ភ្នំពេញៈ កម្លាំងនគរបាលព្រហ្មទណ្ឌកម្រិតស្រាលរបស់ស្នងការនគរបាលរាជធានីភ្នំពេញ ឆក់បង្រ្កាបទីតាំងហ្គេមបាញ់ត្រីខុសច្បាប់មួយកន្លែង យីហោ "ហេបភីលេន HAPPY LAND" ដែលលួចពួនសម្ងំនៅលើផ្សារទំនើបសុវណ្ណា ដោយឃាត់អ្នកលេង និងបុគ្គលិកជាច្រើននាក់ នាំមកសាកសួរ។
ការឆ្មក់បង្ក្រាបទីតាំងលេងល្បែងស៊ីសងខុសច្បាប់ខាងលើនេះ ធ្វើឡើងកាលពីវេលាម៉ោង៥៖៥០នាទីល្ងាច ថ្ងៃទី១៥ ខែមីនា ឆ្នាំ២០១៩ នៅលើជាន់ទី០៤ នៃផ្សារទំនើបសុវណ្ណា ស្ថិតក្នុងសង្កាត់ទំនប់ទឹក ខណ្ឌចំការមន។
កម្លាំងការិយាល័យនគរបាលព្រហ្មទណ្ឌកម្រិតស្រាល រាជធានីភ្នំពេញ ដោយមានការអនុញ្ញាតពីលោក ប្លង់ សុផល ព្រះរាជអាជ្ញារង នៃអយ្យកាសាលាដំបូងរាជធានីភ្នំពេញ អមដោយលោក គឹម ឆេងប៊ុន ក្រឡាបញ្ជី និងសមាសភាពចូលរួម ដោយលោកវរសេនីយ៍ឯក ប៊ុន សត្យា នាយការិយាល័យ ព្រហ្មទណ្ឌកម្រិតស្រាល រាជធានីភ្នំពេញ និងលោកវរសេនីត្រី ម៉ម សាវន នាយផ្នែក បានដំណើរការចុះបិទឃ្លុំបេ ជាបណ្តោះអាសន្ន ទីតាំងកំសាន្តយីហោ "ហេភីលេន - HAPPY LAND" ស្ថិតនៅក្នុងផ្សារសុវណ្ណា ជាន់ទី០៤ ផ្លូវ២៧១ សង្កាត់ទំនប់ទឹក ខណ្ឌចំការមន ដែលពាក់ព័ន្ធបទល្មើស បើកល្បែងស៊ីសងខុសច្បាប់ហ្គេមបាញ់ត្រី។
ក្នុងនោះកម្លាំងបានឃាត់អ្នកលេង និងបុគ្គលិកជាច្រើននាក់ ប៉ុន្តែមិនបានកំណត់ចំនួនប៉ុន្មាននោះទេ នាំមកសាកសួរ ដើម្បីកសាងសំណុំរឿងបញ្ជូលទៅតុលាការ ចាត់ការតាមនីតិវិធីច្បាប់ ៕