ភ្នំពេញៈ បើយោងតាមឯកសារ ដែលទើបទទួលបាន កម្ពុជា និងវៀតណាម បានយល់ព្រមដំឡើងកម្រិតច្រកទ្វារព្រំដែនម៉ឺនជ័យ (ខេត្តព្រៃវែង) តឹនណាម (ខេត្តតៃនិញ) ទៅជាច្រកទ្វារព្រំដែនអន្តរជាតិតែម្ដង។នេះបើតាមសេចក្តីប្រកាសរួម ក្រោយកិច្ចប្រជុំលើកទី១០ ស្តីពីកិច្ចសហប្រតិបត្តិការ និងការអភិវឌ្ឍបណ្តាខេត្តជាប់ព្រំដែន កម្ពុជា-វៀតណាម ក្រោមអធិបតីភាពសម្តេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ជាមួយលោក ផាម ប៊ិញមីញ ឧបនាយករដ្ឋមន្រ្តី រដ្ឋមន្រ្តីក្រសួងការបរទេសវៀតណាម នាថ្ងៃទី៩ និងថ្ងែទី១០ ខែមករា ឆ្នាំ២០១៩ នៅទីក្រុងហូជីមិញ នៃសាធារណរដ្ឋសង្គមនិយមវៀតណាម។
សេចក្ដីប្រកាសរួមនេះ បានឲ្យដឹងថា ភាគីទាំងពីរ កម្ពុជា-វៀតណាម សម្រេចឲ្យបានឆាប់នូវកិច្ចការត្រៀមរៀបចំនានា ដើម្បីសម្ពោធដាក់ឲ្យប្រើប្រាស់ជាផ្លូវការ ច្រកទ្វារអន្តរជាតិនេះ នៅពេលវេលាសមស្រប ក៏ដូចជាការបញ្ចប់បែបបទ ដំឡើងកម្រិតច្រកទ្វារតំបន់ព្រំដែនបុសមន (ខេត្តស្វាយរៀង)- ភឿកតឺន (ខេត្តតៃនិញ) ទៅជាច្រកទ្វារព្រំដែនទ្វេភាគី។
ក្រៅពីការឯកភាពដំឡើងកម្រិតច្រកទ្វារព្រំដែនម៉ឺនជ័យ (ខេត្តព្រៃវែង) តឹនណាម (ខេត្តតៃនិញ) ទៅជាច្រកទ្វារព្រំដែនអន្តរជាតិ សេចក្ដីប្រកាសរួមដដែល មានខ្លឹមសារដូចខាងក្រោម ៖
-ភាគីទាំងពីរ បានសង្កត់ធ្ងន់អំពីសារសំខាន់នៃការថែរក្សាទំនាក់ទំនងជាមិត្តភាព និងសហប្រតិបត្តិការ បណ្តាខេត្តព្រំដែនកម្ពុជា-វៀតណាម ក៏ដូចជាពង្រឹងពង្រីកចំណងទំនាក់ទំនងក្នុងលក្ខណៈជាភូមិផងល្អ ប្រសើរ មិត្តភាពជាប្រពៃណី កិច្ចសហប្រតិបត្តិការលើគ្រប់វិស័យ ឋិតថេរ យូរអង្វែង រវាងកម្ពុជា និងវៀតណាម។
-ភាគីទាំងពីរ បានវាយតម្លៃខ្ពស់ចំពោះការផ្លាស់ប្តូរដំណើរទស្សកិច្ចទៅវិញទៅមក រវាងថ្នាក់ដឹកនាំជាន់ខ្ពស់នៃប្រទេសទាំងពីរ។
-ភាគីទាំងពីរ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់បណ្តាក្រសួង ស្ថាប័ន នៃប្រទេសទាំងពីរ ក្នុងកិច្ចសហប្រតិបត្តិការកសាងក្របខណ្ឌច្បាប់យ៉ាងសកម្ម និងដំណើរការគ្រប់យន្តការសហប្រតិបត្តិការនានា សំដៅបង្កលក្ខណៈងាយស្រួលដល់កិច្ចសហប្រតិបត្តិការរបស់ខេត្តជាប់ព្រំដែន ស្របទៅតាមទិសដៅដែលដាក់ចេញ នាកិច្ចប្រជុំលើកទី៩ ស្តីពីកិច្ចសហប្រតិបតិ្តការ និងការអភិវឌ្ឍបណ្តាខេត្តជាប់ព្រំដែនកម្ពុជា-វៀតណាម។
-ភាគីទាំងពីរ បានវាយតម្លៃខ្ពស់អំពីសារសំខាន់នៃកិច្ចសហប្រតិបត្តិការសន្តិសុខ ការពារជាតិក្នុងការថែរក្សា ឲ្យបានរឹងមាំនូវសន្តិភាព ស្ថិរភាព សន្តិសុខរបស់ប្រទេសនីមួយៗ និងគូសបញ្ជាក់សាជាថ្មីថា មិនអនុញ្ញាតឲ្យមានអង្គការចាត់តាំង ឬបុគ្គលណាមួយ ប្រើប្រាស់ទឹកដីរបស់ប្រទេសម្ខាង ដើម្បីបង្ករាយដល់សន្តិសុខជាតិ និងស្ថិរភាពរបស់ប្រទេសម្ខាងទៀតឡើយ។
-ភាគីទាំងពីរ ក៏បានឯកភាពជំរុញកសាងផ្លូវ និងស្ពានឆ្លងកាត់ព្រំដែនផងដែរ។
-ភាគីទាំងពីរ បានឯកភាពដាក់ចេញនូវទិសដៅរួមគ្នា សំដៅពង្រឹង និងបង្កើនកិច្ចសហការលើវិស័យ កសិកម្ម រុក្ខាប្រមាញ់ និងនេសាទ។
-ចំពោះវិស័យសុខាភិបាល ភាគីទាំងពីរ បានវាយតម្លៃ ខ្ពស់លើលទ្ធផលកិច្ចសហប្រតិបត្តិការក្នុង រយៈពេលកន្លងមក។
-ភាគីទាំងពីរ បានវាយតម្លៃខ្ពស់លើលទ្ធផលកិច្ចសហប្រតិបត្តិការក្នុងវិស័យព័ត៌មាន និងឃោសនា។
-ភាគីទាំងពីរ បានឯកភាពរៀបចំកិច្ចប្រជុំលើកទី១១ ស្តីពីកិច្ចសហប្រតិបត្តិការ និងការអភិវឌ្ឍបណ្តាខេត្ត ជាប់ព្រំដែនកម្ពុជា-វៀតណាម នៅព្រះរាជាណាចក្រកម្ពុជា ក្នុងឆ្នាំ២០២០ខាងមុខនេះទៀត ៕
