Wednesday, January 9, 2019

ឆ្មក់បង្រ្កាបទីតាំងហ្គេមបាញ់ត្រីមួយកន្លែង ក្នុងសង្កាត់ស្ទឹងមានជ័យ២ ឃាត់ខ្លួនជនសង្ស័យ​៣​នាក់​ ជាមុខសញ្ញា​លួច​កាច់ក.​ម៉ូតូ

ភ្នំពេញៈ កម្លាំង​សមត្ថកិច្ច​ព្រហ្មទណ្ឌកម្រិត​ស្រាលខណ្ឌមានជ័យ បានធ្វើការបង្ក្រាបទីតាំង​ហ្គេម​បាញ់​ត្រី​មួយកន្លែង និងឃាត់ខ្លួន​ជនសង្ស័យ​៣​នាក់ ​ជា​មុខសញ្ញា​ខាង​លួច​កាច់ក.​ម៉ូតូយ៉ាងសកម្ម។ ដែលប្រតិបត្តិការនេះធ្វើឡើង ​កាលពី​ព្រឹក​ថ្ងៃទី​៨ ខែមករា ​ស្ថិតនៅ​ក្នុងភូមិ​ភ្នា​ត សង្កាត់​ស្ទឹងមានជ័យ​២ ខណ្ឌមានជ័យ រាជធានី​ភ្នំពេញ។

សមត្ថកិច្ចបានឲ្យដឹងថា ក្នុងប្រតិបត្តិការនេះ សមត្ថកិច្ច​បាន​រឹបអូស​យក​ម៉ូតូ១គ្រឿង​ ម៉ាក​កា​វ៉ា​សា​គី ពាក់​ស្លាក​លេខ ខេមរភូមិន្ទ ដែល​គេ​ជឿថា​ជាឧបករណ៍ នៃ​មធ្យោបាយ​ប្រើប្រាស់​សម្រាប់ធ្វើ​សកម្មភាព​លួច​ទូទៅ​របស់​ជនសង្ស័យ​ទាំង​៣​នាក់​នោះ​។​ ​ចំណែកជនសង្ស័យ​ទាំង​៣​នាក់ បាន​ប្រើប្រាស់​ទីតាំង​ហ្គេម​បាញ់​ត្រី​នោះ ជា​កន្លែង​ពួន​សម្ងំ ក្រោយ​ការធ្វើសកម្មភាព​លួច​នៅ​ខាងក្រៅ​។

បើតាម​សម្តី​ពី​សមត្ថកិច្ច​ព្រហ្មទណ្ឌ​កម្រិត​ស្រាល បានឲ្យដឹងថា មុនពេល​ចុះ​ចាប់មុខសញ្ញា​ជំនាញ​ខាង​កាច់​ក.​ម៉ូតូ​ទាំង​៣​នាក់ ដែល​ជិះ​ម៉ូតូ​ម៉ាក​កា​វ៉ា​សា​គី ពាក់​ស្លាក​លេខ ខេមរភូមិន្ទ នៅផ្ទះ​បើក​ទូរ​ហ្គេម​បាញ់​ត្រី ដែលជា​ប្រភេទ​ល្បែងស៊ីសង​នេះ គឺ​យោងតាម​ពាក្យបណ្តឹង​ពី​ជនរងគ្រោះ ដែល​បាន​បាត់​ម៉ូតូ​ម៉ាក់ MSX (​ស្លាក​លេខ​ត្រូវ​ជនសង្ស័យ​កាច់​ចេញ​បាត់​ហើយ​) កាលពី​យប់​វេលា​ម៉ោង​៣​ជាង​ទៀបភ្លឺ ថ្ងៃទី​៨ ខែមករា ឆ្នាំ​២០១៩ នៅ​សង្កាត់​កំពង់​សំណាញ់ ក្រុង​តាខ្មៅ ដោយ​ជនរងគ្រោះ​បាន​ស្គាល់​មុខសញ្ញា​ និង​តាមដាន​ដឹងថា ជនសង្ស័យ​ដែល​ធ្វើ​សកម្មភាព​លួច​កាច់ក.​ម៉ូតូ រួចមក​ពួន​លាក់ខ្លួន​ក្នុងផ្ទះ​បើក​ទូរ​ហ្គេម​បាញ់​ត្រី​ខាងលើ។ បន្ទាប់មកបាន​ធ្វើការ​ទំនាក់ទំនង​ទៅ​សមត្ថកិច្ច​ព្រហ្មទណ្ឌកម្រិត​ស្រាល​ភ្លាមៗ ចុះមក​ក្របួច​បានតែ​ម្តង ដោយ​មិន​រំខាន​ដល់​កម្លាំង​សមត្ថកិច្ច​ស្ទឹងមានជ័យ​២​នោះទេ។​

យោងតាម​សម្តី​ជនរងគ្រោះ​ បាន​ប្រាប់​ឲ្យដឹងថា ម៉ូតូ​របស់គាត់​បាន​ចត​ទុក​នៅមុខ​បន្ទប់​ជួល ដោយ​ចាក់សោ.ក ​រួច​ដើរចូល​ក្នុង​បន្ទប់​ដោយ​ដើរ​បញ្ច្រាស់ទិស​ជាមួយ​ជនសង្ស័យ ស្រាប់តែ​បាន​ប៉ុន្មាន​ម៉ោង​ក្រោយមក ក៏​បាត់​ម៉ូតូ ទើប​មានការ​ភ្ញាក់ផ្អើល ហើយ​ជិះ​ដើររក​ទើប​ដឹងថា ជនសង្ស័យ​ពួន​នៅ​ទីតាំង​ខាងលើ​ក៏​ប្តឹងទៅ​សមត្ថកិច្ច​ព្រហ្មទណ្ឌកម្រិត​ស្រាល​ចុះមក​ក្របួច​បានតែ​ម្តង។​

ក្រោយ​ក្របួច​បាន​ជនសង្ស័យ​ចំនួន​៣​នាក់ ជំនាញ​ខាង​កាច់​ក​.​ម៉ូតូ​រួច សមត្ថកិច្ច​បាន​ដកហូត​វត្ថុតាង​រួមមាន៖ ម៉ូតូ​២​គ្រឿង មួយគ្រឿង ម៉ាក​កា​វ៉ា​សា​គី ដែល​ពាក់​ស្លាក​លេខ ខេមរៈភូមិន្ទ សម្រាប់​ជិះ​ធ្វើ​សកម្មភាព និង​មួយគ្រឿង​ទៀត ម៉ាក MSX ជា​របស់​ជនរងគ្រោះ។

បច្ចុប្បន្ន ជនសង្ស័យ​ទាំង៣នាក់ និង​វត្ថុតាង សមត្ថកិច្ចកំពុង​កសាង​សំណុំរឿង​ចាត់ការ​តាម​នីតិវិធី​ច្បាប់៕

Feature Ads