដូចជា ភូមិភាគឦសាន ភូមិភាគខាងជើងខេត្តកោះកុង ខេត្តពោធិ៍សាត់ (ជួរភ្នំក្រវាញ) និង ខេត្តកំពង់ស្ពឺ ជាដើម។
ក្រសួងបរិស្ថានបញ្ជាក់ថា បច្ចុប្បន្ន ខ្ទីងស្ថិតក្នុងក្រុមប្រភេទសត្វដោយកម្រ មានដង់ស៊ីតេរស់នៅកម្រិតទាប។ គេកម្រឃើញវារស់នៅតាមវាលទំនាបណាស់ ព្រោះសត្វនេះមិនចូលចិត្តកម្តៅថ្ងៃយូរពេកទេ។ សត្វខ្ទីងកំពុងប្រឈមមុខនឹងការរងគ្រោះថ្នាក់ដោយសារការបាត់បង់ទីជម្រករស់នៅ ការបរបាញ់ដើម្បីយកសាច់ ស្នែង ឆ្អឹង និងការជួញដូរ។
សូមរំលឹកថា ខ្ទីងប្រភេទនេះត្រូវបានចុះក្នុងបញ្ជីក្រហម IUCN (VU) ថាជាប្រភេទងាយរងគ្រោះថ្នាក់ជាសកល សត្វខ្ទីងស្ថិតនៅក្នុងឧបសម្ព័ន្ធទី១ នៃអនុសញ្ញាសាយតេស។