√ ឆក់ទូរស័ព្ទសិស្សសាលាប៊ែលធី បានសម្រេច ជិះម៉ូតូបុករថយន្ត ចាប់ខ្នោះប៉ូលិស

ភ្នំពេញៈ យុវតីរូបស្រស់សិស្សសាលាប៊ែលធី ជិះម៉ូតូទៅរៀន ហើយកំពុងនិយាយទូរស័ព្ទតាមផ្លូវ ត្រូវជនសង្ស័យ២នាក់ ជិះម៉ូតូឌុបគ្នាមកឆក់ទូរស័ព្ទ បានសម្រេច តែសំណាងអាក្រក់ ក៏ជ្រុលទៅបុករថយន្ដមួយគ្រឿង បណ្ដាលឲ្យដួល ផ្អើលប្រជាពលរដ្ឋចេញមកជួយចាប់បានព្រួតវាយម្នាក់មួយដៃ ម្នាក់មួយជើង ទើបប្រគល់អោយសមត្ថកិច្ចប៉ុស្តិ៍នគរបាលស្ទឹងមានជ័យ៣ ចាប់វាយខ្នោះយកទៅសាកសួរនៅស្នាក់ការប៉ុស្តិ៍តែម្ដង។

ហេតុការណ៍នេះ បានកើតឡើងនៅវេលាម៉ោង១៖២០នាទីរសៀល ថ្ងៃសុក្រ ៤កើត ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៨ ខែកុម្ភៈ ឆ្នាំ២០១៩ នៅត្រង់ចំណុចមុខរោងចក្រកាត់ដេរសម្លៀកបំពាក់អ៊ីខាង នៅលើកំណាត់ផ្លូវវេងស្រេង ស្ថិតក្នុងភូមិដំណាក់ធំ២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។

ជនសង្ស័យទី១ ឈ្មោះ សន ធិ ភេទប្រុស អាយុ១៨ឆ្នាំ ជនជាតិខ្មែរ ទីលំនៅផ្ទះជួល ផ្លូវបេតុង សង្កាត់អូរបែកក្អម ខណ្ឌសែនសុខ រាជធានីភ្នំពេញ មុខរបរជាងពិដាន (ប្រើប្រាស់គ្រឿញៀន) ។ ២ជនសង្ស័យឈ្មោះ ចាន់ វឌ្ឍនៈ ភេទប្រុស អាយុ១៩ឆ្នាំ ជនជាតិខ្មែរ ទីលំនៅផ្ទះជួល ផ្លូវលំ សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ មុខរបរចុងភៅ (មានផ្ទុកសារធាតុញៀន)។

ជនរងគ្រោះឈ្មោះ ផូ ដាណែត ភេទស្រី អាយុ១៦ឆ្នាំ ជនជាតិខ្មែរ ទីលំនៅផ្ទះជួល ផ្លូវលំ ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ មុខរបរសិស្សសាលាប៊ែលធីអន្តរជាតិ បានរៀបរាប់ឲ្យដឹងថា មុនពេលកើតហេតុខ្លួនបានជិះម៉ូតូចេញពីផ្ទះនៅម្ដុំទួលពង្រ ដើម្បីទៅរៀននៅសាលាប៊ែលធីអន្តរជាតិ នៅច្រមុះជ្រូកស្ទឹងមានជ័យ លុះពេលជិះមកដល់ចំណុចកើតហេតុខាងលើ ខណៈដែលកំពុងនិយាយទូរស័ព្ទ ស្រាប់តែលេខមុខជនសង្ស័យពីរនាក់ ជិះម៉ូតូមួយគ្រឿង ម៉ាកហុងដាឌ្រីមសង់ (HONDA DREAM) ស៊េរីឆ្នាំ២០១៧ ពណ៌ខ្មៅ ពាក់ស្លាកលេខស្វាយរៀង 1K-0121 ឌុបគ្នា តាមពីក្រោយមកក្បែរ រួចធ្វើសកម្មភាពឆក់ទូរស័ព្វរបស់នាង បានសម្រេច ហើយព្យាយាមជិះគេចខ្លួន ភ្លាមនោះរូបនាងក៏បានស្រែកឆោឡោថា "ចោរៗ" ដែរ តែសំណាងអាក្រក់ ជនសង្ស័យទាំង២នាក់នោះ ជិះរត់ទាំងភ័យស្លន់ស្លោ ក៏ជ្រុលចង្កូតទៅបុករថយន្ដមួយគ្រឿងទៀត បណ្ដាលឲ្យដួល ទើបបង្កការភ្ងាក់ផ្អើលឡើងដល់ប្រជាពលរដ្ឋនៅក្បែរនោះ នាំគ្នាជួយចាប់បានទាំងពីរនាក់ ហើយស្វាគមន៍ម្នាក់មួយដៃ ម្នាក់មួយជើង ទើបប្រគល់អោយសមត្ថកិច្ចប៉ុស្តិ៍នគរបាលស្ទឹងមានជ័យ៣ វាយខ្នោះចាប់យកទៅសាកសួរនៅស្នាក់ការប៉ុស្តិ៍តែម្ដង។

វត្ថុតាងចាប់យក ៖ ទូរស័ព្ទដៃម៉ាកអាយហ្វូនសិចផ្លើស ពណ៌ទឹកមាសចំនួន០១គ្រឿង មានស៊ីមកាតលេខ 085 263462 (ជារបស់ជនរងគ្រោះ) និង ម៉ូតូចំនួន០១គ្រឿងម៉ាកសេ១២៥ ពណ៌ខ្មៅ ពាក់ស្លាកលេខស្វាយរៀង 1K-0121 (ជារបស់ជនសង្ស័យ)។

បច្ចុប្បន្នជនសង្ស័យ ត្រូវបានកម្លាំងនគរបាលប៉ុស្ដិ៍ស្ទឹងមានជ័យ៣ បញ្ជូនទៅឃុំខ្លួននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់តាមនីតិវិធី។ ចំណែកឯទូរស័ព្ទរបស់ជនរងគ្រោះ ត្រូវបានសមត្ថកិច្ចធ្វើការប្រគល់ជូនជនរងគ្រោះវិញ៕