ភ្នំពេញៈ ហេតុការណ៍ផ្ទុះអាវុធមួយ បានកើតមានឡើងក្នុងការបង្ក្រាបមុខសញ្ញាគ្រឿងញៀន ដែលបង្កឲ្យមានការភ្ញាក់ផ្អើលដល់ប្រជាពលរដ្ឋ ក៏ដូចជាបងប្អូនខ្មែរឥស្លាម មានការភិតភ័យ រហូតដល់មានអ្នកសន្លប់ចំនួន២នាក់ផងដែរ ។ ហេតុការណ៍នេះបានកើតឡើងនៅវេលាម៉ោងប្រមាណ៩យប់ ថ្ងៃអង្គារ៍ ទី១៦ ខែតុលា ឆ្នាំ២០១៨ នៅត្រង់ចំណុចភូមិព្រែកតាពៅ (ទល់មុខវិហារឥស្លាម) សង្កាត់ព្រែកប្រា ខណ្ឌច្បាអំពៅ រាជធានីភ្នំពេញ ។
អ្នកឃើញហេតុការណ៍ផ្ទាល់ បានប្រាប់ភ្នាក់ងារសារព័ត៌មានខេមប៉ុស្តិ៍ថា នៅមុនពេលកើតហេតុ គេឃើញនារីជនជាតិវៀតណាមម្នាក់ បានដើរចូលមកក្នុងភូមិកើតហេតុខាងលើ មួយសន្ទុះក្រោយមក ស្រាប់តែមានកម្លាំងសមត្ថកិច្ចចម្រុះមួយក្រុម ស្លៀកពាក់ស៊ីវិល ពាក់មួកសុវត្ថិភាពបាំងមុខជិត មានទាំងរថយន្តមានទាំងម៉ូតូ មិនដឹងថា តាមនារីជនជាតិវៀតណាមខាងលើ មកពីណាទេ ក៏ឆ្មក់ចូលមកតាមក្រោយ។ ចំណែកឯនារីជនជាតិវៀតណាមរូបនោះ បានរត់ឡើងផ្ទះប្រជាពលរដ្ឋ ទើបកម្លាំងសមត្ថកិច្ចចម្រុះ រត់ដេញតាមចាប់ទាំង មនុស្សស្រីម្នាក់ និងយុវជនម្នាក់ទៀត ដាក់ខ្នោះជាប់គ្នា រួចបម្រុងនាំខ្លួនចេញក្រៅ ស្រាប់តែប្រជាពលរដ្ឋនៅក្បែរនោះ ឃើញទាន់ ក៏ស្រែកឆោឡោឡើងបង្កការភ្ញាក់ពេញមួយភូមិ នាំគ្នារត់មករារាំងសមត្ថកិច្ច មិនឲ្យនាំខ្លួនចេញទៅទេ។ ដោយសារតែប្រជាពលរដ្ឋច្រើនពេក ព្យាយាមរារាំងមិនឲ្យសមត្ថកិច្ចនាំមុខជនប្រុសស្រីទាំង២នាក់នោះចេញ ទើបសមត្ថកិច្ចផ្ទុះអាវុធបាញ់ឡើងលើ៣គ្រាប់ ដើម្បីបំបែកហ្វូងប្រជាពលរដ្ឋ តែនៅមិនអាចបំបែកបាន ទើបសមត្ថកិច្ចបន្តបាញ់ឡើងលើ៣គ្រាប់ផ្ទួនៗគ្នាទៀត ធ្វើឲ្យមានការភ្ញាក់ផ្អើលដល់ប្រជាពលរដ្ឋមានការភិតភ័យ នាំគ្នាស្រែកឆោឡោឡើង ទើបសមត្ថកិច្ចចម្រុះទាំងនោះ នាំគ្នាដកខ្លួនចេញបាត់អស់ពីកន្លែងកើតហេតុ ដោយបន្សល់ទុកក្មេងស្រីម្នាក់ និងមនុស្សចាស់ម្នាក់ ដែលប្រជាពលរដ្ឋខ្មែរឥស្លាម ភិតភ័យញ័រខ្លួន សន្លប់បាត់ស្មារតី នៅកន្លែងកើតហេតុ ។
ប្រភពបន្ថែមទៀតថា ក្រោយពីសមត្ថកិច្ចស្លៀកពាក់ស៊ីវិលទាំងនោះ ចេញបាត់អស់ទៅ គេឃើញមានកម្លាំងសមត្ថកិច្ចខណ្ឌច្បារអំពៅ និងសមត្ថកិច្ចប៉ុស្តិ៍ព្រែកប្រា ចុះមកសាកសួរដំណើររឿងហេតុ និងជួយទាក់ទងហៅរថយន្តសង្គ្រោះឲ្យមកយកអ្នកដែលសន្លប់យកទៅសង្គ្រោះនៅឯមន្ទីរពេទ្យផងដែរ ។
ទោះយ៉ាងណា ពាក់ព័ន្ធនឹងករណីផ្ទុះអាវុធខាងលើនេះ លោកនាយប៉ុស្តិ៍នគរបាលព្រែកប្រា បានប្រាប់ខេមប៉ុស្តិ៍ឲ្យដឹងបឋមថា ខណៈកម្លាំងសមត្ថកិច្ច នៃអធិការដ្ឋាននគរបាលខណ្ឌច្បារអំពៅ និងកម្លាំងអាវុធហត្ថខណ្ឌច្បារអំពៅ កំពុងតែសាកសួរជនប្រុសស្រី ដែលសមត្ថកិច្ចស៊ីវិលចាប់ដាក់ខ្នោះនោះ។ ចំពោះអត្តសញ្ញាណសមត្ថកិច្ចក៏មិនទាន់អាចបង្ហាញប្រាប់ឲ្យដឹងនៅឡើយទេ៕
