ភ្នំពេញៈ យុវជនវ័យជំទង់ម្នាក់ ញៀនថ្នាំផង និងលេងល្បែងស៊ីសងផង លុះពេលអស់លុយពីខ្លួន ក៏បែកគំនិតធ្វើសកម្មភាពលួចកាច់កម៉ូតូ បានសម្រេច រួចយកទៅបញ្ចាំបានលុយ២០០ដុល្លារ គេចខ្លួន១២ម៉ោង លុះត្រឡប់មកវិញផ្ទះ សមត្ថកិច្ចចុះមកចាប់ខ្លួនបានល្មម។
ហេតុការណ៍នេះ កើតឡើងកាលពីវេលាម៉ោង៧៖០៥យប់ថ្ងៃពុធ ៧រោច ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣១ ខែតុលា ឆ្នាំ២០១៨ ចំណុចមុខផ្ទះលេខ២៧២ ផ្លូវលេខ៣៥៧ ស្ថិតក្នុងភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ។
សមត្ថកិច្ចឲ្យដឹងថា ជនរងគ្រោះឈ្មោះ ហេង សុខទី ភេទប្រុស អាយុ២៣ឆ្នាំ ជនជាតិខ្មែរ មុខរបរអ្នកសារព័ត៌មាន ស្នាក់នៅផ្ទះលេខ២៧២ ផ្លូវលេខ៣៥៧ ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ។ ចំណែកជនសង្ស័យឈ្មោះ ហួន ចាន់ណា អាយុ១៨ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះគ្មានលេខ សំណង់អនាធិបតេយ្យ ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ។
ប្រភពព័ត៌មានពីជនរងគ្រោះ បានរៀបរាប់ប្រាប់ភ្នាក់ងារ CAM POST ឲ្យដឹងថា នៅវេលាម៉ោង៨ព្រឹក ថ្ងៃកើតហេតុខាងលើ គាត់(ជនរងគ្រោះ)បានទុកម៉ូតូមួយគ្រឿងម៉ាក ហុងដា សេ១២៥ ពណ៌ខ្មៅ ពាក់ស្លាកលេខ ភ្នំពេញ 1BA-0612 នៅចំណុចមុខផ្ទះកើតហេតុ រួចក៏បានចូលទៅសម្រាកមួយសន្ទុះ ក៏ត្រឡប់ចេញមកក្រៅវិញ ក៏ស្រាប់តែមានជនសង្ស័យម្នាក់ បានធ្វើសកម្មភាពលួចកាច់កម៉ូតូគាត់ ជិះគេចពីកន្លែងកើតហេតុបាត់ ភ្លាមនោះគាត់ក៏បានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលច្បារអំពៅ២ ដើម្បីឲ្យសមត្ថកិច្ចជួយស្រាវជ្រាវតាមរកជនសង្ស័យ។ ហើយគាត់ (ជនរងគ្រោះ) ក៏ត្រឡប់មកផ្ទះវិញ បើកកាមេរ៉ាសុវត្ថិភាពនៅមុខផ្ទះរបស់ខ្លួនមើល ឃើញជនសង្ស័យ ដែលរស់នៅក្នុងភូមិជាមួយគ្នា បានធ្វើសកម្មភាពលួចយកម៉ូតូរបស់ខ្លួនទៅ ទើបគាត់បានយកវីដេអូនោះ ទៅប្រគល់ឲ្យសមត្ថកិច្ច ដើម្បីងាយស្រួលក្នុងការស្រាវជ្រាវចាប់ជនសង្ស័យរូបនោះ។
ជនរងគ្រោះបន្តទៀតថា លុះមកដល់ម៉ោង៧យប់ថ្ងៃដដែល មិត្តភក្ដិរបស់គាត់ បានប្រទះឃើញជនសង្ស័យ នៅមុខផ្ទះរបស់ជនសង្ស័យនៅចុងភូមិកើតហេតុ ទើបប្រញាប់រត់មកប្រាប់គាត់ ភ្លាមនោះគាត់(ជនរងគ្រោះ)ក៏បានរាយការណ៍ ប្រាប់សមត្ថកិច្ចប៉ុស្តិ៍នគរបាលច្បារអំពៅ២ ចេញជួយអន្តរាគមន៍ និងឃាត់ខ្លួនជនសង្ស័យបានភ្លាមៗនៅចំណុចមុខផ្ទះគ្មានលេខ ផ្លូវបេតុងចុងភូមិ ស្ថិតក្នុងសង្កាត់ច្បារអំពៅ២ រួចយកមកសួរនាំនៅប៉ុស្តិ៍តែម្តង។
ចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួនពិតជាបានលួចយកម៉ូតូរបស់ជនរងគ្រោះនៅមុខផ្ទះរបស់ជនរងគ្រោះពិតប្រាកដមែន ហើយបានយកទៅបញ្ចាំនៅកន្លែងទទួលបញ្ចាំមួយកន្លែង ស្ថិតក្នុងសង្កាត់ច្បារអំពៅទី២ បានលុយចំនួន២០០ដុល្លារ រួចយកលុយមួយចំនួនទៅទិញថ្នាំជក់ និងមួយចំនួនទៀតរូបគេបានអោយមិត្តភក្ដិ ហើយក៏ត្រឡប់មកផ្ទះវិញ នៅសល់លុយជាង១០ម៉ឺនរៀល រូបគេក៏ប្រគល់អោយឪពុករបស់គេ ស្រាប់តែមួយសន្ទុះក្រោយមកក៏ឃើញសមត្ថកិច្ចចុះមកឃាត់ខ្លួនរូបគេតែម្ដង។
បច្ចុប្បន្នជនសង្ស័យឈ្មោះ ហួន ចាន់ណា ត្រូវបានសមត្ថកិច្ចធ្វើការឃាត់ខ្លួនបញ្ជូនទៅអធិការដ្ឋាននគរបាលខណ្ឌច្បារអំពៅ ដើម្បីកសាងសំណុំរឿង ចាត់ការតាមនីតិវិធីច្បាប់៕