ភ្នំពេញៈ បុរសម្នាក់ សង្ស័យស្រវឹងស្រាធ្លាក់ភ្នែក បើករថយន្ត LEXUS LX470 មួយគ្រឿង ជ្រុលចង្កូតទៅបុករបាំងថ្មពុះចែកទ្រូងផ្លូវបែកខ្ទេចអស់២កង់ រួចរុញទៅផ្ទប់បង្គោលភ្លើងបំភ្លឺផ្លូវ ទ្រេត១ដើមទៀត ចំណែករថយន្តបានផ្ទប់ជាប់របាំងថ្ម បើកទៅមុខលែងរួច រីឯអ្នកបើកបរបានហោះផ្លោងទៅបោកនឹងកញ្ចាក់រថយន្ត បែកកញ្ចក់រថយន្ត តែសំណាងល្អមិនបង្កឲ្យមានអ្នករងរបួសទេ។
គ្រោះថ្នាក់ចរាចរណ៍នេះ កើតឡើងកាលពីវេលាម៉ោង១២នឹង៣០នាទីយប់រំលងអធ្រាត ឈានចូលថ្ងៃទី២៨ ខែធ្នូ ឆ្នាំ២០១៨ ស្ថិតនៅចំណុចមុខផ្សារសិនជូរីផ្លាហ្សា លើកំណាត់មហាវិថីសហពន្ធរុស្ស៊ី ក្នុងសង្កាត់កាកាប១ ខណ្ឌពោធិសែនជ័យ រាជធានីភ្នំពេញ។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនកើតហេតុ គេឃើញបុរសចំណាស់ម្នាក់ បើករថយន្តមួយគ្រឿង ម៉ាក LEXUS LX470 ពណ៌ស្ករ ពាក់ស្លាកលេខភ្នំពេញ 2AB-2610 ទិសដៅពីកើតទៅលិច លុះមកដល់ ចំណុចកើតហេតុខាងលើ បានរេចង្កូតទៅបុកក្បាលនាគពុះចែកទ្រូងផ្លូវ ប្រេះបែក២កង់ បណ្តាលឲ្យរបាំងថ្មរុញទៅផ្ទប់ នឹងបង្គោលភ្លើងបំភ្លឺផ្លូវ ទ្រេតអស់១ដើម ចំណែករថយន្តបង្កផ្ទប់នឹងរបាំងថ្មពុះចែកទ្រូងផ្លូវ រងការខូចខាតផ្នែកខាងមុខយ៉ាងដំណំ បើកទៅមុខលែងរួច។
ក្រោយកើតហេតុសមត្ថកិច្ចមូលដ្ឋានបានចុះមកដល់ រួចរាយការណ៍ប្រាប់ទៅសមត្ថកិច្ចជំនាញ ចុះមកធ្វើការវាស់វែងយករថយន្តបង្ក ទៅរក្សាទុកនៅការិយាល័យចរាចរណ៍ផ្លូវគោក នៃស្នងការនគរបាលរាជធានីភ្នំពេញ ដើម្បីរង់ចាំដោះស្រាយលើការខូចខាតទ្រព្យសម្បត្តិរដ្ឋ ទៅតាមផ្លូវច្បាប់៕