ភ្នំពេញៈ នៅម៉ោង៨ព្រឹកថ្ងៃទី១៣ ខែធ្នូ ឆ្នាំ២០១៨ ក្រោមការដឹកនាំរបស់លោក ពេជ្រ កែវមុនី អភិបាលខណ្ឌមានជ័យ និងលោក ឡុង ង៉ែត អភិបាលរងខណ្ឌមានជ័យ ទទួលបន្ទុកផ្នែកសន្តិសុខ សណ្ដាប់ធ្នាប់ ក្រុមការងារសណ្តាប់ធ្នាប់ខណ្ឌមានជ័យ និងរដ្ឋបាលសង្កាត់ស្ទឹងមានជ័យ៣ ដឹកនាំដោយតំណាងចៅសង្កាត់ស្ទឹងមានជ័យ៣ និងកម្លាំងសណ្ដាប់ធ្នាប់ខណ្ឌ ដឹកនាំដោយលោក ឡេង ចន្ទសុភ័ត្រា ប្រធានសន្តិសុខសណ្ដាប់ធ្នាប់ខណ្ឌមានជ័យ និងកម្លាំងនគរបាលប៉ុស្តិ៍ស្ទឹងមានជ័យ៣ បានចុះត្រួតពិនិត្យសកម្មភាពកាត់សំយ៉ាប តូបលក់ដូរ រោង និងរបង ដែលបានសង់ចូលដីចំណីផ្លូវសាធារណៈ នៅកំណាត់ផ្លូវដីថ្មី ៤៩CC ចាប់ពីកំណត់ផ្លូវវេងស្រេង ដល់ផ្លូវអគ្គិសនី ចុងខាងលិច។
ជាលទ្ធផល ឃើញថា បងប្អូនម្ចាស់លំនៅដ្ឋានទាំងអស់ បានចូលរួមសហការជាមួយអាជ្ញាធរខណ្ឌក្នុងការរៀបចំកំណាត់ផ្លូវនេះ ឲ្យមានរបៀបរៀបរយ ដោយបងប្អូនបានកំពុងកាត់សំយ៉ាប តូបលក់ដូរ រោង និងរបងរបស់ខ្លួនជាបន្តបន្ទាប់ នៅតាមចំណុចទីតាំងដែលក្រុមការងារមន្ត្រីជំនាញយើងបានបាញ់គំនូសកំណត់ អោយរុះរើចេញនោះ បានជាង៤០%ហើយ ដោយឡែកម្ចាស់ទីតាំងខ្លះ ដែលមិនទាន់បានកាត់ និងរុះរើចេញនោះ គឺពួកគាត់រកជាងមកកាត់មិនទាន់ ទើបសុំមួយថ្ងៃទៀត ដើម្បីឲ្យជាងមកកាត់ចេញតាមការជូនដំណឹងរបស់អាជ្ញាធរ។
ដោយឡែកកម្លាំងសណ្ដាប់ធ្នាប់ខណ្ឌមានជ័យ និងកម្លាំងសង្កាត់ពាក់ព័ន្ធ បានបន្តចុះធ្វើការរៀបចំសណ្ដាប់ធ្នាប់ នៅតាមផ្លូវវេងស្រេង ម្ដុំលូប្រាំ ផ្លូវ៣៧១(ផ្សារក្រមួនស្ពានដែក) កម្លាំងសណ្ដាប់ធ្នាប់បានបញ្ជាក់ដែរថា ចំពោះបងប្អូនដែលនៅតែរឹងរូសមកដាក់លក់អីវ៉ាន់ និងសម្ភារៈផ្សេងៗ តាមចិញ្ចើមផ្លូវ មិនទុកចិញ្ចើមថ្នល់ សំរាប់អ្នកថ្មើរជើងដើរ នៅលើចិញ្ចើមផ្លូវបែបអាណាធិបតេយ្យដដែលៗទៀតនោះ ដែលបង្កផលប៉ះពាល់សណ្តាប់ធ្នាប់ទាំងអស់ កម្លាំងនឹងចុះអនុវត្តគ្រប់ពេលទាំងអស់ តាមពេលវេលាជាក់ស្តែង ដែលអាចធ្វើបាន ដោយមិនមានជូនដំណឹងទៀតឡើយ។
លោក ឡេង ចន្ទសុភ័ត្រា ប្រធានសណ្ដាប់ធ្នាប់ខណ្ឌមានជ័យ សង្ឃឹមថា បងប្អូនអ្នកលក់ដូរនៅតាមទីតាំងខាងលើនឹងចូលរួម សហការជាមួយអាជ្ញាធរ ដោយភាពទទួលខុសត្រូវ ដើម្បីបញ្ជៀសនូវបញ្ហាផ្សេងៗដែលកើតឡើងជាយថាហេតុ ពិសេសរក្សាបានសណ្តាប់ធ្នាប់ អនាម័យ បរិស្ថាន និងសោភ័ណភាពល្អសម្រាប់ទីក្រុងភ្នំពេញយើងទាំងអស់គ្នា ៕