ភ្នំពេញៈ នារីរូបស្រស់ម្នាក់ ស្រវឹងស្រាបើករថយន្ត PRIUS មួយគ្រឿងយ៉ាងលឿន ខ្វះការប្រុងប្រយត្ន័ បានជ្រុលទៅបុកពីក្រោយរថយន្ត PRIUS មួយគ្រឿង បណ្ដាលឲ្យរេចង្កូតឡើងទៅលើសួនច្បារពុះចែកទ្រូងផ្លូវ និងបុកបង្គោលភ្លើងបំភ្លឺផ្លូវមួយដើម បាក់រាបដល់ដី ធ្វើឲ្យមានការឆ្លងចរន្តភ្លើងប៉ះឆក់ផងដែរ ចំណែករថយន្តបង្ក បានបើករត់គេចរហូត ត្រូវបានបងប្អូនប្រជាពលរដ្ឋនាំគ្នាដេញចាប់ឃាត់បាន ហើយរាយការណ៍ប្រាប់សមត្ថកិច្ចចុះមកពិនិត្យនៅកន្លែងកើតហេតុ។
គ្រោះថ្នាក់ចរាចរណ៍នេះ បង្កឲ្យមានការភ្ញាក់ផ្អើលនេះ បានកើតឡើងនៅវេលាម៉ោង១១យប់ ថ្ងៃសៅរ៍ ទី៩ ខែកុម្ភៈ ឆ្នាំ២០១៩ នៅលើកំណាត់ផ្លូវ២១៧ ត្រង់ចំណុចទល់មុខរោងចក្រស្រាបៀរកម្ពុជា ស្ថិតក្នុងភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។
ប្រភពព័ត៌មានពីកន្លែងកើតហេតុ បានឲ្យភ្នាក់ងារសារព័ត៌មាន ខេមប៉ុស្តិ៍ ដឹងថា មុនកើតហេតុ គេឃើញរថយន្ត TOYOTA PRIUS ពណ៌ស ស្លាកលេខភ្នំពេញ 2AB-2880 បើកបរដោយនារីរូបស្រស់ម្នាក់ ក្នុងស្ថានភាពស្រវឹងស្រា ធ្វើដំណើរតាមបណ្ដោយផ្លូវ២១៧ ទិសដៅពីត្បូងទៅជើង ក្នុងល្បឿនលឿន ពីក្រោយរថយន្តមួយគ្រឿងទៀត ម៉ាក TOYOTA PRIUS ពណ៌សដូចគ្នា តែពាក់ស្លាកលេខភ្នំពេញ 2AS-6205 បើកបរដោយបុរសម្នាក់ ធ្វើដំណើរតាមបណ្ដោយផ្លូវ២១៧ ទិសដៅស្របទិសគ្នា លុះមកដល់ចំណុចកើតហេតុខាងលើ ស្រាប់តែនារីរូបស្រស់ខាងលើ បើកជ្រុលទៅបុកពីក្រោយចំពេញទំហឹង បណ្ដាលឲ្យរថយន្ត PRIUS របស់បុរសនោះ រេចង្កូតឡើងទៅលើសួនច្បារពុះចែកទ្រូងផ្លូវ បុកបង្គោលភ្លើងបំភ្លឺផ្លូវមួយដើម បាក់រាបដល់ដី ធ្វើឲ្យឆ្លងចរន្តភ្លើងប៉ះឆក់ផងដែរ។
ប្រភពបន្តថា ចំណែកនារីរូបស្រស់ដែលស្រវឹងស្រារបើកថយន្តបង្កនោះ មិនព្រមឈប់ទេ នៅតែបន្តបើកទៅមុខទៀត បំណងបើករត់គេច រហូតដល់មុខសាលាខណ្ឌដង្កោ ត្រូវបានបងប្អូនប្រជាពលរដ្ឋនាំគ្នាជួយដេញចាប់ឃាត់បាន តែរូបនាងមិនព្រមចុះពីលើរថយន្តនោះទេ ទើបប្រជាពលរដ្ឋរាយការណ៍ប្រាប់ឲ្យកម្លាំងសមត្ថកិច្ចចុះមកពិនិត្យនៅកន្លែងកើតហេតុ ហើយបានហៅឲ្យនារីរូបស្រស់ ដែលស្រវឹងស្រា និងជាអ្នកបើកបរនោះ ចុះពីលើរថយន្ត រួចនាំមកស្នាក់ការប៉ុស្តិ៍នគរបាលដង្កោ ដើម្បីធ្វើការសាកសួរ ។
សមត្ថកិច្ចបានអោយដឹងថា នារីរូបស្រស់ដែលស្រវឹងស្រាហើយបើកបររថយន្ត TOYOTA PRIUS ស្លាកលេខភ្នំពេញ 2AB-2880 ឈ្មោះ អេង លី អាយុ៣០ឆ្នាំ មុខរបរលក់ដូរ ស្នាក់នៅសង្កាត់ទឹកល្អក់២ ខណ្ឌទួលគោក រាជធានីភ្នំពេញ។ ចំណែកឯអ្នកបើករថយន្ត PRIUS ពាក់ស្លាកលេខភ្នំពេញ 2AS-6205 ឈ្មោះ តុង តុលា ភេទប្រុស អាយុ២៦ឆ្នាំ មុខរបរធ្វើការរោងចក្រ ស្ថិតនៅភូមិស្រែតាថៃ ឃុំអភិវឌ្ឍន៍ ស្រុកទឹកផុស ខេត្តកំពុងឆ្នាំង។
ក្រោយពីកើតហេតុ សមត្ថកិច្ចមូលដ្ឋាននិងផ្នែកចរាចរណ៍ខណ្ឌដង្កោ បានរាយការណ៍ប្រាប់សមត្ថកិច្ចជំនាញ ចុះធ្វើការវាស់វែង និងស្ទូចយករថយន្តទាំង២គ្រឿង ទៅរក្សាទុកនៅការិយាល័យចរាចរណ៍ផ្លូវគោក នៃស្នងការនគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នា និងសងការខូចខាតបង្គោលភ្លើងបំភ្លឺផ្លូវ ដែលជាសម្បតិ្តសាធារណៈរបស់រដ្ឋនោះ តាមច្បាប់ផងដែរ៕