Sunday, January 13, 2019

LEXUS RX400h ស្លាកលេខ នគរបាល 2-7270 បើកបុកកង់បី ក្រឡាប់ផ្ងារជើង សង្កត់អ្នកដំណើរ២នាក់

ភ្នំពេញៈ រថយន្ត LEXUS RX400h មួយគ្រឿង ពាក់ស្លាកលេខនគរបាល បានបុកជាមួយរ៉ឺម៉កកង់បី PassApp បណ្តាលឲ្យក្រឡាប់ផ្ងារជើ​ងម្ខាង ហើយ​សង្កត់អ្នកដំណើ​រ២នាក់ ធ្វើឲ្យ​រងរបួសស្រាលផងដែរ។ គ្រោះថ្នាក់ចរាចរណ៍នេះ បានកើតមានឡើងនៅវេលាម៉ោង១៖៣០នាទីទៀបភ្លឺ ឈានចូលថ្ងៃទី១៣ ខែមករា ឆ្នាំ២០១៩ តាមចំណុចផ្លូវបំបែកជាបួន មុខភោជនីយដ្ឋានបុប្ផាគិរីរម្យ ស្ថិតក្នុងសង្កាត់បឹងកេងកងទី២ ខណ្ឌចំការមន រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ​ គេឃើញរ៉ឺម៉កកង់បី Pass App មួយគ្រឿង ពណ៌លឿង ពាក់ស្លាកលេខកំពង់ចាម 1L-9041 បើកបរដោយយុវជនម្នាក់ ដឹកភ្ញៀវ២នាក់ ធ្វើ​ដំណើរតាមបណ្ដោយផ្លូវ១១៣ ក្នុងទិសដៅពីជើងទៅត្បូង​ លុះមកដល់ផ្លូវបំបែកជាបួនជាចំណុចកើតហេតុ​ ស្រាប់តែមានរថយន្តមួយគ្រឿង​ LEXUS RX400h ពណ៌ស ពាក់ស្លាកលេខនគរបាល 2-7270 បានធ្វើដំណើរតាមបណ្ដោយផ្លូវ​២៧៨ ក្នុងទិសដៅពីកើតមកលិច ក្នុងល្បឿនយ៉ាងលឿន បានទៅបុកចំផ្នែកចំហៀងខាងក្រោយ​ បណ្ដាលឲ្យក្រឡាប់ផ្ងារជើង សង្កត់អ្នករួមដំណើរទាំងពីរនាក់នោះ រងរបួសស្រាល ភ្លាមៗនោះប្រជាពលរដ្ឋដែលនៅក្បែរកន្លែងកើតហេតុបាននាំគ្នារត់ចូលមកជួយលើ​កកង់បីផ្ងារឡើងវិញ ចំណែករថយន្តបានបន្តដំណើរទៅមុខ ប្រហែលជា៤០ម៉ែត្រទៀត ត្រូវបានប្រជាពលរដ្ឋជួយស្ទាក់ឃាត់ ឲ្យឈប់ដោះស្រាយគ្នា នឹងរាយការណ៍ប្រាប់សមត្ថកិច្ចផងដែរ។

ពេលកើតហេតុគេឃើញមានសមត្ថកិច្ចមូលដ្ឋានក៏ដូចជាសមត្ថកិច្ចផ្នែកវាស់វែង នៃអធិការនគរបាលខណ្ឌចំការមន បានចុះមកដល់កន្លែងកើតហេតុ រួចអោយភាគីទាំងសងខាង ធ្វើការដោះស្រាយ​គ្នា ភាគីម្ចាស់រថយន្តព្រមសងសំណងទៅអោយម្ចាស់រ៉ឺម៉កកង់បី​ ចំនួន១៣០ដុល្លារ​ និងអ្នករបួស២នាក់ ៤០ដុលា្លរ​ ដើ​ម្បីបញ្ចប់រឿង​ នៅចំពោះមុខសមត្ថកិច្ច និងអ្នកសារព័ត៌មាន​តែម្ដង៕

Feature Ads