មណ្ឌលគិរីៈ បន្ទាប់ពីមានការភ្ញាក់ផ្អើលពេញបណ្តាញសង្គម កាលពីដើមសប្តាហ៍កន្លងមក កម្លាំងនគរបាលខេត្តមណ្ឌលគិរី បានបើកការស៊ើបអង្កេតយ៉ាងយកចិត្តទុកដាក់ រហូតឈានដល់ការឃាត់ខ្លួនបុរសម្នាក់ ដែលបានបង្ហោះរូបភាពនារីរងគ្រោះម្នាក់ ទាំងអាក្រាតកាយ (ល្វែងក្រោម) ភ្ជាប់ដោយពាក្យអង្វរដល់គ្រួសារនាង កុំបំបែកពួកគេទៀតអី…។
យោងតាមមន្ត្រីសមត្ថកិច្ច បានឲ្យដឹងថា ដោយមានការឯកភាពពីតំណាងអយ្យការសាលាដំបូងខេត្ត នគរបាលស្រុកពេជ្រាដា សម្រេចឃាត់ខ្លួនបុរសឈ្មោះ ម៉ីន សុក្រៃ អាយុ២៣ឆ្នាំ ជនជាតិចាម រស់នៅភូមិពូទិល ឃុំប៊ូស្រា អតីតជាគូដណ្តឹងនឹងនារីរងគ្រោះ ដែលមានវ័យទើប១៨ឆ្នាំ កាលពីល្ងាចថ្ងៃទី៣១ ខែតុលា ឆ្នាំ២០១៨ នៅស្រុកពេជ្រាដាតែម្តង។
ប្រភពឲ្យដឹងថា យោងតាមតម្រុយបានបញ្ជាក់ថា ជនបង្កពិតជាបានចាប់នារីរងគ្រោះថតប្រាដកមែន… ហើយគំរាមបង្ហោះរូបលើបណ្តាញសង្គមម្តងហើយ ដោយនេះជាលើកទី២ហើយ កាលមុនបង្ហោះរួចលុបចោលវិញ…។ ដោយមានតម្រុយច្បាស់បែបនេះ ទើបតំណាងអយ្យការសម្រេចឲ្យឃាត់ខ្លួន ដើម្បីធ្វើការអង្កេតបន្ត។
ជុំវិញព័ត៌មានខាងលើភ្នាក់ងារយើងនៅមិនអាចសុំការបំភ្លឺពីគ្រួសារនារីរងគ្រោះ និងសាមីខ្លួនជនបង្កបានទេ នាព្រឹកថ្ងៃទី១ ខែវិច្ឆិកានេះ។ ចំណែកជនបង្ក នឹងត្រូវបញ្ជូនខ្លួនទៅកាន់សាលាដំបូងខេត្ត នៅថ្ងៃទី១ ខែវិច្ឆិកា ឆ្នាំ២០១៨នេះ ដើម្បីចាត់ការតាមច្បាប់ផងដែរ៕
