ភ្នំពេញៈ រថយន្តកាមរីបាឡែនមួយគ្រឿង បើកបរដោយបុរសស្រវឹងស្រាម្នាក់ ក្នុងល្បឿនយ៉ាងលឿន លុះមកដល់ផ្លូវកោង បានរេចង្កូតទៅបុករបងផ្ទះប្រជាពលរដ្ឋ បង្កឲ្យមានការភ្ញាក់ផ្អើលទាំងយប់តែម្ដង កាលពីវេលាម៉ោង២៖០៥នាទី ទៀបភ្លឺថ្ងៃអាទិត្យ ទី១៨ ខែវិច្ឆិកា ឆ្នាំ២០១៨ នៅត្រង់ចំណុចផ្លូវកោង ក្រោយវិទ្យាល័យ ហ៊ុនសែន ចាក់អង្រែ តាមផ្លូវ៣០ម៉ែត្រ ស្ថិតក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
កម្លាំងល្បាតប៉ុស្តិ៍នគរបាលចាក់អង្រែក្រោម ឲ្យដឹងថា អ្នកបើកបររថយន្តបង្កមានឈ្មោះ ជា តុងលុយ ភេទប្រុង អាយុ៤១ឆ្នាំ មានទីលំនៅផ្ទះលេខB2 ផ្លូវ២០០២ ភូមិត្រពាំងឈូក សង្កាត់ទឹកថ្លា ខណ្ឌសែនសុខ ភ្នំពេញ និងមានស្រុកកំណើតនៅឯស្រុកត្បូងឃ្មុំ ខេត្តកំពង់ចាម។
ប្រភពព័ត៌មាននៅកន្លែងកើតហេតុ ឲ្យដឹងថា នៅមុនពេលកើតហេតុ គេឃើញរថយន្តមួយគ្រឿងម៉ាក កាមរីបាឡែន ពណ៌ទឹកប៊ិចចាស់ ពាក់ស្លាកលេខ ភ្នំពេញ 2C-0409 បើកបរដោយបុរសស្រវឹងស្រាម្នាក់ ធ្វើដំណើរក្នុងទិសដៅពីលិចមកកើត ក្នុងល្បឿនយ៉ាងលឿន។ លុះដល់ចំណុចកើតហេតុ ដែលជាចំណុចផ្លូវកោង និងពុំមានភ្លើងបំភ្លឺផ្លូវផងនោះ អ្នកបើកបរបានបួងចង្កូតមិនទាន់ក៏ជ្រុលទៅបុករបងផ្ទះប្រជាពលរដ្ឋលាន់ឮដូចរន្ទះ បណ្ដាលឲ្យបាក់បង្គោលរបងខ្ទេច កល់ជាប់រថយន្តបើកទៅមុខលែងរួច ហើយរថយន្តផ្ទុះកង់ និងខ្ទេចមុខខាងស្ដាំ ព្រមទាំងផ្ទុះពោងសុវត្ថិភាពទាំង២ផងដែរ តែមិនបណ្ដាលឲ្យអ្នកបើកបរនោះ រងរបួសនោះទេ។
ប្រភពបន្តទៀតថា ភ្លាមនោះ ម្ចាស់ផ្ទះកើតហេតុ ប្រញាប់ប្រញាល់ចេញមក រួចរាយការណ៍ប្រាប់សមត្ថកិច្ចឲ្យចុះមកជួយអន្តរាគមន៍ភ្លាមៗផងដែរ តែម្ចាស់រថយន្តបង្កបានសុំដោះស្រាយ ដោយព្រមសងការខូចខាតចំនួន១០០ដុល្លារ ដើម្បីបញ្ចប់រឿង និងហៅបងប្អូនប្រជាពលរដ្ឋ និងសមត្ថកិច្ចជួយរុញអែបចូលខាងសិន ដើម្បីការពារកុំអោយមានយានយន្តផ្សេងទៀត បើកមកប៉ះ ព្រោះចំណុចកើតហេតុជាផ្លូវកោង និងមិនមានភ្លើងបំភ្លឺផ្លូវ។
ក្រោយពេលកើតហេតុ ភាគីខាងម្ចាស់រថយន្ត បានអរគុណបងប្អូនប្រជាពលរដ្ឋ និងសមត្ថកិច្ច ដែលបានជួយសម្រួលចរាចរណ៍ ហើយរង់ចាំក្រុមគ្រួសារយកលុយមកសងថ្លៃខូចខាតនេះផងដែរ៕
