Saturday, January 26, 2019

ឆ្មក់បង្ក្រាបគ្រឿងញៀន ក្នុងផ្ទះសំណាក់យីហោ "១៦" ឃាត់មនុស្សប្រុសស្រី៩នាក់ ដកហូតកាំភ្លើងមួយដើម និងថ្នាំញៀនមួយចំនួន

ភ្នំពេញៈ កម្លាំងនគរបាលការិយាល័យ​ប្រឆាំង​គ្រឿងញៀន​រាជធានី​ភ្នំពេញ​ បាន​ចុះ​បង្ក្រាប​ជាក់ស្ដែង​ ​ករណី​ជួញ​ដូរ​​សារធាតុ​ញៀន​ នៅ​ចំណុច​ផ្ទះ​សំណាក់​យីហោ​ ១៦ (អតីតផ្ទះសំណាក់ មុនីកា) ដោយធ្វើ​ការឃាត់ខ្លួនជនប្រុសស្រីបានចំនួន៩នាក់ (ក្នុងនោះមានទាំងមេការផ្ទះសំណាក់​ម្នាក់ផងដែរ) និងដកហូតថ្នាំ​ញៀន​ចំនួន២កញ្ចប់​ (១កញ្ចប់ធំ​ ១កញ្ចប់តូចល្មម)។

ប្រតិបត្តិការ​បង្ក្រាបគ្រឿងញៀន​នេះ ធ្វើ​ឡើ​ងកាលពីម៉ោង៨៖៥០នាទីយប់​ ថ្ងៃទី២៥​ ខែមករា​ ឆ្នាំ២០១៩ នៅ​ចំណុច​ផ្ទះ​សំណាក់​យីហោ​ ១៦ (អតីតផ្ទះសំណាក់ មុនីកា) ស្ថិតនៅតាមបណ្ដោយផ្លូវ៤៦០ ក្រុម២២ ភូមិ៤ សង្កាត់ទួលទំពូង១ ខណ្ឌចំការមន​ រាជធានីភ្នំពេញ។

ប្រតិបត្តិការនេះដែរ ដោយ​មាន​ការ​បញ្ជា​ផ្ទាល់​តាម​តាម​រយៈ​ទូរស័ព្ទ​ពី​លោក​ ហេង​ ផេង​ ព្រះ​រាជ​អាជ្ញា​រង​នៃ​អយ្យការ​អម​សាលា​ដំបូង​រាជធានី​ភ្នំពេញ​ និង​ការចូលរួម​ផ្ទាល់​ពីលោក​ ទេព​ សុវាត្តិ​ ក្រឡា​បញ្ជី​អម ​បានឲ្យ​មន្ត្រី​អនុវត្ត​ច្បាប់ ​ការិយាល័យ​ប្រឆាំង​គ្រឿងញៀន​រាជធានី​ភ្នំពេញ​ ដឹកនាំដោយលោកវរសេនីយ៍ត្រី រ៉ឹម ម៉ិច នាយរងការិយាល័យ ចូលរួមពីកម្លាំងសមត្ថកិច្ចប៉ុស្តិ៍មូលដ្ឋាន ​ចុះ​បង្ក្រាបផ្ទះសំណាក់​ខាងលើ​ ដោយដកហូត​វត្ថុ​តាង​មួយ​ចំនួន​រួម​មាន ​៖​ ១​.ក្រាម​ពណ៌​ស​ថ្លា​សង្ស័យ​ជា​គ្រឿង​ញៀន​ចំនួន​២កញ្ចប់​ថង់​ ។ ២.ឧបករណ៍​សម្រាប់​ប្រើ​ប្រាស់​គ្រឿង​ញៀន​ចំនួន​២ ។ ៣.ដេក​កេះ​ជ័រ​ចំនួន​៣​ ។ ៤.ទូរសព្ទ​ដៃ​ចំនួន​មួយ​គ្រឿង ​ពី​ឈ្មោះ​ លីវ​ មាយ៉ា​ ភេទ​ស្រី​អាយុ​១៩ឆ្នាំ​។

ដោយ​បានការ​សម្រេច ​ពីលោក​ព្រះ​រាជ​អាជ្ញា​រង​ ហេង ​ផេង ​ឲ្យ​ធ្វើ​ការ​ឆែកឆេរ​បន្ទប់​​ផ្សេង​ៗទៀត​ នៃ​ផ្ទះ​សំណាក់​១៦ ខាងលើ ទើ​បកម្លាំងបន្តធ្វើ​ការឆែកឆេរតាមបន្ទប់​ដូចខាងក្រោម​​ ១.​ បន្ទប់​លេខ​១​១ កម្លាំងបានធ្វើ​ការឆែកឆេរ និងដកហូត​សម្ភារៈ​រួម​មាន​ ឧបករណ៍​សម្រាប់​ប្រើ​ប្រាស់​គ្រឿង​ញៀន​ចំនួន​មួយឈុត​ រួមទាំងដែក​កេះ​ជ័រ​ ចំនួន​២​ ហើ​យដកហូត​យក​វត្ថុតាង និងធ្វើ​ការឃាត់​ខ្លួន​មនុស្ស​ចំនួន​២​នាក់​ ឈ្មោះ តាំង​ ឈុងប៊ួយ​ ភេទ​ស្រី​ អាយុ​៣០ឆ្នាំ​ និងឈ្មោះ អ៊ុន​ សាវេត​ថានិត​ ភេទ​ស្រី​ អាយុ​២០ឆ្នាំ​ ។

២.បន្ទប់​លេខ​១​២ កម្លាំងបានធ្វើ​ការឆែកឆេរ​ និងដកហូត​សម្ភារៈ​រួម​មាន​ ឧបករណ៍​សម្រាប់​ប្រើ​ប្រាស់​គ្រឿង​ញៀន​ចំនួន​មួយឈុត ដេក​កេះ​ជ័រ​ ចំនួន​៣​ និងទូរស័ព្ទ​ចំនួន​២គ្រឿង ​និង​ធ្វើ​ការឃាត់ខ្លួនមនុស្ស​ម្នាក់ ឈ្មោះ​ លី​ វិបុល​ ភេទ​ប្រុស ​អាយុ​៣២ឆ្នាំ​ ។

៣.បន្ទប់​លេខ​​២១ កម្លាំងបានធ្វើ​ការឆែកឆេរ​ និងដកហូត​សម្ភារៈ​រួម​មាន​ ឧបករណ៍​សម្រាប់​ប្រើ​ប្រាស់​គ្រឿង​ញៀន​ចំនួន​មួយឈុត​ ដេក​កេះ​ជ័រ​ចំនួន​២។

៤.បន្ទប់​លេខ​​២២ កម្លាំងបានធ្វើ​ការឆែកឆេរ​ និងដកហូត​សម្ភារៈ​រួម​មាន​ ឧបករណ៍​សម្រាប់​ប្រើ​ប្រាស់​គ្រឿង​ញៀន​ចំនួន​មួយឈុត​ និងអាវុធ​ខ្លី​មួយ​ដើម ​ម៉ាក​K59 បង់​មួយ​ មានគ្រាប់​ចំនួន​៨​ និងលេខ៨៧៧៨ និង​ធ្វើ​ការឃាត់ខ្លួនមនុស្ស​ចំនួន​៤នាក់​ ​ឈ្មោះ​ដូច​ខាង​ក្រោម​៖ ឈ្មោះ​​ សួន​កុម្ភៈ​ ភេទ​ប្រុស​ អាយុ​២០ឆ្នាំ​ ។ ឈ្មោះ​ សៀ​ សុថុនា​ ភេទ​ប្រុស​ អាយុ​១៩ឆ្នាំ​។ ឈ្មោះ​ ហ៊ាង​ ផល្លី​ ភេទ​ប្រុស​ អាយុ​២៤ឆ្នាំ​។ ឈ្មោះ​ ហ៊ួរ​ សីហា​ ភេទ​ប្រុស​ អាយុ​២៩ឆ្នាំ​។

ក្រោយ​ពី​ការ​ឆែកឆេរ​រួច​ ដោយ​បាន​ការ​សម្រេច​ពី​លោក​ ហេង​ ផេង​ ឲ្យ​នាំ​ខ្លួន​ជន​សង្ស័យ​ចំនួន​៩នាក់​ ​ទៅ​ការិយាល័យ​ប្រឆាំង​គ្រឿងញៀន ​រួម​មាន​៖ ១​ ឈ្មោះ​ លីវ​មាយ៉ា​ ភេទ​ស្រី​ អាយុ​១៩ឆ្នាំ​។ ២​ ​ឈ្មោះ​ តាំង​ ឈុង​ប៊ួយ​ ភេទ​ស្រី​ អាយុ​២០ឆ្នាំ​​។ ៣.​ឈ្មោះ​​​ អ៊ុន​ សាវេតថានិត​ ភេទ​ស្រី អាយុ​២០ឆ្នាំ​។ ៤.ឈ្មោះ​ លី​ វិបុល​ ភេទ​ប្រុស​ អាយុ​៣២ឆ្នាំ​។ ៥​.ឈ្មោះ​ សួន​ កុម្ភៈ​ ភេទ​ប្រុស​ អាយុ​២០ឆ្នាំ​។ ៦.ឈ្មោះ​ សៀ​ សុថុនា​ ​ភេទ​ប្រុស ​អាយុ​១៩ឆ្នាំ​។ ៧.ឈ្មោះ​ ហ៊ាង​ ផល្លី​ ភេទ​ប្រុស ​អាយុ​២៤ឆ្នាំ។ ​៨.ឈ្មោះ​ ហ៊ួរ​ សីហា​ ភេទ​ប្រុស ​អាយុ​២៩ឆ្នាំ​។ ៩.ឈ្មោះ​ អៀង​ សុខឡា​ ភេទ​ប្រុស​ អាយុ​៣១ឆ្នាំ​។

ក្រោយប្រតិបត្តិការ លោក​ព្រះរាជអាជ្ញា​រង ហេង ផេង សម្រេច​ឲ្យបិទទ្វារផ្ទះសំណាក់ខាងលើ ជាបណ្ដោះអាសន្ន រួចប្រគល់ឲ្យអាជ្ញាធរមូលដ្ឋានធ្វើការគ្រប់គ្រង។ ចំណែកជនសង្ស័យ​ ត្រូវបាននាំឡើ​ងរថយន្ត បញ្ជូនទៅ​ការិយាល័យ​ប្រឆាំងគ្រឿងញៀន​ រាជធានីភ្នំពេញ​ ដើ​ម្បីធ្វើ​ការសាកសួរ​ និង​ធ្វើ​តេស្តទឹកនោម​ រកសារធាតុញៀន​។

ក្រោយពីធ្វើ​តេស្តរកសារធាតុញៀន​ សមត្ថកិច្ចរកឃើញជនប្រុសស្រីទាំង៨នាក់ មាន​​ជាប់សារធាតុញៀន រីឯ​បុរសម្នាក់ ជា​មេការផ្ទះសំណាក់ គ្មានសារធាតុញៀន ប៉ុន្តែបាន​ផ្ដល់ទីតាំង​ប្រើ​ប្រាស់គ្រឿងញៀន សមត្ថកិច្ចទុកបន្តធ្វើ​ការសាកសួរតាមនីតិវិធី៕

Feature Ads