ភ្នំពេញៈ រដ្ឋមន្ត្រីក្រសួងព័ត៌មាន បានអះអាងថា កម្ពុជា មិនមានការរឹតត្បិតសេរីភាពសារព័ត៌មាន តាមអនឡាញនោះឡើយ ខណៈដែលសិទ្ធិសេរីភាពសារព័ត៌មាន នៅកម្ពុជា មានភាពល្អប្រសើរ ។
ការអះអាងរបស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាននេះ គឺជាការឆ្លើយតបទៅនឹងសំណួរបស់លោកស្រី រ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកសិទ្ធិមនុស្ស បានលើកឡើងទាក់ទងទៅនឹងប្រកាសអន្តរក្រសួង ស្តីពីការគ្រប់គ្រងការផ្សព្វផ្សាយតាមគេហទំព័រ និងបណ្តាញទំនាក់ទំនងសង្គមនៅកម្ពុជា កាលពីខែឧសភា ឆ្នាំ២០១៨។
លោកបានបញ្ជាក់ថា ប្រកាសអន្តរក្រសួង ចុះថ្ងៃទី១៨ ខែឧសភា គឺគ្រាន់តែចង់បញ្ជាក់អំពីតួនាទីភារកិច្ចរបស់ក្រសួងពាក់ព័ន្ធ នៅក្នុងការទទួលខុសត្រូវនៅពេលដែលមានករណីផ្សព្វផ្សាយព័ត៌មានមួយចំនួន ដែលធ្វើឲ្យប៉ះពាល់ដល់ផលប្រយោជន៍ជាតិប៉ុណ្ណោះ ។ ជាពិសេស ក្រសួងនីមួយៗ គឺជាអ្នកទទួលខុសត្រូវទៅតាមតួនាទី និងភារកិច្ច ដែលមានចែងនៅក្នុងប្រកាសនោះ ។
លោកបានបញ្ជាក់ទៀតថា ការបង្កើតក្រុមការងារ និងប្រកាសអន្តរក្រសួង ដោយដាក់ចេញនូវវិធានការទប់ស្កាត់ព័ត៌មានប៉ះពាល់សង្គមជាតិនៅតាមអនឡាញនោះ មិនមែនជាចេតនាក្នុងការបំបិទសិទ្ធិសេរីភាពក្នុងការបញ្ចេញមតិនៅតាមបណ្តាញសង្គមនោះឡើយ។
តែយ៉ាងណាក៏ដោយ លោករដ្ឋមន្ត្រី បានស្វាគមន៍ ចំពោះការផ្តល់មតិយោបល់កែលម្អទៅលើខ្លឹមសារនៃប្រកាសអន្តរក្រសួង ចុះថ្ងៃទី១៨ ខែឧសភា ឆ្នាំ២០១៨នេះផងដែរ ៕