Friday, December 14, 2018

លោក គង់ គាំ នឹងស្នើសុំចូលធ្វើនយោបាយឡើងវិញ តបតាមសំណើសម្តេច ហ៊ុន សែន

រិទ្ធី

លោក គង់ គាំ អតីតទឹប្រឹក្សាគណបក្សសង្គ្រោះជាតិ បានប្រកាស​ច្បាស់​ថាលោក​នឹង​ធ្វើ​សំណើ​សុំ​ចូល​ធ្វើ​នយោបាយ​ឡើង​វិញ នៅ​ពេល​វិសោធនកម្ម​ច្បាប់​ស្ដី​ពី​គណបក្ស​នយោបាយ​ចូល​ជា​ធរមាន។

លោក គង់ គាំ បានអះអាងថាលោកបានវាយតម្លៃតាំងពីគណបក្សសង្គ្រោះជាតិមានបញ្ហាមកម្លេះ គណបក្សនេះមិនអាចមានវត្តមានក្នុងការធ្វើឱ្យរបបប្រជាធិបតេយ្យសេរីពហុបក្ស ហើយនិងបម្រើឆន្ទៈប្រជាពលរដ្ឋដែលចង់បានការផ្លាស់ប្តូរនោះទេ។ លោកបន្តទៀតថាលោកអន្ទះសារមែនទែន ហើយងឿយឆ្ងល់ហេតុអ្វីបានជាគាត់ត្រូវជាប់បំរាមមិនឱ្យធ្វើនយោបាយ ពីព្រោះគាត់គ្រាន់តែជាទីប្រឹក្សា មិនមានរចនាសម្ព័ន្ធក្នុងបក្សប្រឆាំងឡើយ។

អ្នកនយោបាយចាស់វស្សារូបនេះ សង្កត់ធ្ងន់​ថា បើ​សិន​លោក​មាន​ភ័ព្វ​សំណាង​បាន​ចូល​ធ្វើ​នយោបាយ​វិញ លោកនឹង​ទៅ​ឈរ​ជា​ទី​ប្រឹក្សា​នៃ​គណបក្ស​ឆន្ទៈ​ខ្មែរ ដែល​មាន​កូន​ប្រុស​លោក គឺ​លោក គង់ មុនីកា ជា​ប្រធាន​ ព្រោះ​លោក​លែង​មាន​ជំនឿ​ថា​គណបក្ស​សង្គ្រោះ​ជាតិ​អាច​រស់​ឡើង​វិញ​ហើយ​ ម្យ៉ាងវិញទៀតលោកសង្ឃឹមគណបក្សឆន្ទៈខ្មែរនឹងអាចនាំមកនូវការផ្លាស់ប្តូរតាមឆន្ទៈខ្មែរ។

ក្នុងមួយរយៈពេលចុងក្រោយនេះ អតីតទីប្រឹក្សាបក្សប្រឆាំង តែងតែវាយប្រហារមន្ត្រីជាន់ខ្ពស់អតីតបក្សប្រឆាំង ជាពិសេសលោក សម រង្ស៊ី។ លោក គង់ គាំ បានសរសេរថា៖ អនុវត្តច្បាប់គណបក្ស​នយោបាយ លោក សម រង្ស៊ី បានលាចេញពី​ CNRP (ទាំងតួនាទីប្រធាន​ ទាំងសមាជិកភាព) ភាពឯកជន ឯកោរបស់ សម រង្ស៊ី កាន់តែប្រឹងភ្ជាប់ជាមួយ​ CNRP កាន់តែបង្ហាញនូវចេតនាបំផ្លាញគេឯងដែលមិនរួមគំនិតជាមួយខ្លួន។​

គួររំលឹកថាកាលពីថ្មីៗនេះ សម្តេច ហ៊ុន សែន បានមានប្រសាសន៍ថា ថ្នាក់ដឹកនាំ​នៃ​អតីត​គណបក្ស​សង្គ្រោះ​ជាតិ អាច​នឹងមាន​ឱកាស​បាន​វិល​មកកាន់​ឆាកនយោបាយ​វិញ នៅពេល​ច្បាប់​ស្តីពី​គណបក្សនយោបាយ ត្រូវបានធ្វើ​វិសោធនកម្ម​រួចប៉ុន្តែ អ្នក​ទាំងនោះត្រូវ​ដាក់សំណើ ទៅកាន់​នាយករដ្ឋមន្ត្រី ឬ​រដ្ឋមន្ត្រី​មហាផ្ទៃ​ជាមុនសិន ហើយ​បន្ទាប់មក​ទើប​មានការ​ពិចារណា​ថា​ឲ្យ​ឬ​មិន​ឱ្យ​។

@Amapapa.News

Feature Ads