Loading...

Wednesday, December 5, 2018

ឆេះផ្ទះក្នុងបុរីចំការមន ​ស្លាប់ប្ដី ប្រពន្ធរងរបួស ដោយសារសន្តិសុខយាមបុរី ហាមឃាត់រថយន្តពន្លត់អគ្គិភ័យ ចូលពន្លត់យឺតពេល​

អាម៉ាប៉ាប៉ាញ៉ូស

​ភ្នំពេញៈ ឆេះផ្ទះមួយល្វែង ក្នុងបុរីចំការមន បណ្ដាលឲ្យស្ត្រីម្នាក់រងរបួស និងបុរសមាឌធំម្នាក់​ទៀត រលាក​ពេញខ្លួន ស្រែកហៅ​គេឲ្យ​ជួយ​ ស្រាប់តែ​វិលមុខ​ធ្លាក់ពីជាន់ទី២​ ដឹកដល់ពេទ្យស្លាប់។

គ្រោះអគ្គិភ័យនេះ បង្កឱ្យមានការភ្ញាក់ផ្អើល កាលពីវេលាម៉ោង១២និង១០នាទីយប់រំលងអធ្រាត្រឈានចូលថ្ងៃពុធ ទី៥ ខែធ្នូ ឆ្នាំ២០១៨ ស្ថិតនៅក្នុងបុរីចំការមន ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

សាក្សីដែលឃើញហេតុការណ៍ បានរៀបរាប់ប្រាប់ភ្នាក់ងារ ខេមប៉ុស្តិ៍ ឲ្យដឹងថា ដំបូងឡើយគេឃើញផ្ទះលេខG17 មានផ្សែងហុយចេញពីក្នុងផ្ទះ បង្កឲ្យមានការភ្ញាក់ផ្អើល​ឆោឡោ​ដល់ប្រជាពលរដ្ឋ ដែលរស់នៅជិតខាង ក៏នាំគ្នាយកបំពង់មកបាញ់អស់ចំនួន៨បំពង់ នៅតែ​មិនទាន់រលត់ ក៏បានទំនាក់ទំនងប្រាប់សមត្ថកិច្ចចុះមកអន្តគមន៍ និងហៅរថយន្តពន្លត់អគ្គិភ័យមកដល់កន្លែងកើតហេតុចំនួន៨គ្រឿង ហើយបានបាញ់អស់៣គ្រឿង ក៏រលត់ទៅវិញប្រើរយៈពេលជិត២ម៉ោង។

សមត្ថកិច្ច បានឲ្យដឹងថា ក្នុងហេតុការណ៍អគ្គិភ័យកំពុង​ឆាបឆេះ​ខាងលើនេះ សមត្ថកិច្ចបានសម្រេចចិត្ត​វាយបំបែកកញ្ចក់រថយន្តទំនើបមួយគ្រឿង ហើយនាំគ្នាជួយរុញទៅអែបរបង ខណៈស្រ្តីជាប្រពន្ធម្ចាស់ផ្ទះ បានរងរបួស ត្រូវបានរថយន្តពេទ្យដឹកទៅសង្រ្គោះភ្លាមៗផងដែរ ។ ចំណែកបុរស​ជាប្តី សមត្ថកិច្ចរកមិនឃើញ ពេលនោះសមត្ថកិច្ចកំពុងបាញ់ និងរុករកជាន់ទី១ និងជាន់ទី៣ ក៏មិនឃើញ រីឯជាន់ទីពីរ ត្រូវបានចាក់សោពីខាងក្នុងទៀត ហើយ​កម្លាំងសមត្ថកិច្ច ក៏បន្តបាញ់ទឹក និងរុករក ក៏ស្រាប់តែឃើញជនរងគ្រោះ បើកទ្វារចេញមករាលហាលខាងមុខនៅជាន់ទី២ ដោយខ្លួនប្រាណត្រូវភ្លើង​ឆេះរោលខ្មៅពេញខ្លួន ហើយគាត់ក៏ស្រែកឲ្យគេជួយ ស្រែបានបន្តិចស្រាប់តែគាត់ទំនងអស់ខ្យល់ ក៏ដួលផ្កាប់មុខធ្លាក់មកវិលមួយជុំបោកនឹងឥដ្ឋការ៉ូខាងក្រោម បណ្តាលឲ្យរងរបួសធ្ងន់ធ្ងរ ហើយត្រូវ​រថយន្តសង្គ្រោះបន្ទាន់របស់គ្លីនិកឯកជន ហុង​ ហាក់ ដឹកយកទៅសង្គ្រោះនៅមន្ទីរពេទ្យកាល់ម៉ែត្រ តែអកុសល ដោយយសារតែជនរងគ្រោះស្ថិតក្នុងស្ថានភាពធ្ងន់ធ្ងរខ្លាំង ហើយបានដាច់ខ្យល់ស្លាប់នៅលើ​រថយន្តតែម្ដង។

បច្ចុប្បន្ន​សាកសព​ មិនទាន់ស្គាល់អត្តសញ្ញាណទេ ត្រូវបានសាច់ញាតិដឹកយកទៅតម្កល់ ធ្វើបុណ្យតាមប្រពៃណី នៅវត្តសារ៉ាវត្តី ក្នុងខណ្ឌឫស្សីកែវ។

សមត្ថកិច្ចខាងពន្លត់អគ្គិភ័យក៏បានស្ដីបន្ទោស​យ៉ាងខ្លាំងចំពោះ​សន្តិសុខយាមបុរីខាងលើ ​ដែលមិន​អនុញាតអោយ​រថយន្តពន្លត់អគ្គិភ័យ​ ចូលទៅពន្លត់បានទាន់ពេលវេលានោះ​ លុះពេលចូលបានហើយ​ផ្លូវចូលក៏ត្រូវបាន​ម្ចាស់ផ្ទះ​ក្នុងបុរី បានយក​រថយន្ត​មកចត​ពេញផ្លូវ​ ទើបធ្វើឲ្យមានការពិបាកដល់រថយន្តពន្លត់អគ្គិភ័យ ទម្រាំ​តែបានចូលទៅដល់​កន្លែងកើតហេតុ​នោះ។

ចំពោះការខូចខាត រាល់សម្ភារៈផ្សេងៗនៅក្នុងផ្ទះ គឺត្រូវឆេះខ្ទេចស្ទើរតែទាំងស្រុង ហើយតាមសម្តីក្មួយម្ចាស់ផ្ទះបានប្រាប់ដឹងថា មូលហេតុបង្កឲ្យមានការឆេះនេះឡើង គឺមកពីឆ្លងចរន្តអគ្គីសនី៕

@Amapapa.News

Feature Ads