ភ្នំពេញ ៖ នៅព្រឹកនេះ ថ្ងៃទី ២៧ ខែកុម្ភៈ ឆ្នាំ ២០១៩នេះ អាជ្ញាធររាជធានីភ្នំពេញដឹកនាំដោយ ឯកឧត្ដម ឃួង ស្រេង ដោយបានកោះអញ្ជើញ អាជ្ញាធរខណ្ឌទាំង១២ សមត្ថកិច្ចពាក់ព័ន្ធ និង ក្រុមហ៊ុនក្រឡុកស៊ីម៉ង់ នៅក្នុងរាជធានីភ្នំពេញទាំងអស់មកប្រជុំ ដើម្បីណែនាំពីការងារមួយចំនួន ពាក់ព័ន្ធនឹងការហាមរថយន្តធំៗចេញ ចូលក្នុងរាជធានី ខណៈដែលភ្នំពេញបច្ចុប្បន្នកំពុង ប្រឈមនឹងការកកស្ទះចរាចររាល់ថ្ងៃ និងគ្រោះថ្នាក់នោះ។
ថ្លែងក្នុងកិច្ចប្រជុំ នេះ ឯកឧត្ដម ឃួង ស្រេង អភិបាលរាជធានីភ្នំពេញ បានមានប្រសាសន៍ បញ្ជាក់ឱ្យដឹងថា ចំពោះរថយន្តធុនធំដឹកទំនិញគ្រប់ប្រភេទ គឺចាប់ពីថ្ងៃនេះទៅ មិនមានការអនុញ្ញាតិឱ្យចេញចូលរាជធានីភ្នំពេញនៅពេលថ្ងៃជាដាច់ខាតចាប់ពីម៉ោង៦ ព្រឹករហូតដល់ម៉ោង៩យប់។
ដោយឡែកសម្រាប់រថយន្តក្រឡុកស៊ីម៉ង់ត៍ ដែលត្រូវបំពេញការងាររបស់ខ្លួន ស្របពេលដែលវិស័យសំណង់នៅក្នុងរាជធានីភ្នំពេញមានការអភិវឌ្ឍរីកចម្រើន គឺរថយន្តប្រភេទនេះអាចអនុញ្ញាតឱ្យចេញ ចូលក្នុងរាជធានីភ្នំពេញ នៅអំឡុងពេលថ្ងៃបានដោយកំណត់ពេលវេលាច្បាស់លាស់ គឺអាចធ្វើចរាចរណ៍បាននៅម៉ោង៩ព្រឹក ប៉ុន្តែត្រូវផ្អាកនៅក្នុងម៉ោងដែលកម្មករ បុគ្គលិក សិស្សានុសិស្សចេញពីសាលារៀន និងចេញពីបំពេញការងារ នោះគឺនៅម៉ោង១១ព្រឹកម៉ោង ២រសៀល និងម៉ោង ៥ល្ងាចត្រូវផ្អាកការធ្វើចរាចរណ៍។
ឯកឧត្ដម ឃួង ស្រេង ក៏បានជំរុញ ក៏ដូចជាណែនាំឱ្យម្ចាស់ក្រុមហ៊ុនក្រឡុកស៊ីម៉ងត៍ ទាំងអស់ត្រូវតាមដាន និងត្រួតពិនិត្យទៅលើអ្នកបើកបររថយន្តក្រឡុកស៊ីម៉ង់ទាំងអស់ ជៀសវាងឱ្យបាននូវការប្រើប្រាស់គ្រឿងញៀន គ្រឿងស្រវឹង៕
