ខេត្តកណ្តាល ៖កាលពីវេលាម៉ោង១៥ និង៤៥នាទី នាថ្ងៃទី២១ ខែឧសភា ឆ្នាំ២០១៩ ឡកែច្នៃប្រេងម៉ាស៊ីនចាស់ៗ(ប្រេងខ្មៅ) គ្មានបទដ្ឋានត្រឹមត្រូវខុសបច្ចេកទេសមួយកន្លែងអាចបណ្តាលមកពីឆ្លងចរន្តអគ្គិសនី បានផ្ទុះឆេះរងការខូចខាតទាំងស្រុង ស្ថិតនៅចំណុចភូមិដំណាក់ត្រាច ឃុំដំបូងរូង ស្រុកភ្នំស្រួច ខេត្តកំពង់ស្ពឺ ប៉ុន្តែសំណាងល្អ មិនបណ្ដាលឲ្យរីករាលដាលដល់ផ្ទះប្រជាពលរដ្ឋ និងគ្មានមនុស្សណាម្នាក់រងរបួស ឬស្លាប់ ក្នុងហេតុការណ៍ឆេះទីតាំងផលិតកែច្នៃប្រេងខ្មៅ ស្លជាប្រេងម៉ាស៊ូតនេះទេ។
មន្ត្រីនគរបាលស្រុកភ្នំស្រួចបានរាយការណ៍ឲ្យដឹងថា ម្ចាស់ទីតាំងសិប្បកម្មឡកែច្នៃប្រេងខ្មៅដែលត្រូវផ្ទុះឆេះខាងលើមានម្ចាស់ឈ្មោះថន សេងលី ភេទប្រុស អាយុ៣០ឆ្នាំ មានទីលំនៅសង្កាត់តាខ្មៅក្រុងតាខ្មៅ ខេត្តកណ្តាល។
អ្នកឃើញហេតុការណ៍ដំបូងបានឲ្យដឹងថា មុនដំបូងអគ្គិភ័យនេះផ្តើមឡើងដោយសារឆ្លងចរន្តអគ្គិសនី រួចក៏ឆេះរាលដាលកាន់តែធំបែបនេះ ព្រោះទីតាំងនេះមានស្តុកប្រេងរាប់ម៉ឺនលីត្រផងដែរ។
នគរបាលនិយាយថា ក្នុងករណីឆេះឡចម្រាញ់ប្រេងម៉ាស៊ីនចាស់ៗ ឬហៅថាប្រេងខ្មៅនេះ ជាក់ស្ដែងបណ្ដាលឲ្យខូចខាតរថយន្តដឹកប្រេង០១គ្រឿង ម៉ាស៊ីនចម្រាញ់០៧គ្រឿង ស៊ីទែនផ្ទុកប្រេងចំនួន០៦ ធុងជ័រ២៤ធុង និងប្រេងម៉ាស៊ូតចម្រាញ់រួចចំនួន៦៧.០០០លីត្រ និងសម្ភារៈមួយចំនួនទៀត៕