Monday, January 14, 2019

ចាប់ទាំងអ្នកលក់ និងប្រើប្រាស់២នាក់ ដកហូតថ្នាំញៀន៥៣កញ្ចប់ នៅផ្លូវ៦០ម៉ែត្រ

ភ្នំពេញៈ កម្លាំងនគរបាលខណ្ឌមានជ័យ សហការជាមួយកម្លាំងប៉ុស្តិ៍ចាក់អង្រែលើ បានធ្វើការស្រាវជ្រាវ​ និងឃាត់ខ្លួនមុខសញ្ញាជួញដូរ​គ្រឿងញៀនម្នាក់ ដកហូតថ្នាំញៀន​៥០កញ្ចប់តូច ​ស្របពេលជាមួយគ្នានោះ កម្លាំងបានឃាត់ខ្លួនជនសង្ស័យម្នាក់ទៀត បន្ទាប់ពីសុំធ្វើការឆែកឆេរ​ឃើញមានគ្រឿងញៀន ចំនួន​៣កញ្ចប់​តូច នៅវេលា​ម៉ោង​៩៖៣០នាទីព្រឹក ថ្ងៃចន្ទ​ ទី១៤ ខែមករា​ ឆ្នាំ២០១៩ នៅចំណុចមុខមិនរៀបរយ(វាលខ្សាច់​) ផ្លូវ​៦០ម៉ែត្រ ក្រុមទី៨ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

លោក​ អុំ​ រតនា​ នាយប៉ុស្តិនគរបាលចាក់អង្រែលើ​ បានប្រាប់ឲ្យភ្នាក់ងារ​ CAM POST​​ ឲ្យដឹងថា នៅមុនកើតហេតុ​ កម្លាំងល្បាតប៉ុស្តិ៍នគរបាល​ចាក់អង្រែលើ​ បានសហការជាមួយនឹងកម្លាំងល្បាតអធិការខណ្ឌមានជ័យ ធ្វើការស្រាវជ្រាវ​ និងឃាត់ខ្លួនមុខសញ្ញាជួញដូរ​គ្រឿងញៀន​ ​ដោយធ្វើការត្រួតពិនិត្យ ឆែកឆេរ រកឃើញ​ក្រាមពណ៌សថ្លា (សង្ស័យជាគ្រឿងញៀន) ចំនួន៥០កញ្ចប់ថង់តូច ​ស្របពេលជាមួយគ្នានោះ​ កម្លាំងបានធ្វើការឃាត់ខ្លួនជនសង្ស័យម្នាក់ទៀត បន្ទាប់ពីសុំធ្វើការឆែកឆេរ​ ឃើញមានគ្រឿងញៀនចំនួន​៣កញ្ចប់​តូច ហើយកម្លាំងសមត្ថកិច្ចក៏បានឃាត់ខ្លួនជនសង្ស័យទាំងពីរនាក់ យកមកសាកសួរនៅស្នាក់ការនគរ​បាលប៉ុស្តិ៍ចាក់អង្រែលើ​តែម្តង។

សមត្ថកិច្ចបន្តថា ​ជនសង្ស័យទាំង២នាក់ ទី១-​ឈ្មោះ ឯក​ ឌីម ភេទស្រី​ អាយុ២០ឆ្នាំ ស្នាក់នៅកន្លែងកើតហេតុខាងលើ, ទី២-ឈ្មោះ​ នុត ចន្ថា ភេទប្រុស​ អាយុ២១ឆ្នាំ ស្នាក់នៅការដ្ឋានសំណង់ សង្កាត់ស្ទឹងមានជ័យ​ ខណ្ឌមានជ័យ​ មានស្រុកកំណើតនៅឯខេត្តស្វាយរៀង។

បច្ចុប្បន្ន ​​ជន​សង្ស័យទាំង២នាក់ខាងលើ រួមទាំង​វត្ថុតាង ត្រូវសមត្ថកិច្ចឃុំខ្លួនបណ្តោះអាសន្ន​ នៅអធិការដ្ឋាននគរ​បាល​ខណ្ឌមានជ័យ ដើម្បី​កសាង​​សំណុំ​រឿងចាត់តាមនីតិវិធីច្បាប់៕

Feature Ads