កោះកុងៈ ឪពុករវល់លក់ត្រី មិនបានចាប់អារម្មណ៍មើលកូន ហើយស្មានតែកូនដើរត្រឡប់ទៅផ្ទះវិញខ្លួនឯង ស្រាប់តែកូនប្រុស អាយុ៤ឆ្នាំ ធ្លាក់ទឹកលង់ស្លាប់យ៉ាងអាណោចអាធ័ម បង្កឲ្យមានការភ្ញាក់ផ្អើលកាលពីវេលាម៉ោង៩យប់ថ្ងៃទី៤ ខែធ្នូ ឆ្នាំ២០១៨ ត្រងចំណុចផែទិញផលនេសាទ របស់ឈ្មោះ តាំង កេ ស្ថិតក្នុងភូមិកោះស្តេច ឃុំកោះស្តេច ស្រុកគិរីសាគរ ខេត្តកោះកុង។
បើតាមការឲ្យដឹងពីឈ្មោះ ញ៉ាញ់ ភេទប្រុស អាយុ៣៨ឆ្នាំ មុខរបរនេសាទ (ឪពុកក្មេងរងគ្រោះ) បានឲ្យដឹងថា កូនរបស់គាត់(ក្មេងរងគ្រោះ) ឈ្មោះ ញ៉ាញ់ ដាវិន ភេទប្រុស អាយុ៤ឆ្នាំ។
គាត់បានបន្តថា នៅពេលដែលគាត់ត្រឡប់មកពីនេសាទវិញ គាត់បានយកត្រីទៅលក់ ហើយកូនគាត់ ក៏បានអង្គុយលេងទូរស័ព្ទនៅទីនោះដែរ ហើយគាត់រវល់តែលក់ត្រី ទើបមិនបានចាប់អារម្មណ៍មើលកូន រហូតដល់លក់ត្រី រួចមិនឃើញកូនគាត់ ហើយគាត់ស្មានថា កូនគាត់ទៅផ្ទះមុន គាត់ក៏បានទៅមើលនៅផ្ទះ ពេលទៅដល់ផ្ទះ មិនឃើញកូន ក៏បានឆោឡោ ហើយនាំគ្នារក ស្រាប់តែឃើញកូនគាត់ធ្លាក់ទឹក លង់ស្លាប់បាត់ទៅហើយ។
ក្រោយការពិនិត្យពីសមត្ថកិច្ចជំនាញរួចក៏បានប្រគល់សពក្មេងរងគ្រោះ អោយទៅឪពុកម្តាយដើម្បីយកទៅធ្វើបុណ្យតាមប្រពៃណី៕