ភ្នំពេញ៖ កាលពីល្ងាចថ្ងៃទី០១ ខែធ្នូ ឆ្នាំ២០១៨នេះលោក ផែង ហេង មេធាវីមួយរូប នៅក្នុងចំណោមសហមេធាវីទាំង៤រូបរបស់លោក កឹម សុខា អតីតប្រធានគណបក្សសង្រ្គោះជាតិ បានថ្លែងបដិសេធព័ត៌មាន ឯកអគ្គរដ្ឋទូតអាមេរិកចប់អាណត្តិ ចូលជួបលោក កឹម សុខា មុនចាកចេញពីកម្ពុជា បានឲ្យដឹងថា នៅពេលមុនពេលចាកចេញពីកម្ពុជាឯកអគ្គរដ្ឋទូតអាមេរិកលោក William Heidt មិនបានជួបលោក កឹម សុខា នោះទេ។
ការចេញមកថ្លែងបដិសេធរបស់សហមេធាវីការពារក្តីរបស់លោក កឹម សុខា ខាងលើនេះធ្វើឡើង បន្ទាប់ពីមានបណ្តាញទំនាក់ទំនង Facebook មួយចំនួនបានសរសេរថា «ឯកអគ្គរដ្ឋទូតអាមេរិកចប់អាណត្តិ ចូលជួបលោក កឹម សុខា មុនចាកចេញពីកម្ពុជា។ នៅវិនាទីចុងក្រោយ មុនបព្ចាប់អាណត្តិនៅកម្ពុជា លោកទូតអាមេរិក បានលាតត្រដាងបេះដូងពិត កោតសរសើរលោកប្រធាន កឹម សុខា ដែលបង្ហាញការពិតដូច្នេះ ហាក់ដូចជាផ្តល់កិត្តិយសខ្លាំងដល់អ្នកសង្រ្គោះជាតិនិយម»។
