header ads

Sponsor

ព្រះ​សីហ​នុៈ ជនដៃដល់​ជាជនជាតិចិន ​ចំនួន​៣នាក់​ បាន​យកកាំបិត និង​កាំភ្លើង​ ភ្ជង់​គំរាមកំហែង​​បុរសជាជនជាតិចិនម្នាក់ទៀត​ ហើយ​ត្រូវសមត្ថកិច្ច​ចាប់​ឃាត់ខ្លួន​ជនសង្ស័យ​បាន​ម្នាក់ ពាក់ព័ន្ធនឹងករណី​មនុស្សឃាត​ដោយ​ចេតនា (តែ​មិន​បាន​សម្រេច) មួយបាន​​កើតឡើង​កាលពី​វេលា​ម៉ោង​៧​និង​៥០​នាទី ​យប់​ថ្ងៃ​ទី​៣១ ខែធ្នូ ឆ្នាំ​២០១៨ នៅ​ក្រុម​ទី​៦ ភូមិ​២ សង្កាត់​២ ក្រុងព្រះសីហនុ ខេត្ត​ព្រះ​សីហ​នុ ។

ជន​រង​គ្រោះ​ឈ្មោះ LIN YONGFEI ភេទ​ប្រុស អាយុ​៣៩​ឆ្នាំ ជា​ជនជាតិ​ចិន មុខរបរ​វិស្វករ ស្នាក់​នៅផ្ទះ​ជួល ក្នុងភូមិ​២ សង្កាត់​៤ ក្រុងព្រះសីហនុ ខេត្ត​ព្រះ​សីហ​នុ បាន​រង​របួស​ស្នាម​ជាំ​នៅ​កញ្ចឹងក ។ ជនសង្ស័យ​ឈ្មោះ ZHANG HONG ភេទ​ប្រុស អាយុ​២៩​ឆ្នាំ ជា​ជនជាតិ​ចិន លិខិតឆ្លងដែន​លេខ​EE៧២៨៥៨០៧ មុខរបរ​មិន​ពិតប្រាកដ ស្នាក់​នៅ​មិន​ពិតប្រាកដ ។ វត្ថុ​តាង​ដែល​ស​ត្ថ​កិច្ច​ចាប់​យក​មានកូន​កាំបិត​ស្នៀត​១​ដើម ។

ប្រភព​ព័ត៌មាន​បានឱ្យ​ដឹង​ថា ជនសង្ស័យ​ចំនួន​៣​នាក់​ជា​ជនជាតិ​ចិន​បាន​ធ្វើ​សកម្មភាព​សម្រុកចូល​ក្នុង​រថយន្ត​របស់​ជន​រង​គ្រោះជា​ជនជាតិ​ចិន ពេល​ដែល​ជន​រង​គ្រោះ​កំពុង​ឡើង​រថយន្ត​ជិះ​ត្រឡប់​ទៅ​ផ្ទះ​វិញ ដោយ​ជនសង្ស័យ​ទាំង​៣​នាក់​នោះ​ មានកូន​កាំបិត​ស្នៀត​១​ដើម និង​កាំភ្លើងខ្លី ១​ដើម ក្នុង​ពេល​ដែល​ជនសង្ស័យ​កំពុង​វាយ និង​យក​កាំភ្លើង​ភ្ជង់​គំរាមកំហែង​ជីវិត​របស់​ជន​រង​គ្រោះ​នៅ​ក្នុង​រថយន្ត ក៏​ត្រូវ​កម្មករ​របស់​ជន​រង​គ្រោះ​ឃើញ ហើយ​មានការ​ឆោ​រ​ឡោ​ឡើង ពេល នោះ​ជនសង្ស័យ​ទាំង​៣​នាក់​បាន​នាំ​គ្នា​រត់គេច​ខ្លួន​អស់ ។

បន្ទាប់​ពី​បាន​ទទួល​ព័ត៌មាន​ខាងលើ​នេះ កម្លាំង​ជំនាញ​ផែន​នគរបាល​ព្រហ្មទណ្ឌ សហការ​ជាមួយ​កម្លាំង​អធិការដ្ឋាន​នគរបាល​ក្រុងព្រះសីហនុ និង​កម្លាំង​ប៉ុស្តិ៍​នគរបាល​សង្កាត់​២ បាន​ធ្វើការ​ស្រាវជ្រាវ​រហូត​ចាប់ខ្លួន​បាន​ជនសង្ស័យ​១​នាក់ ។ ចំណែក​ជនសង្ស័យ​២​នាក់ ដែល​រត់គេច​ខ្លួន កម្លាំង​សមត្ថកិច្ច​ជំនាញ​កំពុង​ស្វែងរក​ចាប់ខ្លួន ។

ករណី​នេះ​ការិយាល័យ​នគរបាល​ព្រហ្មទណ្ឌ​កម្រិត​ស្រាល​កំពុង​កសាង​សំណុំរឿង​បញ្ជូន​ទៅ​សាលាដំបូង​ខេត្ត ដើម្បី​ចាត់ការ​តាម​ផ្លូវច្បាប់ ៕

ផ្ដល់សិទ្ធិដោយ៖ campost.news

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post