ភ្នំពេញៈ បុរសជនជាតិចិនម្នាក់ បើករថយន្តម៉ាក LEXUS ពណ៌ខ្មៅ ស្លាកលេខភ្នំពេញ 2AW 4332 បានទៅបុកជាមួយម៉ូតូកង់បីមួយគ្រឿងពេញទំហឹង ហើយព្យាយាមបើកគេចខ្លួន ភ្លាមនោះកម្លាំងសមត្ថកិច្ចបានអន្តរាគមន៍ភ្លាមៗ ដោយបានធ្វើការឃាត់ខ្លួនជនបង្ក បែរជារកឃើញថ្នាំញៀនជាង៦គីឡូក្រាម។
ករណីគ្រោះថ្នាក់ចរាចរណ៍នេះ កើតឡើងវេលាម៉ោង៣រសៀលថ្ងៃទី៣ ខែមិថុនា ឆ្នាំ២០១៩ ស្ថិតនៅចំណុចមុខរោងកុនលុច្ស ផ្លូវលេខ 154 សង្កាត់ផ្សាថ្មី3 ខណ្ឌដូនពេញ រាជធានីភ្នំពេញ។
សមត្ថកិច្ច បានឲ្យដឹងថា ជនបង្កឈ្មោះ អៅ មីង ភេទប្រុស អាយុ៣០ឆ្នាំ ជាជនជាតិចិន។
ក្រោយពីបានធ្វើការត្រួតពិនិត្យ សមត្ថកិច្ចឃើញនៅក្នុងរថយន្តរបស់ជនបង្កមានការបូបយួរមួយ ក្នុងនោះមានកញ្ចប់កាហ្វេចំនួន៦ដុំ ដោយមានការសង្ស័យ សមត្ថកិច្ចបានហែកមើលឃើញមានថ្នាំគ្រាប់ពណ៌ទឹកសមុទ្រ រូបតុក្កតា សញ្ញាក្បាលខ្មោច ច្រើនគ្រាប់ សង្ស័យជាសារធាតុញៀន ភ្លាមនោះសមត្ថកិច្ចបានសហការជាមួយការិយាល័យ ប្រឆាំងគ្រឿងញៀនដើម្បីធ្វើតេស្ត នឹងជាលទ្ធផលបង្ហាញអោយឃើញថា ជាថ្នាំញៀនប្រភេទ M.A /M.D (អិចស្រ្តាស៊ី) ថ្នាំគ្រវី ក្រោយមកសមត្ថកិច្ចបានសួរចម្លើយនឹងពន្លាត ដែនសមត្ថកិច្ចបន្តធ្វើការឆែកឆេរដល់លំនៅដ្ឋានជនសង្ស័យស្ថិតនៅខណ្ឌច្បារអំពៅ ។
កិច្ចប្រតិបត្តិការបន្តនេះ ដោយមិនមានលទ្ធផលរុករកឃើញអ្វី នឹងការស្តាប់ចម្លើយសារភាព ជនសង្ស័យមិនបានប្រាប់អំពីបក្ខពួក សមត្ថិច្ចក៏បានធ្វើកំណត់ហេតុនៃការឆែកឆេរ ព្រមទាំងដកហូតថ្នាំញៀនប្រភេទអិចស្តាស៊ីចំនួន 11,680គ្រាប់ ទម្ងន់ 6kg 541ក្រាម នឹង32មីលីក្រាម។
សមត្ថកិច្ចកំពុងជំរុញនូវវិធានការជំនាញសួរចម្លើយដើម្បីបន្តយកបក្សពួកនឹងវត្ថុតាងបន្ថែមទៀត៕
